Спомен куќа на Мајка Тереза

За само три недели од свеченото отворање на 30 јануари, годинава, музејот посветен на Блажената го посетија околу 12.000 посетители, што е бројка еднаква на годишниот просек на публика во музеите во државава

Деветгодишната Теодора заедно со својот дедо вчерашното неделно претпладне го помина во Спомен-домот Мајка Тереза, кој неодамна беше отворен во центарот на Скопје на улицата "Македонија". Со ширум отворени очи го голташе секој збор на кустосот, којашто кротко и сликовито ја раскажуваше приказната за животниот пат на Блажената.
- Дедо ми ми раскажуваше многу за Мајка Тереза. Дека таа е мајка на сите луѓе во светот и дека им помагала на сите болни деца. Таа работела без пари и има добиено многу награди - ни рече Теодора додека го пишуваше своето име во книгата на впечатоци.

За само еден час низ Спомен-домот прошетаа уште десетина посетители и многумина од нив со кустосите разговараа за интересни детали од архитектурата и животот во Скопје, во периодот пред Втората светска војна. Изложените етнолошки предмети, предметите кои ги поседувала најпознатата Скопјанка, исто така предизвикуваа големо внимание и интерес. Нашата домаќинка, директорката Рената Здравковска, ни раскажа дека ова место се претвора во вистинска туристичка атракција.
- Од моментот на отворањето, музејот предизвика огромен интерес, а посетителите многу емотивно реагираат на презентираните артефакти. За само три недели од свеченото отворање на 30 јануари, годинава, Спомен-домот посветен на Блажената го посетија околу 12.000 посетители, што е бројка еднаква на годишниот просек на публика во музеите во државава. Притоа треба да се има предвид дека во музејот може да се разгледа само спомен-собата посветена на животот и делото на Мајка Тереза, а останатите два дела - меморијалната капела и мултимедијалниот центар за одржување на едукативни проекти се во фаза на финализирање - вели Здравковска.

Таа додава дека вратите на Спомен-домот се отворени секој работен ден од 10 до 20 часот, а во сабота и недела до 15 часот. Влезот е слободен, а посетителите ги пречекуваат тројца кустоси кои зборуваат на течен англиски, италијански, шпански, албански и турски јазик.
- Македонија е единствената држава која има изградено музеј за Мајка Тереза. Единствено во Калкута има нејзини документи и фотографии кои се изложени во посебна соба - ни потврдија две сестри мисионерки на љубовта од редот на Мајка Тереза кои исто така ги затекнавме таму.

Во спомен-собата се презентирани две музеолошки целини: ентериер на стара градска соба и вториот дел со лични предмети, фотографии, документи и публикации, со легенди на три јазика. Во градската соба преку луксузниот мебел, ткаенините и предметите е презентирана атмосферата на градскиот живот во Скопје и материјалната култура од почетокот на ХХ век. Има и значителен број на документи и лични предмети на Мајка Тереза, со тенденција збирката артефакти да се збогатува.

Директорката Здравковска вели дека освен домашни посетители, Спомен-куќата ја посетиле групи од Бугарија, Албанија, Црна Гора, Хрватска, Словенија, Србија, од Австрија, Германија, Италија, Холандија, Шпанија, Полска, Англија, Јапонија, Канада, Ерменија, Турција...
- Исто така, во преговори сме со туристички агенции кои покажаа интерес за договорени групни посети на домашни, но и на странски посетители од Холандија, Хрватска, Италија, додаде нашата домаќинка. Таа ни откри дека во подготовка за печатење е и текст посветен на новоотворениот музеј во Билтенот за дипломатскиот кор во издание на конзуларното одделение на МНР.

Странците и помладите со високи оценки за стилот
Иницијативата за изградба на спомен-домот е на Граѓанската асоцијација Мајка Тереза и нејзиниот претседател Стојан Тренчевски, кој е познат истражувач, хроничар на животот и делото на Мајка Тереза и нејзин биограф. А реализацијата на проектот потпишан од познатиот архитект Вангел Божиновски ја финансираше Владата преку Министерството за култура. Музејот е изграден врз темелите на некогашната Католичка црква Пресвето срце Исусово, местото каде што Мајка Тереза прв пат го слушнала Исус и каде одлучила да го посвети нејзиниот живот како мисионер. Објектот претставува трансформација на родната куќа на Гонџа Бојаџиу, која од профана архитектура се трансформира во молитвен простор.

Интересниот спој на неколку стилови на градбата предизвика многу контроверзни и дијаметрално спротивни мислења. Во музејот велат дека најпозитивни оцени за еклектичкиот стил доаѓаат од странските архитекти, туристи и помладите посетители.

Моштите ќе се изложуваат за значајни датуми
Моштите на Блажената кои се чуваат во Католичката црква ќе се изложуваат во Спомен-домот за време на значајни датуми.
Од следниот викенд, пак, ќе почнат да се одржуваат црковни обреди. Во неделите точно на пладне во молитвениот дом, католичките верници ќе можат да присуствуваат на миса, а секоја среда молитви ќе одржуваат сестрите од редот на Мајка Тереза.