За најстроги прекршоци се
сметаат носење оружје, фрлање хра­на, гласно зборување меѓу себе и на мобилен телефон, а многу битна об­вр­ска на патниците е да бидат љубезни меѓу себе и да се насмевнуваат

По кодекс за однесување на возачите, ЈСП "Скопје" објави и кодекс за пат­ни­ци­те. Правилникот за културата во автобус е закачен на веб стра­ни­ца­та на Јавното претпријатие и него можат да го прелистаат сите што се во­зат со градски.
За да нема кавги во автобус, патниците имаат шанса да прочитаат како тре­ба да се однесуваат при качување и симнување на станица, како да се фа­тат за држачите и ред други обврски.
За најстроги прекршоци се сметаат носење оружје, фрлање храна, глас­но зборување меѓу себе и на мобилен телефон, удирање по вратите, чкр­та­ње по седиштата.
По­жел­но е секој да биде љубезен и да му се насмевнува на патникот до не­го, а особено е битно да им се ослободува место за седење на бремени же­ни, постари лица, на луѓе со посебни потреби, како и да не се разговара со во­за­чот.
До­кол­ку некој има незгода во автобус и сака да се пожали до директорот, тре­ба да добие одговор во рок од 15 дена.
Од ЈСП "Скопје" кажуваат дека се задоволни од односот на патниците, по об­ја­ву­ва­ње­то на кодексот. "Пра­вил­ни­кот се чита многу, и во последните неколку месеци немаме ниту ед­на поплака од патник за незгода во автобус", велат од ЈСП.

http://www.vest.com.mk/?ItemID=95FC9FE1539FB6459C83FB7E2F3D4FC3

Околу 200 автобуси на ЈСП се за старо железо

Снежана Калабакова

Секое утро 270 автобуси на ЈСП „Скопје“ излегуваат по градските улици за да ги опслужат граѓаните што користат градски превоз. Од претпријатието не кријат дека од оваа бројка меѓу 10 и 20 возила не стигаат до крајните дестинации. Причината е позната, возилата остануваат во дефект. Поради нивната старост, исто толкав број автобуси и доцнат на постојките. Од 270 возила, само 84 автобуси на фабриката МАН произведени 1996/1997 година се функционални и можат да се возат уште неколку години. Сите други, штом ќе пристигнат новите украински автобуси, ќе завршат во отпадите како старо железо.

На скопјани, кои секојдневно ги користат услугите на градскиот превоз, совршено им е јасно дека автобусите се стари. Тие мака мачат навреме да стигнат до одредиштето, а чекањето по постојките им е секојдневје. Најсвеж е примерот со патниците, кои со градски автобус наместо до Катлановска Бања, стигнале само до населбата Маџари. Оттаму морале да платат такси за да стигнат на закажаните третмани.

Од друга страна, пак, непријатно е возењето во автобуси чии врати не дихтуваат, па дува провев од сите заглавени прозорчиња. Во лето скопјани се задушуваат во градските автобуси, а во зима мрзнат. Од ЈСП велат за неколку години оваа слика ќе стане минато, бидејќи по пристигнувањето на планираните 286 нови автобуси, ќе биде обновен речиси целиот возен парк.

„Штом ќе стигнат првите украински автобуси, голем дел од старите ќе ги расходуваме и ќе завршат како старо железо. Расходувањето ќе се врши според одредена правна процедура со донесување одлуки. Во возниот парк ќе останат само 84 автобуси на МАН, за кои редовно и по потреба набавуваме резервни делови“, вели Мишо Николов, генерален директор на ЈСП „Скопје“.

Делегација на претпријатието и на Министерството за транспорт и врски околу 15 септември ќе замине во Украина за да направи последна проверка до каде е производството на првата пратка нови автобуси што треба да дојдат во Скопје. Според договорот, треба да бидат испорачани 11 нови возила, но тие најнапред ќе треба да поминат на типската хомологација што ќе се врши во Германија. Од ЈСП велат дека не знаат временски колку таа ќе трае, но веднаш откако автобусите ќе добијат сертификати ќе стигнат во Македонија.

Рада И. Маневска

По објавениот оглас за продажба на целиот недвижен имот на фабриката за производство на автобуси „Санос“, проценет на 26,2 милиони евра, поради активирани две хипотеки на кредити од Стопанска банка - Битола, вчера се огласи и менаџментот.
Менаџментот тврди дека фабриката во овој момент нема услови за работа и затоа решиле прво производството да го стават во мирување, а потоа да го дислоцираат во една од земјите со брзорастечки економии.
- Обврските кон Стопанска банка - Битола по основа на кредити за производство наменето за странскиот пазар што се наоѓа во производствената хала, во вкупен износ од 2,3 милиони евра и неколку месечни затезни камати и трошоци во износ од околу 400.000 евра, ќе се покријат со продажба на дел од имотот што не е функционален за производството, а е многу атрактивен за други дејности – изјави Виолета Терзиоска, финансиски директор.
Според неа, во сегашниот момент за нив е непрофитабилно да се довршат почнатите автобуси, кои биле наменети за домашниот пазар.
- Илузорно е да се очекува домашните купувачи да набават нови автобуси со мотор според стандардите Евро 4 и Евро 5 какви што се произведуваат во „Санос“, кога со закон во Македонија е дозволен увоз на употребувани автобуси со стандард Евро 1 – вели Терзиоска.
Менаџментот забележува што се дозволи единствената јавна набавка на нови автобуси во изминативе 15 години да им се додели на непроверени странски понудувачи од Украина и од Кина во однос на нивните европски хомологации.
- Во услови кога не постои стимулирање на превозниците од јавниот превоз на патници за набавка на нови транспортни средства и подобрување на условите за превоз на патниците во Македонија, кога не постојат субвенции за извоз на домашниот производ на странски пазари и кога не постои заштитна царина за увоз на нови автобуси
од странство, фабриката не може успешно да работи – велат од компанијата.
Сопствениците тврдат дека фабриката „Санос“ и покрај тоа не е пропадната, ниту е на пат да пропадне.
- Фабриката „Санос“ од Скопје има договор за продажба на лиценца и на искуство и во најскоро време ќе биде дислоцирана, односно ќе продолжи да произведува автобуси во една од земјите со брзорастечки економии, каде што и условите за развој на вакво сложено репрезентативно производство
се погодни. Едноставно, приватниот капитал никаде во светот не може да си дозволи
да мирува долго време чекајќи шанса за работа, како што е во овој случај, и мора да пронајде излез и успешно и профитабилно да работи таму каде што има услови за тоа - тврди Терзиоска.

