Јавна чистота

Подземно езеро полно со фекална вода има во напуштениот објект до старото игралиште во населбата Ново Лисиче. Стравувајќи од зарази, околните жители го пријавувале дефектот во повеќе институции, но досега никој не се прогласил за надлежен да го реши проблемот. Сопственик на објектот е Агенцијата за млади и спорт, која планира таму да изгради спортска сала, но се уште се чека да завршат некои административни процедури за да се спроведе тој проект. Во меѓувреме нема никаков одговор дали ќе се интервенира за да се запре истекувањето на фекалиите.

ДЕЦАТА МОЖЕ ДА СЕ УДАВАТ

Жителите од околните згради се плашат дека децата може од љубопитност да пробаат да влезат внатре и да се удават во водата што доаѓала од пукнатата цевка, исто така се жалат дека оттаму доаѓа неподнослива реа, која се чувствува дури на неколку метри од влезот на игралиштето.

- Не знаеме што да правиме, се обидовме со сите надлежни институции, но никој не сакаше да ни излезе во пресрет. Во близината на игралиштето живеат многу мали деца, а влезовите во подземните простории на игралиштето не се заштитени на ниту еден начин. Секое дете од љубопитност може да влезе внатре и никогаш да не излезе. Таму нема никакво светло, па децата без да забележат дека просторијата е полна со вода може да паднат во неа. Тука се собираат млади луѓе, кои пијат и се дрогираат. На едната страна дури си направиле и живеалиште, си донеле јамболлии и перници. Просториите се преполни со шприцеви и со шишиња од алкохолни пијалаци - се пожали Љубомир Георгиевски, жител на една од околните згради.

Веднаш до влезот на подземните простории се наоѓаат и неколку дуќанчиња и фирми, а оттаму велат дека водата течела уште од минатата година, кога и најверојатно пукнала цевката.

- Ние уште лани пријавивме дека во просториите има пукната цевка, се јавивме во јавното претпријатие „Водовод и канализација“, од каде што ни кажаа дека не можат да направат ништо без да добијат некаков налог. Се јавивме кај градоначалникот на општината Аеродром, но не добивме никаков одговор. Не знаеме што да правиме понатаму, овој објект е жива зараза - објасни еден од вработените во околните фирми.

Граѓаните раскажуваат дека на некоја жена што имала дуќан во близината на игралиштето пред неколку месеци и стигнала сметка за вода од 18 илјади денари, иако водомерот не и покажал толку голема потрошувачка. Таа ја платила сметката за да не заглавува во судските лавиринти, но нејзините соседи се сомневаат дека оваа случка е поврзана со истекувањето на водата во подземните простории на игралиштето.

ИГРАЛИШТЕТО ТРЕБА ДА БИДЕ САЛА

Општинарите од Аеродром велат дека немаат никаква надлежност да интервенираат на тоа игралиште, затоа што просторот не бил во нивна сопственост.

- Со одлука на Владата земјиштето и е доделено на Агенцијата за млади и спорт. Тие имаат подготвено проект за реновирање на целиот објект, но се чека да се усвои деталниот урбанистички план за тоа подрачје, за да може да продолжат активностите - објаснуваат од таму.

Од Агенцијата за млади и спорт, пак, велат дека се уште ја чекаат градежната дозвола од општината Аеродром и веднаш штом ќе ја добијат ќе почнат да ги реновираат запуштените простории.

- Со реконструкцијата тоа игралиште треба да стане најголемата спортска сала во земјава, која ќе се вика „Александар Македонски“. Но за да го направиме тоа ќе мораме да ја почекаме дозволата - најавува Тане Димовски од агенцијата.

Пред десетина години исто така имаше обид игралиштето да стане сала, но таа идеја наиде на остар отпор од околните жители, кои сметаа дека таков објект во нивното маало би предизвикувал чести нарушувања на јавниот ред и мир, дека ќе им се зголемела бучавата, а кога ќе имало натпревари ќе им биле блокирани паркиралиштата.

