Зоолошки градини во Македонија

Бенгалскиот тигар од скопската Зоолошка градина наскоро ќе се пресели во своето ново живеалиште, изградено во согласност со светските стандарди и по препораките на ЕАЗА (Европската асоцијација на зоолошки градини и аквариуми).

Деновиве беше монтирана специјална галванизирана мрежа околу живеалиштето за тигрите, кое се протега на површина од 3.500 квадратни метри. Од внатрешната страна на живеалиштето, во близина на мрежата, поставени се специјални жици кои ќе бидат под слаб електричен напон, со цел да се спречи приближување на животните до оградата и поголема безбедност на посетителите.

Внатрешноста на живеалиштето е збогатена со два базена и фонтана изградена од камења. Од фонтаната избива водоскок и водата по камења се слева во големиот базен. Живеалиштето е поделено на два дела, во попространиот дел ќе биде сместен пар сибирски тигри, а во помалиот дел ќе биде сместен бенгалскиот тигар.
Изградбата на живеалиштето за тигрите е лична донација на градоначалникот Трифун Костовски.

Павијаните и берберите исто така наскоро ќе бидат преместени во нивните нови пространи живеалишта. Околу новото живеалиште на мајмуните е поставена галванизирана мрежа, а останува уште да се уреди подната подлога на објектот кој се наоѓа во внатрешноста на живеалиштето. Фасадата на објектот е составена од природни елементи, дрво и камен. Новото живеалиште за мајмуните е поделено на два дела, во предниот дел ќе бидат сместени павијаните, а во задниот дел берберите. Живеалиштето е збогатено со карпи и дрвја.

Очекуваме наскоро да се постави потребната електрична инсталација, која ќе овозможи специјалните жици, со кои се оградени живеалиштата, да се напојуваат со електрична енергија, по што тигарот и мајмуните ќе се вселат во новите живеалишта.

Деновиве, во рамки на проектот за реконструкција на Зоолошката градина, се работи на изградба на живеалиштето за рисот. Живеалиштето ќе се простира на површина од околу 700 квадратни метри, во него има куќичка изработена од камен, а веќе се поставува заштитната ограда. Откако ќе биде направено живеалиштето ќе се донесат два риса од европските зоолошки градини. ИК Банка ја финансира изградбата на новото живеалиште за рисот.

Веќе е започната изградбата на живеалиштето за мечките, кое се наоѓа спроти објектот Мајмунара, а е донација од Општината Карпош. Живеалиштето се простира на површина од околу 3.000 квадратни метри и ќе биде оградено со дрвени балвани и со специјална мрежа.
Во моментов се работи на реконструкција на постоечкиот објект, кој се наоѓа во внатрешноста на новото живеалиште, а ќе има функција на засолниште во кое ќе се изолираат мечките, кога тоа ќе биде потребно за да се исчисти просторот и слично.

Со цел посетителите да можат поавтентично да го доловат начинот на живот на овие животни, ќе се направи видиковец, кој ќе биде висок околу 3,5 метри и на кој љубителите на животни ќе можат да се качат и да ги набљудуваат мечките.
Во новото живеалиште ќе бидат сместени двете големи мечки и двете мали мечиња, кои во почетокот ќе бидат одвоени. За да се задоволат светските стандарди за живот на животните во Зоолошки градини, во внатрешноста на живеалиштето ќе биде направен базен во кој ќе се стават риби, со цел мечките да влегуваат во вода и да ловат, како што тоа го прават во природната средина.
Во живеалиштето ќе се направат и неколку мини пештери (засолништа) изработени од камен и од дрво.

Деновиве ќе стартува и изградбата на живеалиштето за волците. Просторот на кој ќе се гради живеалиштето е околчен, а се наоѓа веднаш до живеалиштата на рисот и мечките.

Новото живеалиште за волците ќе се простира на површина од 1.500 квадратни метри, ќе биде поделено на два дела, низ кои ќе минува поток. Самото живеалиште ќе наликува на шума, ќе биде богато со вегетација, со цел да се долови природната средина на волците.

Наскоро ќе се започне со уредување и на ЗОО амбулантата во која ќе се вршат потребни ветеринарни интервенции врз животните. Досега се изведени помали градежни зафати на надворешната страна на објектот, останува да се уреди внатрешноста и да се набави потребната опрема.