Жителите против изградбата на згради во Сопиште

среда, 14 јули 2010, 18:13

Во Скопје се нацртани фабрики на 256 хектари

Сé уште има празни локации за инвестициски градби и во градското подрачје, во Аеродром, Расадник, Бутел и во делови од Карпош, а индустријата главно треба да се постави околу градот

Фабрики, станбени комплекси и понекоја болница, трговски центар, хотел и облакодер. Сето ова треба да го добие главниот град ако се реализираат деталните урбанистички планови што ги имаат или ги изработуваат неговите општини. Со нив се предвидува во градот да се изградат индустриски капацитети на површина од околу 256 хектари, од кои повеќе од половина би се наоѓале во зоната покрај северната обиколница кај клучката во селото Стопански Двор. Сé уште има празни локации за инвестициски градби и во градското подрачје, во Аеродром, Расадник, Бутел и во делови од Карпош.

Индустријата главно треба да се постави околу градот. Кај Стопански Двор е предвидена зона со површина од 137 хектари, но таму сега нема инфраструктура, па тешко дека наскоро ќе се обезбедат инвеститори за градење. И во близината на Ново Село има предвидено две индустриски зони, како и една покрај улицата Шарпланинска во Ѓорче Петров. Нови погони треба да се направат покрај обиколниот автопат и во делот што поминува низ општината Бутел. Ќе продолжи и индустријализацијата на Момин Поток и на Злокуќани, каде што општината Карпош предвидува 58 градежни маркички за разни капацитети на вкупна површина од околу 15 хектари.

Општината Аеродром има изработено и каталог за инвестиции, со кој детално се опишува каде може да се гради. Со него се предвидуваат два хотела покрај Вардар во близината на спортската сала „Јане Сандански“, простор што веќе се обликува како голема спортско-рекреативна зона. Голем трговски и бизнис-центар може да се гради и во близината на „Тобако 2“, а на подрачјето на оваа општина се наоѓаат и градежните маркички за три облакодери со висина до 500 метри, односно до 125 ката, за кои по неколку неуспешни јавни наддавања конечно се најде турски инвеститор.

Освен „Газит глоуб“ во „Алумина“ и „Фешн груп“ во Карпош 3, другите стопански градби во општината Карпош ќе се сместат во веќе постојната зона во Момин Поток и во новите во Злокуќани. Во Момин Поток биле предвидени 47 градежни маркички, додека во двата блока во Злокуќани, според урбанистичките планови, се предвидуваат поголеми објекти, па затоа во едниот има три, а во другиот осум локации за градба.

Сличен развој се очекува и на подрачјето на Бутел, каде што треба да се направи нова индустриска зона покрај обиколницата, но и да се пополнат празнините во постојната во Визбегово, покрај патот кон граничниот премин Блаце. Во Ѓорче Петров само местото Јурија, каде што се наоѓа болницата „Свети Лазар“, овозможува поголеми неиндустриски градби, каде што треба да има уште една здравствена установа, како и повеќе станбени згради.

Расадникот во Кисела Вода, кој сега се нарекува и населба Расадник, иако е градилиште повеќе од една деценија, сепак е далеку од комплетно изграден. Таму треба да се прави уште и факултет, две училишта, домови за ученици, здравствен објект, како и спортско-рекреативен центар со хотели, мотели, трговски центри, ресторани и со забавен парк. Урбанизацијата ќе го зафати и рекреативниот центар Три круши над Драчево, кој се планира да се зголеми неколкукратно. Овие урбанистички планови сé уште се подготвуваат и се во завршна фаза, па откако ќе се усвојат ќе се знаат и точните површини на градежните маркички предвидени со нив.

ЗГРАДИ, ХОТЕЛИ, ТРГОВСКИ ЦЕНТРИ, ДЕЛОВНИ ОБЈЕКТИ...


Место                                                    Градба                                        Површина

Алумина                                       деловно-трговски центар              35.300 квадрати
Реонски центар Карпош 3         трговски центар                             19.660 квадрати
Булевар Србија                           облакодери                                    21.544 квадрати
Аеродром, покрај Вардар           хотел                                              12.972 квадрати
Алумина                                       станбен комплекс                            5.696 квадрати
Аеродром, кај ТЦ „Скопјанка“    бизнис-центар                                 5.240 квадрати
Аеродром, покрај Вардар           хотел                                                5.175 квадрати
Скопје Север                              станбено-деловни објекти              2.000 квадрати

http://www.novamakedonija.com.mk/NewsDetal.asp?vest=52510918202&id=9&setIzdanie=21990