Скопски сообраќај (општо)

ШТО „УВИДЕ“ АРСОВСКА НА ДИМО ХАЏИ ДИМОВ? Мал дожд, улицата и подрумите повторно поплавени!

По седуммесечна реконструкција на улицата Димо Хаџи Димов од вчера се раскопуваат и тротоарите, а граѓаните револтирано коментираат дека и по не толку интензивниот дожд улицата повторно беше полна со вода. Поради тоа прашуваат што увиде градоначалничката на Скопје, Данела Арсовска која пред два дена вршеше увид на градежните работи, токму на оваа улица.

Новата атмосферска канализација што беше причина за раскопување на улицата Димо Хаџи Димов во скопска Кисела Вода и „скапиот“ асфалт за којшто се чекаше потопло време, не го издржаа првиот дожд, а дел од сопствениците на куќи повторно се бореа со поплавените подруми.

– Тамам се израдувавме дека повеќе нема да слушаме багери, барем на овој дел од улицата, кога заврна и пак поплава! И еве, од вчера повторно багери. Сега ни ги раскопуваат тротоарите кои веќе беа готови. Што ли се прави овој пат – прашува чичко Благоја.

Скопјанката Билјана, која живее на оваа улица, револтирано вели дека малку им била прашината што ја дишеле 7 месеци од копањето на улицата, местењето и преместувањето на шахтите.

– Еве втор ден како ги раскопуваат тротоарите. Не ни е јасно што се случува? Ние како граѓани бараме одговори од градот, зошто улицата беше пола со вода и зошто сега се копаат тротоарите – вели Билјана.



Градоначалничката на Град Скопје пред два дена изврши увид во завршните работи на улицата Димо Хаџи Димов каде се реконструира коловозот со што се овозможува зголемена безбедност за жителите на овој потег, но и за прв пат по целата должина и поврзаните краци се изгради атмосферска канализација. Во моментот на вториот дел од трасата се реконструира и водоводната мрежа.

„По секое невреме на оваа траса детектирани се поплави, а со сериозна инвестиција и изградбата на атмосферската канализација се отстрануваат овие недостатоци во интерес на граѓаните, со цел да се превенираат во иднина несакани последици предизвикани од невреме“ – информираа од Град Скопје по посетата на Арсовска на оваа улица, која важи за сообраќајна артерија за населбата Кисела Вода.

Претходно Плусинфо пишуваше токму за оваа улица бидејќи загрижените граѓани прашуваа што се случува со реконструкцијата на улицата Димо Хаџи Димов, иако скопската градоначалничка Арсовска им вети дека ќе го реши деценискиот проблем. Жители од оваа улица ни рекоа дека интервенциите започнале во септември лани, а работите требало да бидат завршени во октомври, како и што пишува на информативната табла на која како инвеститор е наведен Град Скопје.



– Ја раскопаа улицата еднаш од едната страна, па таа страна ја покрија со песок за да се копа другата страна. Откако двете страни ги ископаа и ги покрија со песок, на големо изненадување на граѓаните, улицата повторно беше раскопана. На прашање до работниците кога планираат да завршат, одговорот што го добивавме беше „ехеее има време до декември“. По второто копање, улицата беше повторно затрупана со песок за повторно да ја раскопаат на одредени делови – ни кажаа тогаш жителите на оваа улица.

Како одговор на нашите прашања, градските власти нѐ информираа дека на посочената улица се извршувале неколку зафати, па поради тоа се одложил рокот за завршување на проектот, а и временските услови не биле на нивна страна за нанесување на завршниот слој асфалт.

– На улицата Димо Хаџи Димов не се работеше само на реконструкција на коловозот туку и на комплетна изведба на атмосферска канализација и нов водовод, при што се завршени и сите водоводни приклучоци кон околните објекти кои беа многу на број. Следи асфалтирање на улицата и тоа предвиден е завршен слој асфалт СМА за чие вградување, согласно техничките стандарди, потребно е суво, неврнежливо време, и температурата на воздухот и на тлото над 15 степени Целзиусови во текот на денот – рекоа од Град Скопје за Плусинфо.