Н.Македонија - Александра Денковска - 24.10.2009

Пумпи за црпење на водата од киното жабарник - Вест - 28.05.2003

Просторот до игралиштето и кино салата, која никогаш не проработела, повеќе од два месеци се поплавени со вода, која достигнала висина од 2 метри и се претворила во мочуриште
Општина Кисела Вода конечно презеде мерки за чистење на кино салата во Ново Лисиче која од поодамна е претворена во жабарник. Екипи на ЈП"Водовод и канализација" вчера со две пумпи ја црпеа водата од кино салата до игралиштето на булевар Видое Смилевски Бато, каде што Агенцијата за млади и спорт лани сакаше да гради спортска сала.

Жителите од оваа населба велат дека просторот до игралиштето и кино салата, која никогаш не проработела, повеќе од два месеци се поплавени со вода, која достигнала висина од 2 метри. Тие објаснуваат дека набрзо поплавениот дел станал мочуриште, односно дека се појавиле жаби, израснале треви и дека за тоа повеќе пати интервенирале до надлежните во општина Кисела Вода.
"Неколку пати бевме во општина, само ни ветуваа. Арно што им текна да исчистат. Среќа што досега никој не се зарази", велат жителите на Ново Лисиче.

Градоначалникот на општина Кисела Вода Љупчо Димов пред дваесетина дена вети дека веднаш ќе пуштат цистерна од ЈП"Водовод и канализација" да ја извлечат водата, но се до вчера не беше ништо направено. Димов објасни дека не било можно водата да се извади со цистерни, поради што одлучиле црпењето на водата да го извршат со препумпна станица во најблиската шахта од атмосферската канализација. Тој вели дека поплавувањето на салата е резултат на избивање на подземни води, и тврди дека целиот простор од новата железничка станица до улицата Тодор Чангов бил пред поплавување од подземни води.

Граѓаните тешко се одвикнуваат да фрлаат ѓубре на јавна површина

Локалната самоуправа соработува со полицијата, која во ноќните часови ги лови прекршителите

Снежана Калабакова

Скопјани тешко се откажуваат од навиките да фрлаат ѓубре и градежен шут на јавни површини. Како доволно да не ги заплашува ниту новиот Закон за јавна чистота кој предвидува високи казни. Купишта ѓубре може да се најдат речиси во секоја општина. Екопатролите и комуналните општински служби и инспектори го потврдуваат фактот дека се' уште има несовесни граѓани кои фрлаат кај ќе стигнат. Дел од нив биле казнети, но тешко било да се фатат оние кои фрлаат ноќе, кога комуналните инспектори не се на терен, па тие слободно можат да дејствуваат. Затоа локалната самоуправа воспоставува соработка со полицијата, која пак во ноќните часови ги лови прекршителите на законот.

Голем дел од скопските општини веќе ги детектирале дивите депонии и точно знаат колку се и на кои локации се наоѓаат. Од општината Чаир тврдат дека имаат откриено осум диви депонии. До скоро само ги опоменувале неодговорните граѓани, но во наредниов период тие ќе бидат и казнувани. Во Општина Гази Баба од почетоков на годинава на самото место како фрлаат ѓубре на јавна површина биле затекнати и казнети петнаесетмина граѓани.

„Депониите што ги откриле комуналните инспектори, главно, се на периферијата на општината, односно во руралниот дел, особено покрај реката Вардар. Иако на местата каде што ги исчистивме претходно создадените депонии поставувавме табли за забрането фрлање ѓубре и градежен шут, на некои локации тоа повторно се прави“, вели Неделчо Крстевски, портпарол на Општина Гази Баба.

Павле Сарџовски, раководител на комуналното одделение во Општина Бутел тврди дека од донесувањето на Законот за јавна чистота минатата година биле казнети 26 жители за различни видови прекршоци. Од почетокот на годинава досега двајца биле затечени на место како фрлаат градежен шут. За различни видови прекршоци годинава се казнети дванаесетмина, од кои четворица казниле инспекторите и тоа за создавање диви депонии во Радишани, фрлање ѓубре во реката Серава и истурање земја во Визбегово. Сарџовски додава дека имаат добра соработка со полицијата која ги открива оние кои го прават тоа ноќе.

Инспекторите од Општина Центар вчера беа на терен и детектираа вкупно 15 диви депонии.

Со цел да се исчисти животната средина од создадените ѓубришта, голем дел од општините во соработка со комуналните претпријатија подготвуваат пролетни акции.