Соравиа Ресорт (Олимписко Село)

Елитен станбен кварт за македонскиот „џет сет“

Населба за македонскиот „џет сет“, место за богатите. На падините на Водно ќе биде лоциран елитен станбен кварт во кој секој нема да може да купи стан.

За месец и половина стартува изградбата, локацијата веќе е обележана, градежните материјали се поставени. Постоечките објекти на овој терен, хотелот „Скала“ и познатото Олимписко село ќе бидат урнати.

„Овде ќе бидат изградени апартмани за луѓето од високата класа, луѓе кои имаат високи примања, ќе биде многу ексклузивно, ќе имаме затворен простор со обезбедување, ќе имаме џакузи, сауни, базени, ќе ги продаваме апартманите. Секој може да аплицира за стан, но цената ќе го направи изборот. Овде ќе има апартмани со високи цени и само луѓето од високата класа ќе можат да ги купат“, изјави Питер Рот, директор на „Соравија Груп“ во Македонија.

Вкупната инвестиција тежи 30 милиони евра. На површина од 17.000 квадратни метри ќе се изградат куќи со 150 луксузни апартмани и нов хотел. Инвеститорите не откриваат колку ќе чини квадрат станбена површина, но велат дека интересот е голем.

„Луѓето од високата класа ме прашуваат кога можат да се вселат. Јас им велам да бидат трпеливи, досега ниеден политичар не ме прашал за стан овде, се интересираат само бизнисмени, директори и луѓето од економскиот сектор“, рече Рот.

Инвеститорите имаат обезбедено имотен лист, ја чекаат градежната дозвола, се надеваат дека нема да имаат административни проблеми.

Во овие куќи некогаш престојуваа познати светски спортисти. Денеска Олимпиското село е руинирано, но наскоро се очекува да прерасне во центар, база на македонскиот „џет сет“ и бизнис елита.

Атрактивноста на Водно веќе привлече и голем број други инвеститори. Овде на големо се градат амбасади, станбени објекти, спортски терени.

Но, не е само Водно единствената атрактивна локација. Досега се најавија повеќе вакви елитни проекти на територијата на Скопје, но ниту еден од нив не виде бел ден.

Еден од поновите беше и Сончевиот Град, чија изградба заглави во имотно-правни спорови.