Катни гаражи врз Јужен булевар

Oколу Старата железничка станица ќе се догради објект за исклучиво комерцијална намена, кој ќе ја има истата фасада како сегашната

Доградба на објектот на Старата железничка станица за комерцијални намени, две нови катни гаражи над Јужен булевар, кружен тек спроти зградата „Нова Македонија“ и две ротонди предвидува предлог-детаљниот урбанистички план за локалитетот Стара железничка станица. Изготвувачот „Тајфа план“ вчера го презентира урбанистичкиот документ пред јавноста, кој е дел од Програмата на Владата за усвојување на приоритетни планови.

Презентерката на планот, Лидија Андреевска, вели имала задача да направи приоритетен предлог-план, во кој приоритетот се однесува на Јужен булевар, односно булеварот Македонија.

- Најважно е да се спомене дека централно, низ средината на планот, минува булеварот Македонија. Тоа е експресен булевар, по кој ќе биде дозволена брзина повеќе од 60 километри на час. Уште во Основниот план од 1985 година е предвидено булеварот Македонија да биде вкопан пет метри во земја. Се нарекува Јужен зашто треба да го премости сообраќајот од исток до запад, кон излезите од градот. Овој булевар, вака вкопан, треба да го растовари сообраќајот и е од исклучително значење за градот - вели Андереевска.

Надземно над булеварот, како што вели Андреевска, поради тоа што земјиштето е многу скапо, се предвидуваат и нови градби.

- Над булеварот се предвидени две катни гаражи од кои едната има капацитет од 860, а другата од 990 возила, со висина приземје плус пет ката. Овие две гаражи ќе ги примаат сите возила што ќе сообраќаат во овој дел - вели Андреевска.

Таа објаснува дека со планот е направено посебно сообраќајно решение, кое е усвоено од Градот и од Министерството за транспорт и врски.

- Во западниот дел, во близина на поранешниот Дом на печат, ќе се слеваат улиците Водњанска, Железничка и булеварите Митрополит Теодосиј Голаганов, Мито Хаџивасилев Јасмин и Климент Охридски. За нивното вкрстување ќе се изгради голем кружен тек со пет коловозни ленти. Се очекува движењето на моторните возила да биде многу брзо и нема да има застој во сообраќајот. Слични, но помали, две ротонди ќе се градат кај сегашниот подвозник во близина на „Симпо“, кој ќе биде урнат. Овие ротонди ќе го прифатат сообраќајот од улиците Бухаќка , Кочо Рачин, Мито Хаџивасилев Јасмин, Огњан Прица и уште една новопроектирана улица - вели планерката.

За овој план е направена конзерваторска основа за објектот на Старата железничка станица, кој е заштитен од втор степен. Предвидено е околу објектот на Старата железничка станица да се догради објект за исклучиво комерцијална намена, кој ќе ја има истата фасада како сегашната.

На местото на Цветен пазар е предвиден комерцијален објект и пазар. Поради новите сообраќајни решенија е предвидено да се затвори новата сервисна уличка кај „Рамстор“, која ги поврзува Јужниот булевар и „Јасмин“. На дел од паркингот на „Рамстор“ треба да се направат две нови сервисни улици.