Вандализам и примитивизам

Не поминаа ниту три месеци откако скулптурата "Девојче", по низа патешествија, конечно се смести во Градски парк, а веќе е целосно демолирана. Испрскана со црн спреј по лицето и со исцртани срамни делови на телото, "Девојчето" деновиве ги шокира скопјани со новиот упропастен изглед.
Децата, кои претходно најмногу се радуваа на скулптурата, играјќи си со неа како да им е другарка, сега уплашени бегаат од неа.
Поцрнетото "Девојче", кое веќе почнало да се лупи, не можеа да го препознаат ниту возрасните кои речиси секој викенд се одмораат во паркот.
Новиот удар за "Девојчето", кое пред да дојде во Градскиот парк, мистериозно исчезна од тротоарот пред пешачкиот премин на "Рекорд", е болен и срамен за граѓаните што со месеци ја бараа изгубената скулптура низ цело Скопје.
"Многу го засакавме 'Девојчето' оти нашите деца му се радуваа како на другарче. Секогаш кога ќе отидевме во Градски парк, прво одевме до таа скулптура и со саати седевме околу неа. Кому му пречеше 'Девојчето', што се дрзна да го уништи.", коментираат граѓаните, запрепастени од девијантното однесување на некои луѓе.
Од Министерството за култура, кое прво ја постави скулптурата во центарот на градот, па потоа ја прошета до Паркот, вчера беа изненадени од информацијата за уништување на "Девојчето".
"Нашите луѓе што ги поставуваат скулптурите и се грижат за нивната состојба ќе ја проверат новата ситуација и ќе видиме што ќе направиме. Во секој случај, ова е израз на културата на граѓаните", вели Анита Јовановска, портпарол во Министерството.