Нов објект на Комерцијална Банка (Сан Марко)

Се гради осумкатна деловна зграда на плоштадот

Објектот ќе биде со површина за градба од 518 квадрати и максимална висина од 29 метри

Од вчера, дел од тревната површина непосредно до плоштадот „Македонија“ е претворена во градилиште на кое ќе се гради осумкатна деловна зграда. Од рано изутрината се слушаше бучава од булдожери и друга механизација која почна да го раскопува теренот на кој, според важечкиот Детален урбанистички план, е предвидена изградба на објект со комерцијални и деловни намени. Подготовката на парцелата за градба, нејзиното оградување и стационирање на механизацијата започна да се врши уште во минатата недела.

Од Општина Центар вчера информираа дека станува збор за изградба на административно-деловен објект со површина за градба од 518 квадратни метри. Зградата, согласно со ДУП, ќе може да достигне максимална висина од 29 метри, односно ќе може да има приземје, седум ката и потпокрив. Општинарите вчера не беа во можност да кажат кој е инвеститор на објектот. Единствено посочија дека градежната дозвола ја издале пред еден месец. Инаку, парцелата е во приватна сопственост на неколку лица.

„Денеска на градилиштето, согласно со законските прописи, ќе биде поставена информативната табла на која ќе бидат истакнати деталите за објектот, поточно неговиот изглед согласно со проектот, како и информацијата за инвеститорот“, посочија од Општина Центар. (Дс.Т.)