Плажи и бродови на Вардар

На градската плажа ќе се ладиме и со палми

На градската плажа што ќе се гради на кејот на Вардар ќе има тропски амбиент. Освен шанкови и лежалки за релаксирање, ќе има и високи живи палми засадени во саксии, официјално потврдија од Градот. Тие пред две недели, кога ја промовираа плажата, демантираа дека покрај Вардар ќе садат и палми, иако дрвјата беа претставени на анимацијата за изгледот на проектот. Песочната плажа веќе се гради на Кејот, а треба да биде завршена до крајот на месецот.

Имајќи ја предвид микроклимата во Скопје, надлежните од Градот објаснија дека палмите нема да бидат директно во почвата, туку ќе бидат донесени во големи саксии и поставени на целиот потег крај реката. Велат дека тоа не е нивна идеја, туку на авторите на проектот, кој беше избран за најдобар на распишаниот конкурс.

- На градската плажа ќе бидат поставени петнаесетина палми во висина од два до три метри. Тие се предвидени во идејното решение на избраните автори Бекир Адеми и Бетим Зекири - изјавија од Одделението за односи со јавноста.

Како што е познато, замислата за градска плажа на градоначалникот Коце Трајановски не е таа да биде место за капење, поради загаденоста на Вардар, туку простор за забава и сончање, со локации за кафулиња.

Плажата под Луна-паркот е првата плажа што ќе се гради на Вардар. Втората е планирано да биде од другата страна на реката, до Камениот мост, во делот под Народниот театар. Трајановски најави дека оваа плажа ќе се гради по завршување на градежните работи во тој реон.

Плажата кај Луна-парк ќе зафаќа површина од 1.775 квадратни метри. Таму ќе се постави урбана опрема од монтажен карактер, и тоа 20 маси, 80 столчиња и 80 лежалки. За изградбата Градот одвои 6,3 милиони денари, а изведувач е фирмата „Алкон“.

Јорданка Ивановска