Нов објект на Комерцијална Банка (Сан Марко)

Наташа Јанчиќ

Во центарот на Скопје, на градскиот плоштад, пред зградата на „Македонски телекомуникации“, од пред неколку дена се гради објект. Никој од надлежните не заеше точно да потврди што се гради, иако во јавноста се шпекулира дека е можно на оваа локација да никне хотел или банка. Во Општина Центар не знаат да кажат за намената на овој објект. Од Министерството за транспорт и врски, пак, велат дека тоа не е државно земјиште и затоа не се запознати со градбата. Според нив, надлежна за земјиштето е Општина Центар. Сепак, како што се дознава, инвеститор на градбата е италијанската компанија „Сан Марко“, во соработка со скопската фирма „Уни-М“. Објектот, според информациите, се гради на површина од 3.500 квадратни метри и ќе биде висок 29 метри, со приземје, осум ката и со дополнителен кат под покривот. Виолета Аларова, градоначалничката на општина Центар, вели дека не знае ни што ќе се гради ниту кој гради. - Не сум урбанист по професија. Јас само ги потпишувам одлуките што ги подготвуваат луѓето надлежни за тоа. Мене ми е битно се да биде во рамките на законот - објаснува Аларова. Ниту од Министерство за транспорт и врски не беа информирани што се гради во централното градско подрачје. - Не знам за каков објект се работи. Министерството не е надлежно за таа локација. За повеќе информации обратете се во катастар. А, прашајте и во Општина Центар, таму мора да знаат кој го гради објектот. Во одобрението за градба што општината го издава треба да стои кој што гради - објаснува Драган Симоновски, портпарол на Министерството за транспорт и врски. Во врска со овој објект Мирослав Грчев, поранешниот градоначалник на општината Центар, вели дека не е спорна градбата туку целиот Детален урбанистички план донесен пред шест месеци. Според него, посебно е чудно што на локацијата „Мал ринг“ висината на градбите порасна од 22, 5 на 29 метри. - Овој план центарот на градот го третира како да е периферија, а тој содржи токму најголем број репрезентативни објекти, заштитени со закон. До Уставниот суд поднесов иницијатива да се разгледа и оцени деталниот план, но од таму се уште нема одговор - истакна Мирослав Грчев. За време на поднесувањето на ДУП за „Мал ринг“ Министерството за транспорт и врски беше цел на експертите затоа што со зголемувањето на висината на објектот би добиле дополнителни четири милиони евра. Инаку, со години Општина Центар ветуваше дека ќе ја избрише маркичката за изградба на објект на ова место за да не се задушува плоштадот со градби. Во моментот кога се донесуваше новиот ДУП за „Мал ринг“, меркичката беше само препишана од стариот план. Аларова пред пет години дури бараше средба со претставници од Градот и од Министерството за транспорт и врски за да се вклучат во осмислувањето на „Малиот ринг“ и бараше од планот да се избришат не само старата зграда на Народна банка, туку и ред други маркички околу плоштадот. Но, таква средба не се случи и сите маркички за градење околу плоштадот останаа неизбришани.