Новите украински автобуси со стар систем за наплата

Пластичните картички се' уште го чекаат крајот на тендерот за смарт-тикетинг

Сања Наумовска

Првите 11 украински автобуси на ЈСП, кои на скопските улици ќе излезат во септември, нема да ги дочека нов систем за наплата со пластични картички. Во новите автобуси ќе важат старите хартиени картички, бидејќи тендерот за смарт-тикентинг се' уште не е завршен. Комисијата на Градот Скопје уште ги разгледува понудите на петте фирми што се јавија на тендерот што беше распишан пролетта. Конечна одлука не е донесена, а се очекува евалуацијата да трае до крајот на август. Доколку се' тече без проблеми и во законски зацртаните рокови, новиот систем на наплата во автобусите на ЈСП може да се очекува најрано за една година, а можеби и повеќе.

Главниот услов при избор на фирмата е цената за набавување и одржување на системот за наплата, како и квалитетот и гаранцијата. Фирмата што ќе биде избрана ќе има рок за имплементација од 210 дена од потпишувањето на договорот.

Новите картички ќе се купуваат еднаш и потоа ќе се надополнуваат со одредена сума, систем на припејд, во кое било тобако или маркет. Во автобусите ќе бидат поставени уреди со кои ќе се читаат овие картички и на тој начин ќе се плаќа возењето, велат во Градот. На овој начин ќе се намалат турканиците при влез во автобус, а и возачите нема да мораат да работат со пари и со картички. Картичките ќе можат да се дополнат со различна сума на кредит во секое време, во билетарниците, а подоцна и во пошироката трговска мрежа. Функционирањето на новиот систем на наплата ќе се тестира определен период во кој ќе важат и старите хартиени картички. Во меѓувреме, ќе се спроведе и кампања за информирање на граѓаните како да ги користат смарт-картичките и каде да ги купуваат.

Според плановите на градските власти, истовремено со картичките во автобусите на ЈСП ќе се монтираат и уреди за следење на движењето на возилата, преку кои од контролен центар ќе се врши увид кој автобус каде се наоѓа и дали вози во рамките на возниот ред. Овој систем е неопходен предуслов за да профункционираат и информативните табли што неодамна ги постави ЈСП на неколку автобуски станици низ градот. На нив сега можат да се видат информации за пристигнувањето само на автобусите со број „2“ и „5“. Во иднина, со имплементација на системот, на станиците во секој момент ќе има информација за колку време ќе пристигне кој било автобус.

http://www.utrinski.com.mk/?ItemID=3F35170956F9704C8BA01DE54083F23D

Нови автобуси во градскиот превоз

  Градскиот превоз во Куманово од минатиот месец е збогатен со 10 современи автобуси. Нови возила на претпријатието „Оли травел„, секојдневно се обраќаат на постоечките линии во населбите „Карпош„, „Зелен Рид„, „Гоце Делчев„, „Железничка станица„, Горно и Долно Којнаре.

Се работи за еколошки, ниско-подни возила, кои имаат и лифт за инвалидки колички. Овие автобуси ќе придонесат да се подобри квалитетот на превозот и сообраќајот, но и животната средина, бидејќи се работи за еколошки возила - вели Оливер Стефановски, генерален директор во „Оли-травел„.

 На почетокот на учебната година ова превозно претпријатие ќе ангажира лица од агенција за обезбедување, кои ќе се грижат за безбедноста на патниците.

Ние претежно превезуваме ученици до училиштата и затоа сакаме да обезбедиме целосна сигурност на нашите патници и нивните родители. Децата  треба да се чувствуваат пријатно, без да се плашат дека ќе бидат провоцирани или нападнати од хулигани - вели Стефановски.

И останатите автопревозни претпријатиа: „Јоцо-турс„ и „Штуз„, работат на модернизирање на возниот парк и од есен ќе пуштат во сообраќај двесетина нови автобуси.Но сопстевниците се жалат дека нелојалната конкуренција и дивите превозници во градот заработуваат на нивeн грб.

Има над 200 диви таксисти во градот кои превезуваат патници за автобуска карта. Тие ни се директна конкуренција, бидејќи поминуваат пред автобусите и ги собираат патниците, а ние возиме празни. Не плаќаат ништо на државата, а користат се што создало општеството. Ги амортизираат патиштата, создаваат сообраќаен хаос со старите и небезбедни  автомобили и комбиња, но никој не ги казнува- нагласува Стефановски.

Превозниците бараат од надлежните институции и полицијата да превземе построги санкции за прекршителите на законот и да воведе ред во градскиот превоз.