За целосната реконструкција на улицата Димо Хаџи Димов, како што изјави градоначалничката Арсовска во септември лани, Градот ќе издвои 41 милион денари.

Жителите на оваа улица повторно се прашуваат за што точно биле потрошени овие пари, бидејќи Арсовска вети ќе им го реши деценискиот проблем, но при најмал дожд улицата Димо Хаџи Димов повторно беше поплавена. Тие стравуваат што ќе се случи со улицата и нивните домови при интензивен дожд, дали повторно ќе мораат со кофи да ја вадат водата од своите домови и подруми?

https://plusinfo.mk/shto-uvide-arsovska-na-dimo-ha-i-dimov-mal-dozhd-ulicata-i-podrumite-povtorno-poplaveni/

бул.Киро Глигоров раскрсница кај Бриколаж(од твитер)

Завршени 60% од реконструкцијата на улицата „Ленинова“!
На улицата се поставува нова атмосферска и водоводна канализација, нови тротоари и еколошки ефикасно ЛЕД улично осветлување, а ќе се воведе и резидентно паркирање.



https://www.facebook.com/OpstinaCentar

ГРАД СКОПЈЕ ПОЧНА ДА МЕНУВА АСФАЛТ НА РУЗВЕЛТОВА БЕЗ ДА НАЈАВИ ДЕКА ДЕЛ ОД УЛИЦАТА Е ЗАТВОРЕН



Град Скопје денеска почна со градежни работи за реконструкција на улицата Рузвелтова. Градежна механизација од неколку камиони од утрово работи на корнење на стариот асфалт на потегот од крстосницата со булеварот Илинден до крстосницата со улицата Орце Николов. Заради градежните работи на овој потег затворена е една коловозна лента.

Од Град Скопје вчера не најавија ниту денеска информираа дека се почнува со реновирање на оваа улица и дека ќе биде воведен посебен режим на сообраќај. Информации нема на веб страната на Град Скопје, ниту на фејсбук профилите на Градот и на градоначалничката Данела Арсовска.

Град Скопје во моментов во центарот на градот ја реновира и улицата Теодосиј Гологанов кај Клуб на пратеници. Градежните работи на оваа делница почнаа во 22 септември и тогаш градоначалничката Арсовска кажа дека ќе биде готова за пет месеци. Рокот е поминат, а улицата уште не е пуштена и дел од неа е затворен за сообраќај. На овој потег истовремено и Општина Центар работи на реновирање на улицата Ленинова, со што секојдневно се создава метеж.

https://sdk.mk/index.php/dopisna-mrezha/grad-skopje-pochna-da-menuva-asfalt-na-ruzveltova-bez-da-najavi-deka-del-od-ulitsata-e-zatvoren/

Се гради кружен тек на влезот во општината Илинден



Започна изградбата на кружен тек на влезот во општината Илинден. Како што информираат општинските власти, станува збор за нов кружен тек на важна крстосница, кој ги опфаќа главните улици ,,2“, ,,8“, „9“ и новопроектирана улица ,,10“ на влезот во Илинден.
– Со изградбата на овој кружен тек ќе се растовари сообраќајниот метеж во овој фреквентен дел од општината, а наедно ќе се зголеми безбедноста на сите учесници во сообраќајот. Во рамките на проектот е планирана изградба на кружен тек со партерно и хортикултурно уредување, како и јавно осветлување на просторот – истакна градоначалникот Александар Георгиевски.
Како што нагласи тој, улиците и кружниот тек ќе бидат сообраќајно хоризонтално и вертикално обележани во согласност со сообраќајниот проект за траен режим на сообраќај.

https://novamakedonija.com.mk/makedonija/skopje/se-gradi-kruzhen-tek-na-vlezot-vo-opshtinata-ilinden/

