Кучиња скитници

Уличните мрши завршуваат во „Дрисла“, а милениците по паркови

Поради недостиг од гробишта за миленици, сопствениците ги закопуваат умрените животни каде што ќе стасаат, а потоа ги откопуваат мачки и кучиња и ги разнесуваат на места на кои играат деца

Мршите од јавните сообраќајници ги собира „Комунална хигиена“, и завршуваат во депонијата „Дрисла“, а мртвите тела на домашните миленици насекаде во градот. Во недостиг од гробишта за миленици, сопствениците ги закопуваат каде што ќе стасаат, во паркови, на Водно или, пак, завиткани во кеси, ги фрлаат во контејнерите. На тој начин опасноста од зарази е поголема, затоа што мршите потоа ги откопуваат мачки и кучиња и ги разнесуваат на места каде што играат деца.

Но, и покрај ваквите факти, локација на гробишта за домашни животни с` уште-нема. Никој не се фаќа во костец за реализација на вакво нешто, иако тоа е карактеристично за многу европски метрополи.

- Имав куче Лаки кое го згази автомобил. Јас и мојата ќерка го закопавме на една чистинка веднаш до нашата куќа бидејќи немавме друг избор. Одозгора ставивме камења за да не го откопаат други животни, раскажува скопјанецот Киро Петров.

За идејата за оформување локација за погребување миленици се зборува со години. Таква иницијатива имаше и минатиот градоначалник Трифун Костовски, но с` остана само на зборови. Сегашните градски власти велат дека гробишта за домашни миленичиња треба да има, но рекоа дека законските можности ги ограничуваат. Воедно не располагаат со сопствено земјиште, а и немаат надлежност за вршење на таа дејност.

- Оваа идеја треба дополнително да биде регулирана во законите за да може да се иницира - изјавија од Одделението за односи со јавност.

И додека за мртвите домашни миленици решение с` уште нема, за уличните мрши кои пцовисуваат на улица - има. Тие се закопуваат во депонијата „Дрисла“, поточно во јама. Наскоро ќе се гради нова, според современи стандарди, затоа што капацитетот на постојната е истрошен.

- За да се спречат зарази, и досега мртвите тела од животни се одлагаа во јама, во рамките на санитарната депонија, но сегашната ќе биде поголема, велат од Градот.

Во новата јама, освен мрши од мачки, кучиња, кои се подигаат од скопските улици и паркови, ќе се закопуваат умрените коњи. Градските власти веќе распишаа оглас за јавна набавка на најповолна понуда за градежните работи, како дел од нивните комунални обврски. Пцовисаните животни, објаснуваат, како и досега ќе ги собира јавното претпријатие „Комунална хигиена“.

Според податоците, во јануари годинава, од улиците на Скопје се собрани 27 умрени животни, во февруари 32, а во март 38 мрши.

Анела Петрова

Дежурен телефон за подигање умрени животни

Внимавајте, агресивни кучиња напаѓаат на улица „Македонија“

Надлежните институции се оградуваат, граѓаните нека се спасуваат како умеат

Сања Наумовска


Глутницата кучиња што живеат во паркот пред Домот на армијата, во неделата вечер, само за половина час нападна двајца, а едниот од нив е странски турист. Кучињата, непредизвикани од ништо, со лаење се втрчуваа меѓу луѓето на улицата „Македонија“, која е преполна и со деца, а во еден момент влегоа и во едно од кафулињата. Петте огромни кучиња беа обележани со жолт патент на увото, доказ дека биле третирани во градскиот стационар „Вардариште“.

Зошто агресивните кучиња повторно ги вратиле на улиците, се прашуваа вознемирените скопјани што беа излезени на централното шеталиште. Очигледно е дека кучињата се третирани од беснило и од други заразни болести, но тоа не ги спречува да бидат агресивни кон луѓето, особено кога се во група. Граѓаните реагираа дека и по толку години интензивни третмани и кастрирање, сепак, бројот на кучињата-скитници незначително се намалува. Од друга страна, пак, евидентно е дека стануваат се' поагресивни и се непријателски расположени кон луѓето.

„Ништо нема да ми значи фактот дека кучето не е болно ако ме касне мене или детето“, коментираше една повозрасна скопјанка, заштитувајќи си го внучето од растрчаните и разбеснети кучиња.

Од Градот Скопје велат дека нивната надлежност почнува и завршува во стационарот „Вардариште“ каде што се должни да спроведат вакцинирање, кастрирање и обележување на кучињата. Заловувањето го прави јавното претпријатие „Комунална хигиена“, кое има обврска ако кучињата се мирни и здрави да ги врати на истото место од каде што се земени.

„Кучињата кои ги заловуваме ги прегледуваат ветеринарите во ’Вардариште‘ и тие одлучуваат каков третман ќе добијат. Ако се здрави и ако не се агресивни, ги враќаме на местото каде што се заловени. Тука завршуваат нашите ингеренции на кои сме обврзани со законите и со правилниците“, вели директорот на „Комунална хигиена“, Ракип Дочи.

На прашањето што ако третираните кучиња прават вакви проблеми, двете институции ги собираат рамениците. Нападите од многу организации за заштита на животните ги прави претпазливи, па како слеп за стап се држат до законот и до одлуките за хуман третман донесени од Советот на Скопје, со што, практично, ги оставаат граѓаните сами да се снаоѓаат во опасните ситуации. Ако некој биде каснато од куче-скитник, тој самиот ќе треба да оди на лекар, да го најде кучето што го каснало за да се утврди дали е бесно и на крај да си ги сноси трошоците за лекувањето. Стресот, коментираат скопјани, е бесплатен.