Спoменик нa плoштaд Maкедoнијa

Роза Петкова

Метални шипки, кои се дел од конструкцијата на централниот дел на фонтаната, веќе се гледаат од градилиштето на плоштадот „Македонија“. Во Општина Центар велат дека објектот се гради според предвидениот план, но нема да биде готов до крајот на овој месец. Општинарите ги демантираат информациите дека фонтаната ќе се изгради за толку краток рок, и велат дека остануваат претходните најави според кои градбата би требало да биде готова до крајот на годината.
- Градежните работи се одвиваат според динамиката на изградба. Моментално се одвиваат градежни и инсталациони работи, редоследно по планот за работа - вели општинскиот портпарол Јовица Ацковски.
Досега се заврши дислокацијата на подземната инфраструктура под плоштадот, се изгради нова машинска хала за фонтаната и веќе се гради и конструкцијата. Во зависност од временските услови, општинарите рекоа дека е можно рокот за завршување да се одложи за два до три месеци.
Паралелно се градат и фонтаните од двете страни на „Камен мост“, како и основите за мостот „Око“.
- Во завршна фаза се градежните работи на машинските хали во реката Вардар и во текот на месецот ќе бидат интензивирани работите на приодите кон двете фонтани и изработката на нивните темели.
На мостот „Око“ се изработени потребните осум пилоти за темелите на столбовите од десната страна на реката. Се продолжува со работа и на потпорите на кејскиот ѕид на десната страна, а потоа ќе се прејде и на левата страна - вели Ацковски.
Сите градежни работи околу фонтаната на плоштадот на која што треба да се смести и споменикот на Александар Македонски ги врши градежната фирма „Бетон“, а за нејзината изградба Општината ќе потроши три милиони евра. Фонтаните во Вардар ги гради италијанската фирма „Ла моне мореда“, но Општината не соопштува колку чинат. Мостот „Око“, пак го гради сплитската фирма „Конструктор инжинеринг“ и чини околу два милиона евра.