Јавна чистота

високите казни за фрлање отпадоци Ја подобриЈа хигиената

Метлата спасува 50 евра

Новиот Закон за јавна чистота предвидува можност на замена на казната со вршење општокорисна работа, што е прифатено од граѓаните

Се' повеќе граѓаните што го прекршиле Законот за јавната чистота претпочитаат да фатат метла и да чистат отколку да платат 50 евра. Новиот закон предвидува можност на замена на казната со вршење општокорисна работа. Од скопските општини потврдуваат дека поголем дел скопјани што треба да платат глоба бараат да вршат општокорисна работа.

- Се нафатив да работам во паркот „Опатија“ бидејќи немам да платам 50 евра, а и не ми е срам од оваа работа бидејќи ме одмора. Токму овде ме фатија, во Градскиот парк, како фрлам догорче и ме казнија. Метам веќе трет ден, уште еден и ќе ја одработам казната. Забавно ми е и воопшто не е напорно. Ќе ми биде поука во иднина поинаку да се однесувам кон животната средина - вели Б.Р., студент на Филолошкиот факултет. Полицајци, комунални инспектори и редари во улога на комунални инспектори ловат несовесни граѓани што фрлаат догорчиња, хартија или друг отпад на јавна површина, наместо во контејнер или во сад за отпадоци.

- Би вршела општокорисна работа, зошто да не, секако немам можност да платам толкава сума. Јас сум екологист и сум имала можност да чистам паркови. Студирам биологија на Природно-математичкиот факултет. Јас лично го почитувам Законот за јавната чистота и се трудам да влијаам и на останатите граѓани така да се однесуваат - вели Јулијана Бежоска.

ИНСПЕКТОРИТЕ ВО АКЦИЈА

Во изминатите две недели, во Општина Центар за општокорисна работа се пријавија 19 лица. Од нив, 4 лица работат на чистење и на уредување на дворот на Општината, а останатите работат во општинските паркови, поточно на локациите парк „Опатија“ и Урбан парк. Само пет лица ги платиле налозите.

Слично е и во Општина Карпош, каде што за вакви прекршоци досега се изречени 35 казни, од кои само четири се платени.

- За собирањето смет им се плаќа 80 денари од час, а за метење јавни површини 50 денари од час. Тоа значи, за да отплатат казна од 50 евра, треба да одработат 5 до 7 дена за доброто на сите - велат од Општина Карпош. Оттаму објаснуваат дека надзорот го вршат полициски службеници, четири комунални редари и еден комунален инспектор. Во Ѓорче Петров, четворица казнети граѓани ја метат улицата на која живеат и им помагаат на општинските комуналци. Според Момо Николовски, портпарол во Општината, за непочитување на Законот за јавната чистота се изречени 10 казни, од кои осум на физички и две на правни лица.

Општина Кисела Вода досега казни 19-мина за непочитување на Законот за јавната чистота: за фрлање догорчиња, за паркирање возила на растојание помало од 10 метри од контејнер, за продажба на земјоделски и индустриски производи, фрлање хартија на места што не се определени за таа намена, оставање нерегистрирано хаварисано возило, како и за плукање на јавна површина. Според Славица Јовановска, комунален инспектор во Општината, четворица од казнетите граѓани се препратени до Градот, бидејќи се' уште немаат формирано сопствено јавно претпријатие. Од Градот велат дека поради административни пречки се' уште немаат вработено редари. Министерството за животна средина ќе набави и дополнителен број контејнери.

- Бев сведок кога мајка што хранеше дете фрли хартија, а кога ја опоменав, таа ми рече дека тоа не е моја грижа. Треба да бидеме упорни и да чистиме постојано, така ќе проработи чувството на грижа кај граѓаните. Кога шетав по една долга патека во парк во Лондон фрлив догорче, но кога видов дека 300 метри нема никаков отпадок, се вратив и го зедов моето догорче - вели Кирил Ларески.

ДОБРЕДОЈДЕНИ зА КОМУНАЛЦИТЕ

Ако граѓанинот сака да врши општокорисна работа, ги известува инспекторот и полицаецот, по што се упатува во одредено јавно претпријатие, каде што е под надзор. Општокорисната работа може да се изврши и во местото на живеење, независно каде е направен прекршокот. Во рок од еден месец се дава потврда на полицијата дека е платена казната или дека е одработена. Во спротивно, се упатува на суд, каде што казната може да е тројно поголема и не може да се замени со општокорисна работа. Ако се плати во рок од осум дена, казната се намалува за половина.

Од Министерството за транспорт и врски е утврден ценовник за еден час општокорисна работа. Прекршителите се упатуваат во градските јавни претпријатија. - Сите што сакаат да вршат општокорисна работа се добредојдени, бидејќи и така немаме доволно работна сила - вели Југослава Поленак, портпарол во „Комунална хигиена“.

ИНФО-Казнувањето во практиката

За собирање смет се плаќа 80 денари од час, а за метење - 50. За да се отплатат 50 евра, треба да се одработат 4 до 5 дена. Најчести прекршоци: фрлање догорчиња и хартија, паркирање возила покрај контејнер, продажба на земјоделски производи, оставање хаварисано возило, плукање... МВР на 1 октомври напишало 359 казни за само 24 часа во целата Република, од кои 136 биле подготвени на општокорисна работа. Најголемиот дел од прекршоците - 333, се однесуваат на јавни површини, а 26 се пред јавен објект.

Анела Петрова

dnevnik