Подвозниците небезбедни и нечисти

Секојдневно го користам подвозникот кај „Континентал“, бидејќи тоа е единствен начин да се премине булеварот на оваа локација. Но навечер не практикувам да минувам низ него, малку е мрачно и небезбедно, изјави студентката Анета Арионовска

Предвидена е изградба на четири нови подземни премини со јавно приватно партнерство, преминот кај АСУЦ

Нехигиената и несигурноста се причините поради кои скопјани ги избегнуваат подземните пешачки премини во градот. Подвозникот кај АСУЦ во Автокоманда е во катастрофална состојба, претворен во јавно веце, па никој не се осудува да премине преку него и комплетно е исфрлен од употреба. Другите два се во подобра состојба, подвозникот кај ТЦ „Скопјанка“ постојано се одржува, но поголем дел дуќанчиња се затворени и воопшто не се користат. Пешаците повеќе се одлучуваат да поминуваат над преминот, преку зеленилото во жардиниерата, отколку да се спуштат во подвозникот и да го преминат булеварот Јане Сандански.

Во целосна функција е единствено пешачкиот подвозник кај хотелот „Континентал“. Во него сите објекти се издадени, а и пешаците задолжително го користат, бидејќи е оневозможен премин преку булеварот Александар Македонски. Овој подвозник е најфреквентен и максимално искористен.

- Секојдневно го користам подвозникот кај „Континентал“, бидејќи тоа е единствен начин да се премине булеварот на оваа локација. Но навечер не практикувам да минувам низ него, малку е мрачно и небезбедно - изјави студентка Анета Арионовска.

Подзвозниците ги одржува ЈП „Комунална хигиена“ и, покрај сите напори и интервенции, не успеала да го доведе во употреба подвозникот во Автокоманда, кај АСУЦ.

- Постојано се прави неред, депонија, се крадат инсталацијата и осветлувањето. Додека другите два се во подобра состојба - изјави Неделчо Крстевски, портпарол на градот.

Екипи од ЈП „Комунална хигиена“ двапати неделно рачно ги мијат подвозниците.

- Немаме проблеми со подвозникот кај „Континентал“ и кај ТЦ „Скопјанка“, но подвозникот кај АСУЦ е претворен во јавно веце, и покрај тоа што го чистиме постојано, тој не се користи како пешачки мост и комплетно е исфрлен од употреба, а и нема осветлување - изјавија од ЈП „Комунална хигиена“.

За подолгорочна одржливост и функционалност на подземните премини градот изврши избор на консултант што ќе работи на студија на концесионирање, со што по пат на јавно приватно партнерство, ќе се постигне целта да се изградат подземни премини што ќе бидат максимално искористени. Предвидена е изградба на четири подземни премини, и тоа на булеварот Александар Македонски, кај „Алкалоид“, на улицата Македонија и на булеварот Јане Сандански кај ТЦ „Бисер“.

- Градот склучи договор, по спроведената јавна набавка, за изработка на студија за јавно приватно партнерство за изградба на четири подземни пешачки. По изработката на студијата ќе се знаат сите детали дали и како ќе се реализираат проектите - додаде Крстевски.

Надземниот премин на Бит-пазар ги надмина сите рокови

Преминот остана непокриен, а Општината се' уште води постапка за избор на фирма

Монтирани лифтовите на натпатникот

Општината Чаир го реши проблемот со електричниот приклучок на лифтовите на надземниот премин на Бит-пазар и тие веќе се во функција. Официјално ќе бидат пуштени со свеченото предавање во употреба на натпатникот што ќе се случи штом ќе се подобрат временските услови, велат од општината Чаир.

Арбен Речица, одговорен за реализацијата на проектот, објасни дека поради зимските услови, останале незавршени уште 10 отсто од металната конструкција на објектот на која треба да биде поставен плексигласот, со кој ќе се формира цилиндричниот покривен дел на преминот. Поставено е и внатрешното осветлување, па граѓаните веќе извесно време го користат преминот. Надземниот премин чини 11 милиони денари, а со него 10 години ќе стопанисува „Акцент медија“. (Сн.К.)