Авиосообраќај (статистики)

ЗА НОВОГОДИШНИОТ И БОЖИКНИОТ ШПИЦ НА СКОПСКИОТ АЕРОДРОМ

Гастабајтерите не долетаа од страв од кризата

Глобалната финансиска криза се повеќе го зема данокот во прометот на патници во авиосообраќајот кој е во опаѓање. Ова ни го поврдија и од скопскиот аеродром Александар Велики, од каде не информираа дека оваа зима во периодот од 20 декември 2008 до 7 јануари 2009, биле превезени најмалку патници во последниве години - 26.700.
- Ова е последица на позабавениот тренд во авиосообракајот на глобално ниво во последните неколку месеци, а е предизвикан од глобалната економска криза - коментираат од аеродромот Александар Велики.

Во изминативе години, во зимскиот период најмногу се патуваше во периодот меѓу католичкиот и православниот Божиќ, кога луѓето ги користеа празниците да отпатуваат некаде или да се видат со своите роднини и пријатели. Бројките кажуваат дека овој пат, притиснати од кризата, нашите гастабајтери ги одложуваат патувањата за подобри времиња. Најмногу патници пристигнале од традиционалните Швајцарија, Германија и Италија на директните линии, но и како трансферни патници преку хабовите Виена, Љубљана, Загреб, Будимпешта и Прага. Директни специјални чартер летови за Новата година имало многу малку.
- Фреквенцијата на патници на Александар Велики за време на божиќниот и новогодишниот шпиц вообичаено се зголемува во просек за околу 10 до 15 проценти. За разлика од летниот шпиц, кога во периодот јуни-септември фреквенцијата се зголемува просечно за 55 до 60 проценти. Сепак, во зимски услови луѓето потешко се одлучуваа да патуваат - истакнуваат аеродромските власти.

Во споредба со последните две години, најдобра година во однос на бројките за божиќниот и новогодишниот шпиц, била минатата година. Во периодот од 20 декември 2007 до 7 јануари 2008, биле превезени 31.400 патници, а во истиот период претходната 2006/2007 година биле превезени 28.000 патници.

И покрај забавениот тренд во последно време, аеродромот Александар Велики има пораст на бројот на патници за цела 2008 година за 4,1 проценти во однос на претходната година.
Од домашниот авиопревозник МАТ се пожалија дека ги чувствуваат последиците од светската економска криза преку намалување на бројот на патници. Како пример, од МАТ ја посочуваат дестинацијата Цирих кон која, од Скопје единствено тие летаат.
- Досега не се случило да имаме дневно и по педесетина патници помалку на летовите кон Цирих. Деловните патувања се повеќе се намалуваат, а ги нема ниту гастабајтерите кои порано ни ги полнеа авионите - велат од МАТ.