Град Скопје ќе пробива улица преку дворовите на 16 куќи во Бутел, жителите утре на протест ќе бараат да се помести улицата Анета Стојковска Жителите од 16 куќи лоцирани на улицата Хо Ши Мин, од број 425 до 439 во населбата Бутел 1, во рок од три дена треба да се откажат од дел од своите дворови кои се државна сопственост, но кои тие ги користат речиси 60 години, затоа што Градот планира да ја пробива улицата Боца Иванова, која треба да минува точно пред нивните куќи. Целта е улицата од кружниот тек во Бутел да се протега до булеварот Христијан Тодоровски Карпош, како што е зацртано во Генералниот урбанистички план 2012-2022 година. Соопштението до жителите стигнало наместо одговор на нивната петиција доставена до градоначалничката Данела Арсовска, во која тие бараат трасата за предвидената улица да се помести само за неколку метри за да не им ги одземе дворовите, кои тие ги користат цел живот.      Согласно програмата за уредување на градежното земјиште за 2023 година, Град Скопје започна со активности за реализација на улицата Боца Иванова, КО Бутел. Со цел непречено изведување на градежните работи и реализација на Генералниот урбанистички план на Град Скопје, ве известуваме дека е потребно во рок од три дена од приемот на известувањето да го ослободите узурпираното земјиште во сопственост на Република Северна Македонија – стои во известувањето од Град Скопје испратено до секој од потписниците на петицијата. Жителите се особено револтирани поради тоа што Градот ги нарекува узурпатори на земјиште.      Узурпатори? Узурпираме? Ние со години се грижиме за тоа земјиште. Просторот пред нас беше полн со ѓубре, беше отпад, ние со наша инвестиција го исчистивме и направивме парк. Дел од дворовите кои се државно земјиште ги користиме од 1964 година, речиси 60 години. Побаравме да се помести трасата, а наместо тоа стигна ова известување. Но ние нема да отстапиме. Единствени сме, ќе протестираме и ќе се обидеме да издејствуваме да се помести трасата за улицата – вели Ваљон Ибраими, еден од засегнатите граѓани. Жителите, кои за денеска во 10 часот најавија протест на локацијата каде треба да се пробива улицата, се сомневаат дека не се дозволува поместување на улицата затоа што на просторот веднаш од другата страна на замислената улица, кој е државно земјиште, според ДУП се предвидени маркички за изградба на седум згради, па доколку им се удоволи и се премести улицата, тоа би значело одземање од предвидениот простор за изградба на згради. Затоа тие денеска доставија петиција и до градоначалникот на Општина Бутел, Дарко Костовски, кој во предизборната кампања за локалните избори им ветил дека нема да дозволи на овој простор да се изградат згради. Тие сега бараат Костовски да го исполни своето ветување и на првата наредна седница да поднесе иницијатива за промена на актуелниот ДУП за овој дел, со која би се избришале маркичките за седумте згради. Покрај тоа, жителите бараат од Костовски да инсистира градските власти да ја сменат трасата и да ја поместат улицата за да не се загрозат нивните дворови. Особено се револтирани од градоначалничката Арсовска, која и покрај тоа што барале, не ги прима на средба на која би поразговарале за проблемот со кој се соочуваат, иако постојано тврди дека работи во интерес на граѓаните.      Данела вели дека не му припаѓа на ВМРО-ДПМНЕ, не му припаѓа на СДСМ, дека не припаѓа на ниедна партија. Од ова излегува дека не му припаѓа ни на народот, не се грижи за проблемите на граѓаните, не сака ниту да разговара со нас. Тогаш кому припаѓа и за што се интересира, за седумте згради? – вели Ибраими. Од Општина Бутел до овој момент нема одговор на прашањето како ќе постапи градоначалникот Костовски и дали ќе го исполни ветувањето дадено на неговите сограѓани. Промената на ДУП-от, донесен на крајот на мандатот на поранешниот градоначалник Петре Латиновски, може да го направи општинскиот Совет, каде мнозинството го има ВМРО – ДПМНЕ, партијата чиј член е и актуелниот градоначалник. Доколку постои желба, можно е да се избришат маркички за згради од државно земјиште особено што не станува збор за изградба на објекти од јавен интерес туку за станбени згради. Градоначалничката Арсовска го кажа своето и речиси е неверојатно дека ќе отстапи од намерата. Граѓаните пак со протест ќе се борат за остварување на своите барања и како што велат, нема да дозволат поради изградба на згради, улица да им минува пред нивните прозорци. На потег е градоначалникот Костовски, од кој жителите очекуват помош. https://www.slobodenpecat.mk/grad-skopje-kje-probiva-ulica-preku-dvorovite-na-16-kukji-vo-butel-zhitelite-utre-na-protest-kje-baraat-da-se-pomesti-ulicata/

