Јавен автобуски превоз (општо)

Пцости, навреди, гласна музика се само мал дел од постапките на патниците што возачите на градските автобуси, наскоро, без да писнат, ќе мора да ги трпат додека возат. Стокмени во костуми, со широка насмевка на лицето шоферите треба да го пречекаат секој што ќе се качи во автобус. Дали некој ќе одлучи да го опцуе или пак ќе го навреди, дали ќе сака или ќе одбие да му плати билет, е сосема небитно за возачот, бидејќи тој во секој случај мора да им посака добредојде на сите во автобусот.
Уште што ли сè треба да прифатат возачите додека се на работно место, ќе пишува во кодексот на однесување што специјално за нив деновиве се подготвува во јавното сообраќајно претпријатие.
"Поради честите реакции на граѓаните на недоличен однос на возачите
одлучивме да изработиме правилник за однесување на нашите вработени. Покрај тоа што нема да смеат да се расправаат со патниците, во иднина на возачите ќе им бидат ускратени и многу други работи кои сега редовно ги практикуваат, како на пример, да држат цигара в рака додека возат и да зборуваат на мобилен телефон", најавуваат од ЈСП.
За да не биде работата фушерајски направена, ЈСП наскоро планира да организира обука за возачите на која ќе научат како практично би требало да се однесуваат.
Возачите ќе бидат под лупа на внатрешната контрола на претпријатието, која против сите кои ќе згрешат ќе презема дисциплински мерки.
По 62 години постоење на претпријатието, ова е прв Кодекс на однесување на возачите.
Сега постои само кодекс за патници, кој за разлика од возачкиот е многу лабав и попустлив.