Дивоградбите пречка за новопланираните булевари

Рушење на два-три отсто од постојните објекти за да се изгради добра сообраќајна мрежа е практика во сите држави, смета Андреј Токарев, професор на Архитектонскиот факултет

За растоварување на сообраќајот треба да се срушат голем број куќи

Големиот број дивоградби изградени на трасите каде што според новиот генерален урбанистички план се предвидени булевари, може да претставуваат голем проблем. Речиси сите градоначалници и стручни служби на општините бараат да се поместат трасите на некои булевари, кои треба да поминуваат во нивните општини. Причината се веќе изградените куќи. Во општината Аеродром им пречат булеварите Видое Смилевски-Бато и Борис Кидрич, додека во Карпош, пак, бараат ново решение за јужната обиколница.

- Трасата на булеварот Видое Смилевски-Бато треба да се помести затоа што на нејзино место веќе се изградени куќи. Исто така, бараме и да се повлече трасата на булеварот Борис Кидрич, затоа што таму веќе има изградени објекти, а има и граѓани што бараат земјиштето да им се врати со денационализација. Сакаме некако да им излеземе во пресрет на жителите - вели Ивица Коневски, градоначалник на Аеродром.

Со сличен проблем се соочува и Стевче Јакимовски, градоначалникот на Карпош. Тој бара да се најде друго решение за јужната обиколница и предлага сообраќајницата да се изгради до половина, односно кај улицата Димитар Митрев, а понатаму да се бара некое друго решение и друга траса.

- Веќе 50 години ги лажеме луѓето што живеат на тој потег. Не можеме да им издадеме градежна дозвола затоа што таму требаше да се гради сообраќајницата, па затоа им дозволувавме на диво да градат и од таа причина не би било фер да ги срушиме - смета Јакимовски.

Гази Баба е една од скопските општини што има најмногу дивоградби. Нејзиниот градоначалник Тони Трајковски вели дека на нивната територија има близу 16 илјада барања за легализација, меѓу кои и за натстрешници и тераси.

- Дивоградбите може да ни претставуваат проблем, затоа што голем дел се на трасите на новопланираните булевари. Затоа и побаравме булеварот Хрватска да се пренамени во улица и да се направи друга траса за булеварот што треба да поминува низ Инџиково. Некои од овие булевари се предвидени и во претходните планови, но токму поради веќе изградениот простор, тие не можеле да се изградат - објаснува Трајковски.

Според градоначалникот Коце Трајановски, ако не се реализираат новите булеварски решенија, скопјани ќе се задушат во сообраќај. Тој смета дека, ако се предвидат булевари на места каде што не можат да се изградат, џабе ќе се прави нов генерален план, затоа што во реалност нема да биде функционален.

- На територијата на градот има околу 100 илјади дивоградби. Ако има можност на седница на совет ќе донесеме одлука некои од објектите да се легализираат, но не и оние што се изградени на трасите каде што треба да поминуваат клучните сообраќајници. Затоа, булеварите треба да ги сфатиме како светци - нагласува Трајановски.

Тој им порача на скопските градоначалници, откако ќе се донесе новиот генерален урбанистички план, да ги пазат главните сообраќајници и да не се дозволи ниту најмал камен да се стави на нив.

Андреј Токарев, професор на Архитектонскиот факултет, вели дека, ако еден град нема добро развиена сообраќајна мрежа, исто како да нема ништо.

- Рушење на два-три отсто од постојните објекти за да се изгради добра сообраќајна мрежа е практика во сите држави. Само ќе мора да се најде начин сопствениците на објектите да се обесштетат. Мора да сфатиме дека јавниот интерес е секогаш најважен, а изградбата на булевари е една од најважните работи за еден град да има проток - објаснува професорот Токарев.