Одлична вест за сите што живеат во селата Бразда, Глуво, Бањани и Чучер Сандево, а мораат да одат преку Бутел. Е сега, уште да го исчистат и ѓубрето покрај патот и под обиколницата... ама, па, да не барам премногу

Започнуваме со целосна реконструкција на улицата Александар Урдаревски која е под надлежност на Град Скопје
Се реконструира коловозот на улицата на површина од 9600 м2 и должина од 1270 метри, изработка на банкини од тампонски материјал и нови рабници,





https://www.facebook.com/CityofSkopje

УЛИЦАТА КОЗАРА ВО СКОПСКИ КАПИШТЕЦ ОДНОВО ЌЕ СЕ АСФАЛТИРА ОТИ АСФАЛТОТ ПАК ИСПУКА

Улицата Козара во скопски Капиштец повторно ќе се асфалтира, бидејќи е несоодветно изведена. Ова е трето асфалтирање на улицата која изминативе неколку години е постојано раскопана поради големиот број нови згради кои се градат.

Изведувачот, фирмата „Гама градба“, најпрво летоска при поставување на првиот слој асфалт ги асфалтираше и шахтите. По реакцијата на жителите, го корнеше асфалтот. Потоа, во ноември беше поставен втор слој долж целата улица. Но, само две недели по асфалтирањето фирмата по налог на Општината почна да го корне асфалтот оти улицата беше несоодветно изведена.

Сега Козара пак е со дупки и распукан асфалт и изведувачот одново ќе треба да ја прави.

„Општина Центар неколку пати досега информираше дека поради асфалтирање во лоши временски услови и ниски температури дојде до оштетување на асфалтот, кој ќе биде заменет. За грешките настанати при изведбата, изведувачот сам си ги сноси трошоците и нема да му биде исплатено сѐ додека улицата не биде изведена согласно сите постоечки стандарди. Со граѓаните одржани се неколку средби, на кои побаравме разбирање за состојбата, информирани се за пречките во изведбата, дискутирано е за проблемот и истиот ќе се реши во најкус можен рок“, велат од Општина Центар.

Казни за фирмата изведувач нема. Тендерот за реконструкција на Козара чини 150.000 евра.

И покрај неквалитетната изведба, Општина Центар склучи договор со истата фирма „Гама градба“ и за реконструкција на улицата Ленинова во вредност од 670.000 евра.

https://sdk.mk/index.php/dopisna-mrezha/ulitsata-kozara-vo-skopski-kapishtets-odnovo-ke-se-asfaltira-oti-asfaltot-pak-ispuka/

Незнам каде точно да прашам, па еве ќе прашам овде.

Пробувам да пристапам кон ГУП - от на Град Скопје, поточно GIS системот / порталот, но веќе извесен период нешто не ми дава.

Одам овде:
https://skopje.gov.mk/mk/gup-na-gradot/
па после кликам на тоа последното каде што пишува ГУП, но кога ќе отворам ми се појавува ова:

la multi ani gif

Тоа е на страната:
https://gisportal.skopje.gov.mk/gup/

Пробано на доста различни пребарувачи, и секаде ист проблем. На почетокот ми даваше да одберам некакви си 3 сертификати на сајтот, но со ниеден од нив не успеав да ја вчитам страната, т.е. GIS порталот. Знае некој некое чаре? Дали и кај вас е ист проблемот?

Извинете за off-topic, неможев да најдам друга по - соодветна тема за ова. Сакав да погледнам како се планирани некои од улиците, но веќе подолг период неможам да го направам тоа