Плажи и бродови на Вардар

Завчера Вардар го достигна најнискиот водостој за годинава од 6,02 кубни метри во секунда

Пречистителната станица во Трубарево ќе чини 95 млн. евра

Загадувањето на Вардар, доколку не се реализира овој проект, до 2020 година ќе се зголеми за три пати

Се предвидува по течението на Вардар да се изградат четири пречистителни станици

Изградбата на пречистителната станица за отпадни води во Трубарево и дневното управување со неа би чинело околу 95 милиони евра, превидува Студијата за управување со отпадни води во Скопје. Документот, кој се изработува со донација од јапонската влада, а го изготвува тим на јапонската Агенција за меѓународна соработка - Џајка, предвидува изградба на четири пречистителни станици во Скопје - сите по течението на Вардар: Централната ќе биде во Трубарево, а другите три во Сарај, Ѓорче Петров и во Драчево. Објектот во Сарај би чинел 13,5 милиони евра, во Ѓорче Петров 400 илјади евра, а во Драчево 3,5 милиони евра. Според податоците во студијата, за изградба на станицата во Трубарево се потребни 35 хектари слободно земјиште, од кое 15 хектари ќе се намени за лоцирање на сушилниците. За јапонскиот тим просторот не е проблем, бидејќи веќе е обезбеден и внесен во урбанистичките планови. За потребите на пречистителната станица треба да се изградат и два колектора, по должината на левиот и десниот брег на Вардар, почнувајќи од мостот „Близнак“.

„Вардар е најголем реципиент на отпадна вода во Скопје и околината поради што и оваа студија е од огромно значење. Познат е фактот дека само 17 проценти од општините во Македонија имаат адекватен третман на отпадните води“, истакна Миле Јакимовски од Управата за животна средина, на вчерашната презентација на студијата.

Јапонските експерти изработката на документот ќе ја завршат за една година, кога ќе започне втората фаза на аплицирање во фондовите за обезбедување на потребните финансии за изградбата. Според предвидувањата, доколку не се реализира овој проект до 2020 година, загадувањето на Вардар ќе се зголеми за три пати. (С.Н.)

Скопје ќе добие градска плажа. Деновиве градските власти се подготвуваат да распишат јавен повик за избор на фирма која ќе го работи проектот за заживување на левиот брег на реката Вардар. Според нив, до почетокот на ова лето треба да се уредат двете предвидени локации и тоа на потегот од Камениот мост до Младинскиот културен центар и спроти клубот Кајак-кану во Градскиот парк. Идејните решенија за заживување на запуштениот дел од кејот лани ги изработија студенти од Архитектонскиот факултет на работилницата „Медиумот како простор“, а потоа градската управа ги направи главните проекти. - Во центарот на градот ќе има еден вид песочна плажа, на која ќе се постават лежалки и тушеви. Тука скопјани ќе можат да се релаксираат и разладат во текот на топлите денови. Предвидено е во овој дел од кејот, кој ќе се уреди хортикултурно, да се продаваат книги и слични содржини. Покрај тоа, ќе има и низа спортско рекреативни и забавни содржини - објаснуваат од градската управа. Оттаму велат дека за почеток најважно ќе биде да се направат скали и рампи за хендикепирани лица и специјални возила со кои ќе се обезбеди пристап до долниот дел од кејот. Граѓаните велат дека конечно треба да се преземе нешто и да почне да се уредува и левата страна на Вардар. - Со години го гледаме другиот брег обраснат со трева и полн со ѓубре. Треба конечно да се промени тој валкан и запуштен изглед. Каков впечаток им остава на луѓето што го посетуваат градот, навистина не знам. Затоа очекувам што поскоро да се направи нешто за да заживее и овој дел - вели една скопјанка. Проектот за заживување на левиот брег на Вардар предвидува плажа и лежалки за сонце, на чиешто место во зима ќе има лизгалиште, кафулиња кои градските власти би ги издавале под кирија и кафе-книжарница. Ќе се постават и игралишта за кошарка, места за забава на децата и зелени површини за вежбање, а ќе има и сцена за културни манифестации. Потегот од центарот на градот до хотелот „Александар палас“ е осмислен како спортска зона со пешачки и патеки за трчање, ролери и за велосипеди, а и во овој дел ќе има кафулиња. На височинката спроти клубот Кајак-кану ќе се уреди простор за одмор на посетителите. Една од површините што градските власти планираат да ја средат е во непосредна близина на новоизградената црква „Раѓање на Пресвета Богородица“, каде што сега се уредува дворниот дел. Градските власти се уште не соопштуваат колку ќе чини реализацијата на проектот за заживување на левиот брег на Вардар.

1. Кога има утакмица

2. За сите посетители на градската плажа.