Образовни институции (општо)

Учениците од „Ј.А. Коменски“ второто полугодие ќе го започнат во новата зграда

Градоначалникот Петров е убеден дека новиот објект ќе биде изграден до почетокот на февруари

До крајот на идната недела комплетно ќе заврши изградбата на покривната конструкција

„Учениците во второ полугодие ќе почнат да учат во новото училиште. Тоа е повеќе од сигурно, со оглед на темпото со кое се гради и состојбите на терен“, вели градоначалникот на Карпош Андреј Петров и посочува дека единствено временските услови можат да го сменат планот за предавање во употреба на новата училишна зграда. Тој информираше дека до крајот на идната недела комплетно ќе биде затворена покривната конструкција. Истовремено се работи на поставување на прозорците, столаријата, а во тек е и длетување и молерисување на училниците. Во новиот објект неодамна се изведени и инсталациите, електрика, водовод, мрежата за телефонија и компјутери, како и канализацијата и хидрантската мрежа. Од понеделник, пак, ќе почнат да се изведуваат надворешните приклучоци за канализација и вода.

„Иако изградбата на училиштето ја започнавме сами, откако се случи пожарот, во проектот се вклучи и централната власт. Новата училишна зграда ќе биде доказ дека со добра соработка помеѓу централната и локалната власт без оглед на политичката припадност, можна е успешна реализација на проекти за доброто на граѓаните“, потенцира Петров.

Новиот објект на „Јан Амос Коменски“ започна со изградба лани летото, како самостоен проект на Општина Карпош, која за таа намена издвои 1,2 милиони евра. По измината една година од градежните активности, работите на терен запреа поради финансиски проблеми на Општината. Кусо време откако објектот продолжи да се гради, постојните училници на осмолетката кои функционираа во бараки, два пати беа опожарени, при што изгореа поголем дел од работните простории. Од тие причини во изградбата на новиот училиштен објект се вклучи и Владата, обезбедувајќи 400.000 евра со цел градежните активности да се убрзаат. За потребите на наставата во училишниот двор се поставија монтажни контејнери.

Според проектот, новото училиште ќе има две нивоа, приземје и еден кат и ќе се протега на површина од 4.100 квадратни метри. (Дс.Т.)