Трговски објекти (општо)

Хрватската групација Певец денеска, во Гостивар, го отвори својот прв продажен центар во Македонија, вреден 3 милиони евра, со што почна влезот на македонскиот пазар, на еден од водечките хрватски трговски ланци.

“Ова ќе значи зголемување на конкурентноста на нашиот пазар, нови 90 вработувања и можност да се продаваат македонските производи низ петнаестте продажни центри на Певец во Хрватска“, изјави министерот за травспорт и врски, Миле Јанакиевски, на денешното свечено отварање, на кое присуствуваше заедно со државниот секретар од Минстерството за финансии, Снежана Костадиновска.
 
Ова е 15-ти продажен центар на Певец и прв надвор од границите на Хрватска, со чие отворање започнува регионалната експанзија на оваа хрватска компанија.

Првиот Певец центар во Македонија, го отворија градоначалникот на Гостивар, Невзат Бејта и директорот на групацијата Певец за Македонија, Динко Перковиќ. Сместен е во Полошката долина, на вкупна површина од 18.000 квадратни метри, од кои 10.000 ќе бидат продажен простор. На десетте оддели со 40.000 производи, ќе бидат вработени 90 луѓе.
 
Перковиќ го најави отварањето на следниот, најголем и најлуксузен продажен центар на оваа компанија, кој ќе биде лоциран во Скопје.

 Денес, Певец е една од најуспешните хрватски компании, со повеќе од 3.000 вработени, вкупен промет од над 400 милиони евра и годишен раст од 20 отсто.

„Mall of Macedonia“ во Скопје

Неџип Наци Догру е оптимист

Дали Скопје ќе добие капитален мегамултифункционален трговски центар во центарот на градот на површина од пет фудбалски терени и со речиси 60 илјади квадратни метри деловен простор? На минатонеделното свечено отворање на првата фаза на „Mall of Montenegro“ во Подгорица, кој како што се очекува ќе отвори пет илјади нови работни места, Неџип Наци Догру, претседател на бордот директори на мултинационалната градежно-инвестициона компанија „Гинташ“ од Анкара, Турција, ни потврди дека веќе имале разговори за изградба на „Mall of Macedonia“ во Скопје.

„Сакаме да инвестираме во мегатрговски центри по пат на партнерство со градските власти на сите главни градови на регионот, вклучувајќи го и Скопје, се разбира. Има расположение и од ваша страна, но постојат одредени административни пречки кои, се надевам, ќе ги надминеме“, ни рече турскиот инвеститор. (Ек.Р.)