Јавен автобуски превоз (општо)

Со гума од дотраени се крпат дупките на зглобните автобуси

Ребрестите гумени спојки на некои возила имаат дупки колку цели прозорци

Старите зглобни автобуси на Јавното сообраќајно претпријатие во оваа зима се како фрижидери за длабоко замрзнување. Ребрестите гумени спојки на некои возила се искинати дури колку цели прозорци. Студениот воздух однадвор понекогаш пишти како виулица кога возилото се движи со малку поголема брзина, па на патниците им се чини дека постудено им е во автобусот додека се возат отколку кога ќе излезат од него. Од Јавното сообраќајно претпријатие признаваат дека голем дел од зглобните автобуси се со искинати гумени ѕидови на средината и засега велат само можат да ги крпат со гума што ја сечат од старите и неупотребливи возила. Објаснуваат дека нема начин како да се поправат состојбите, освен да ги исфрлат од употреба кога ќе пристигнат новите зглобни автобуси. Од ЈСП велат дека првите четиризглобни автобуси на украински „Лаз“ ги очекуваат да стасаат во ноември годинава.

„Секој ден кога ќе налетаме на зглобен автобус, мрзнеме до училиште. Не се влегува во автобус од студ, а од провевот бегаме во предниот или во задниот дел од возилото. Кога имаме време и не доцниме на часови, не се качуваме во зглобните, подобро да чекаме на постојка отколку да не' дува ветер во автобус“, вели средношколецот Бобан Велковски.

Од ЈСП „Скопје“ информираат дека моментално располагаат со 88 зглобни автобуси и сите секојдневно се во сообраќај.

„Зглобните автобуси најчесто ги пуштаме на подолгите и на пофреквентните линии, како што се ’2’, ’5’,’15’,’50’ и ’57’. Возилата имаат просечна старост од 19 години, а најстариот автобус има 32 години. Иако се многу стари и студени поради искинатите гуми, никој досега не ни се пожалил на нашата веб-страница. За жал, замена за таа гума нема и можеме само да сечеме од старите и да ги лепиме хармониките на оние што се во возна состојба“, вели Билјана Јанкуловска, шеф на кабинет на директорот на ЈСП. (Сн.К.)

Бунарот ЈСП пак ќе голтне еден милион евра

Градската власт годинава, како и во 2009 и 2010, на ЈСП ќе му префрли 70 милиони денари за крпење на финансиските дупки за плаќање материјали, гориво, резервни делови, гуми, регистрација, технички прегледи

Повторно со еден милион евра субвенции, градската власт ќе ги покрива загубите и ќе го крепи јавното сообраќајно претпријатие „Скопје“. Парите, и годинава ќе му бидат исплатени на ЈСП од Буџетот на Градот. Сепак, оваа сума не е конечна, туку од досегашните искуства при субвенционирање на сите јавни претпријатија, доколку во текот на годината се јави нова потреба, не е исклучено Градот да интервенира со нова инјекција, со цел спас на ЈСП од колапс.

Објаснувањето за ваква финансиска помош, како што се вели во Предлог-одлуката, е со цел на зачувување на постојното ниво на цената на превозот и покривање на ред трошоци. Според статистиката на ова јавно претпријатие, најголем дел од превезените патници се врз основа на бенефицирани претплатни билети и тоа за студенти, ученици, пензионери, корисници на годишни билети.

- Средствата се за строго наменско покривање на трошоците на работење, за покривање на разликата меѓу економската и реалната цена на превозот, а со приоритет за намирување на обврските спрема доверителите на суровини, материјали и услуги неопходни за извршување на дејноста, горива, мазива, резервни делови, гуми, регистрација, технички прегледи - се вели во Предлог-одлуката што ќе се најде на дневен ред на наредната седница на Совет.

Субвенции на ЈСП градската власт му доделува веќе трета година. И секојпат образложението е исто. Дека на овој начин ќе се зголеми продуктивноста на претпријатието, финансиски ќе се консолидира и ќе му се подобри ликвидноста, с` со цел да бележи минимални загуби од работењето. Сепак, и покрај ова објаснување, субвенциите последниве три години горе-долу се речиси непроменети: во 2008 година ЈСП доби 140 милиони денари, 80 милиони денари во 2009, и 60 милиони денари лани. Во контекст на профитот што го остварува ова претпријатие, а не му стигнува да ги покрие загубите, интересно да се напомене е дека речиси половина од Буџетот оди само на плати, а вкупно вработени во ЈСП има 1.280 луѓе.

На следната седница на Совет на Град Скопје, освен предлогот за субвенции, на дневен ред ќе се најде и предлогот за воведување нова автобуска линија „21-а“, која ќе сообраќа на трасата Транспортен центар-Бардовци.

Таа се воведува на барање од жителите, но и голем број вработени во новоизградените индустриски, културни и медицински објекти во овој дел од Скопје.