Возен ред

Највероватно основната идеја е за пристигање во Скопје во почеток на работно време и почеток на факултет.

Возот од Битола до Скопје иде за 3:11 тоа би било дека во најдобар случај ќе пристигне во 6:30 време за повеќето кој идат на работа.
Ако тргнува по идејата на Бојан во 7:30 би бил скоро во 11 часот !!??

Од Скопје до Солун и обратно со воз годишно патуваат 10.000 граѓани

Миркица Поповиќ

До Солун, една од најпопуларните бизнис и шопинг дестинации за голем број македонски граѓани, патувањето може да биде задоволство, но и голема авантура. Се' зависи од превозното средство што ќе се избере. Оние, пак, што ќе го изберат старото проверено превозно средство - воз, понекогаш се чувствуваат како да се дел од некој индиски филм.

Со ослободувањето од визниот режим се очекува уште повеќе да се зголеми интересот за патување до нашиот најблизок комерцијален ЕУ-центар. Доколку нашите граѓани немаат желба или можност да патуваат дотаму со сопствено возило, моментно опциите се меѓународните возови што сообраќаат секојдневно и автобусите што патуваат секој понеделник, среда и петок, како и минибусите за шопинг-турите на неколку туристички агенции. Авионска врска со Солун и со Атина нема, а грчкиот авиопревозник „Олимпик ервејс“ неодамна ги откажа и летовите до Белград и обратно.

За граѓаните што имаат грчка виза дополнителен трошок е и вадењето зелен картон за возилото, како и сумата што ја плаќаат за паркирање во центарот на градот. Поради тоа, железничкиот превоз, кој во ЕУ се промовира како ефикасен начин за намалување на сообраќајниот метеж и е едно од омилените превозни средства на граѓаните, реално е поповолна опција. Исто така, треба да се земе предвид дека движењето низ Солун со автобусите на градскиот сообраќај е евтина опција, бидејќи билетите чинат само 50 евроценти, односно 30 денари за едно возење и 2 евра т.е. 120 денари за целодневна карта.

„Едвај чекам да биде укинат визниот режим и моментно сум во процес на вадење биометриски пасош. Сега зависам од сопругот, кој не сака да извади зелен картон за возилото за да појдеме заедно за Солун. Патувањето со воз е најевтино, но возовите се во очајна состојба. Би била пресреќна доколку има побрзи и подобри возови до Солун“, рече една граѓанка.

Солидната транспортна врска со овој град, освен за бизнисмените, домашните и за странските туристи, важна е и за големиот број македонски студенти на тамошните факултети. Патниците што често се на оваа релација се жалат дека во последно време се случува возовите од Скопје да тргнат кон Солун со само два вагона, кои веднаш се преполнуваат.

„Иако имавме билети, неколкупати се туркавме за да влеземе во возот, а слободно место за седење воопшто немаше. Луѓето буквално стоеја еден над друг во ходниците и во меѓупросторот кај вратите. Во целиот метеж некои патниците дури и пушеа. Ситуацијата потсетуваше на возовите во Индија. Не знам дали некој го контролира бројот на патници и местата за седење и стоење во возот“, револтирано коментираат студентка од Солун и момче, кои често патуваат со воз.

Дали постои можност нашите граѓани да добијат брз воз со кој за два часа ќе се пристигне до Солун наместо досегашните пет, од кои еден и пол час се губат за пасошки проверки на македонска и на грчка страна?

Јовица Трајановски, претставник за односи со јавноста на „Македонски железници - Транспорт“ вели дека постојат развојни проекти за осовременување на железничкиот транспорт и воспоставување на побрзи меѓународни врски, меѓутоа се' уште нема конкретни иницијативи за нивна примена. Според Трајановски, моментните транспортни средства со кои располагаат имаат можност за возење со поголеми брзини, но се' уште не е дискутирано за тоа дали и кога би била воспоставена ваква врска со Солун. Сепак, тој смета дека визната либерализација ќе се случи според најавуваното, па има голема побарувачка за ваква линија и би можело да почнат билатерални разговори со грчката железница.

Од „Македонски железници - Транспорт“ сметаат дека и со сегашните возни линии е овозможена погодна дневна и ноќна посета на Солун. Билетот за возовите што сообраќаат двапати во денот, наутро во седум и попладне во пет часот, чини 1.500 денари во два правци, додека младите до 26 години имаат попуст и за нив билетот чини 1.200 денари. Возовите што сообраќаат се транзитни интерсити меѓународни возови, кои се движат на релација Белград - Скопје - Солун и обратно. Повратниот билет може да се искористи два месеци од датумот кога е издаден.

Според статистиките на железницата, на релација Скопје - Солун - Скопје годишно патуваат околу 10.000 граѓани, а во транзит кон или од Белград дополнително минуваат над 30.000 патници.

Во Европската унија активно се работи за пренасочување на стоките и на патниците од патиштата кон алтернативни форми за превоз, кои се подобри за заштита на животната средина, а тука железницата доаѓа на прво место. Кај нас, за жал, железничкиот превоз е со многу проблеми. Како што известуваа медиумите пред неколку години, поради проблеми со железничката линија на одредени места машиновозачите се принудени да ја намалуваат брзината на возовите. Во извештајот на Европската унија годинава се спомнува дека има мал напредок за подобрување на инфраструктурата, но трите милиони евра одредени за првите шест месеци од 2009 година се недоволни за инвестициите во железницата.

Старите возила кои, иако како што тврдат од МЖ, се исправни и безбедни за возење, сепак, во голем дел, според изгледот, се непривлечни за граѓаните. Повеќе од една година, покрај македонските вагони, овој воз има и еден грчки вагон, за кој граѓаните буквално се туркаат за да фатат место. Не можете да ги обвинувате, вагонот е модерен, седиштата се почисти од оние во старите вагони, а има и електрични штекери што се корисни за подобро искористување на петте часа колку што трае патувањето.

Утринскиот меѓународен воз за Солун има и поинаков проблем. Поради задржувања од српска страна, возот во Скопје пристигнува со задоцнување од еден-два часа, со што дополнително се одложува и времето на пристигнување во Солун. Покрај оние што патуваат за Солун, овој воз го користат и граѓаните кои патуваат за Велес, Неготино, Демир Капија и Гевгелија. Некои од нив рекоа дека повеќе им одговара со овој брз воз и згмечени да дојдат до своите градови за два-три часа, отколку со редовните патнички возови да патуваат и по пет до осум часа ако дојде до дефект на возовите.

Утрински весник, 20.11.2009 година

http://www.utrinski.com.mk/?ItemID=B5FFC150FC24824BB9B2F6C036FB0099