Градоначалникот на Општина Аеродром, Ивица Коневски, заедно со в.д. генералниот секретар на Фудбалската федерација на Македонија, Игор Климпер, директорот на Агенцијата за млади и спорт, Драган Ѓурчевски и претседателот на Советот на Општина Аеродром, Виктор Камиловски, денеска, 21.8.2009 година (петок), во просториите на Општината одржаа заедничка прес-конференција, на која го промовираа проектот за изградба на нов тренинг центар покрај кејот на реката Вардар во општина Аеродром.

Станува збор за скорешен почеток на изградба на голем спортски центар покрај кејот на реката Вардар, во кој се вклучени 5 фудбалски игралишта со трибини, од кои 4 фудбалски игралишта со по една трибина и еден мини стадион со две трибини со капацитет од 3.000 гледачи, за што Општина Аеродром интензивно работи на донесување на неопходните детални урбанистички планови.

„Проектот за спортско-рекреативен центар што денес го презентираме претставува продолжение на комплексот спортски објекти почнувајќи од спортската сала „Јане Сандански, со чија изградба граѓаните не само што ќе имаат можност да ги следат големите спортски настани, туку ќе имаат можност самите да спортуваат и да се рекреираат во нив во слободното време“, изјави градоначалникот Коневски.

Освен што проектот овозможува да се зголеми спортската активност и да се зачува и подобри здравјето на жителите на Аеродром, како општина со млада популација, која ќе може непречено да спортува на терените, директорот на АМС, Ѓурчевски изрази уверување дека оттука ќе излезат врвни спортисти и фудбалери.

„Отсекогаш сме стоеле и ќе стоиме зад вакви големи проекти кои ќе придонесат за развој на спортот, во овој случај на фудбалот во Република Македонија. Игралиштата се со професионални димензии 120 на 80 метри, монтажни трибини и комплетни услови за тренинг и натпревари. Тука ќе биде и куќата на фудбалот и уште едно поголемо фудбалско игралиште“, изјави Ѓурчевски.

„Реализацијата на проектот за изградба на тренинг центар и управна зграда на ФФМ ќе придонесе за развој на фудбалот, како во Република Македонија, така и на територијата на Скопје и секако во Општината Аеродром“, изјави генералниот секретар на ФФМ, Игор Климпер, додавајќи дека Федерацијата ќе биде задоволна доколку овие игралишта бидат искористени 365 дена во годината, како за кампови на сите национални тимови на Македонија во сите категории така и за граѓаните на Општина Аеродром, особено младата популација.

На крајот на прес-конференцијата тој им подари дресови на своите соговорници, по што сите заедно со новинарските екипи го посетија теренот на кој ќе се гради големиот спортски тренинг центар, а кој во моментов е нефункционален.