Вандализам и примитивизам

Пак се крадат капаците од шахтите

Само во изминатата недела Општина Кисела Вода заменила десет капаци во Припор

Повторно ги снемува капаците од шахтите на скопските улици. Кражбите се зачестени особено во Кисела Вода, каде што само во минатата недела општинските власти поставиле нови 10 капаци во Припор. Пред две години Владата ја забрани целата трговија со старо железо поради зачестената кражба на капаците од шахтите, а по неколку месеци ја укина забраната.

Жители на улицата 24 во Припор пријавиле дека несовесни граѓани ги крадат капаците од шахтите, поради што улицата не е безбедна за движење. Од Општината потенцираат дека неколку пати се случувале вакви кражби.

- Беа извадени капаците на сите шахти, кои се поставени на растојание од 10 до 15 метри. За да не се доведат во опасност, жителите сами ги покривале отворените шахти со хауби од автомобили. Очигледно е дека капаците повторно завршуваат на отпадите за старо железо, а општината се изложува на непотребни трошоци. Еден капак за шахта чини 5.870 денари - вели Марјан Спасески, портпарол во Општината Кисела Вода.

Тој информира дека сакале шахтите да ги заклучат со синџири, но се откажале од идејата бидејќи несовесните граѓани можеле и нив да ги исечат.

- Очигледно се работи за организирана група, која ги краде и ги продава капаците - вели Спасески.

Општината Кисела Вода апелира до несовесните жители да престанат со крадење на капаците.

Во отпадите каде што вршат откуп на метали велат дека за разлика од порано, откупот на старо железо им е намален тројно и дека дневно во просек собираат од два до четири тони железо. Категорични се дека не примаат капаци од шахти.

- За разлика од порано, кога цената беше 18 денари за килограм, откупот на старото железо сега е многу намален заради намалените откупни цени. Потенкото железо, како што е плехот се откупува по шест денари за килограм, а подебелото од 7,5 до 8 денари за килограм. Не примаме капаци од шахти. На отпадот имаме камери и тие што доаѓаат со капаци, ги враќаме - велат од отпадот „Еко циркон“, на улицата Перо Наков.

И во отпадот за метали „Инос“ велат дека работата им е намалена и до пет пати, но се категорични дека не примаат од забранетите предмети.

- Се придржуваме на списокот и не откупуваме делови од железнички пруги, сообраќајни знаци итн. - вели Васил Гацевски, управител на „Инос“ и претседател на Групацијата за отпадни суровини.

Во Државниот пазарен инспекторат се оградуваат од надлежноста за контролата што се продава на отпадите за старо железо. Истото го сторија и во Министерството за животна средина.

Портпаролот на Секторот за внатрешни работи-Скопје, Лиза Бендевска, вели дека за разлика од минатите години, годинава се забележани помал број кражби на капаци од шахти.

http://www.dnevnik.com.mk/?ItemID=1A23D6AEC5055244ADF56FC9F1C223E2

do koga so vakvi ispadi poarno ke bidat da stavat betonski kapaci