Вандализам и примитивизам

Вандали ги уништуваат прилепските паркови

ПРИЛЕП - Се' уште непознати сторители за прилепската полиција ги уништуваат прилепските паркови. Општината реагира поради евидентирани оштетувања на детските реквизити, на зеленилото и на дрвјата. Вандалите веќе не избираат што, како и каде ќе уништат.

„Оваа појава зачести особено во последниве две-три недели. Пред десетина дена беа уништени и мермерните столбови кај Градскиот саат“, вели градоначалникот Марјан Ристески. Тој ги повикува граѓаните да ги пријават во полиција можните сторители ако биле сведоци на вандализам.

Наспроти ова, од локалната самоуправа ветуваат дека со ист интензитет ќе продолжи уредувањето на јавните површини во сите делови од градот онака како што предвидува програмата за комунално уредување.

„Штетите ќе бидат санирани. Сите барања на граѓаните за изградба на нови паркови ќе се земаат предвид“, ветуваат општинарите.

Ова не е прв случај да се уништуваат јавните добра. Минатата година, само ден откако беше предадена во употреба чешмата врз која е поставен споменикот на мариовскиот итрец Итар Пејо, се украдени месинговите славини. Интересно е тоа што чешмата е поставена во строгиот центар на градот, во старата чаршија, на многу фреквентна локација. Пред речиси три години, преку ноќ исчезнаа седум бронзени бисти од Алејата на народните херои на Могилата на непобедените.

Полицијата не може да ги открие сторителите, а речиси секое катче од градот што се уредува за кусо време е уништено.

Според информациите, лани јавното претпријатие „Комуналец“ уредило околу 5.000 квадратни метри запуштена јавна површина. На иницијатива на граѓани, на повеќе локации се изградени повеќе од 30 маалски паркови каде што децата играат, а возрасните се одмораат. (Мн.Т.)

Се крадат и сообраќајни знаци

Украдени се неодамна поставените сообраќајни знаци на новоизградениот булевар Македонски војски во општината Ѓорче Петров, иако улицата се' уште не е официјално пуштена во употреба.

- Јавното претпријатие „Улици и патишта“ по наш налог постави пет сообраќајни знаци и ја обележа хоризонталната сигнализација на булеварот, но пред неколку дена е забележано дека три од нив се украдени - изјавуваат од Градот.

Граѓаните што се движат во тој дел од градот кажуваат дека на булеварот има метеж и со тоа е загрозена нивната сигурност во сообраќајот. Надлежните од Градот уверуваат дека се работи на целосното оспособување на булеварот.

- На булеварот во моментов се поставува улично осветлување и се прават тротоарите. Екипи на претпријатието ќе ја обноват сообраќајната сигнализација на булеварот, но апелираме до граѓаните да не ја оштетуваат поставената патна сигнализација.

„Македонски војски“ треба да го олесни сообраќајниот метеж на крстосницата што ги спојува булеварот Партизански одреди, 4 јули и улицата Лука Геров.