Спoменик нa плoштaд Maкедoнијa

Плоштадот ќе се раскопа, споменици се ближат

Во октомври ќе почне да се гради фонтаната кај средишното зеленило на плоштадот Македонија, најави градоначалникот на Центар, Вчадимир Тодоровиќ

Плоштадот летово и есенва ќе биде раскопан за да се изврши поместување на цевките од водоводниот и канализацискиот систем, кои поминуваат точно под местото каде што ќе се градат фонтаната и споменикот на Александар Македонски и црквата „Свети Констатин и Елена“. Градоначалникот на Општина Центар, Владимир Тодоровиќ завчера најави дека очекува во октомври да почне да се гради фонтаната на местото на средишното зеленило. Пред да почне изградбата на водоскокот, Градот мора да ја изврши дислокацијата на канализацијата, за што уште во мај беше распишан конкурс за избор на фирма-изведувач.

- Очекуваме дека изградбата на фонтаната во центарот на плоштадот ќе почне во октомври. Сепак, неблагодарно е да се обврзуваме со датуми и рокови, бидејќи претходно Градот Скопје мора да ја помести инфраструктурата под плоштадот - рече градоначалникот Тодоровиќ.

Над фонтаната, која ќе има дијаметар од 25 метри, ќе биде поставен споменикот на Александар Македонски, висок 22 метри, кој се лее во Фиренца. Тој се очекува да биде готов до октомври следната година.

За изградба на фонтаната механизацијата на плоштадот ќе влегува од страната кај паркингот пред телекомот. Околу 30 отсто од површината на плоштадот ќе биде во функција на ова градилиште.

Од Градот Скопје информираат дека на конкурсот за избор на изведувач што ќе ја поместува инфраструктурата победила фирмата „Вардарградба“. Градските власти велат дека тие нема да плаќаат за поместувањето на водоводот и канализацијата, туку инвеститорот на објектите.

- За почетокот, динамиката на работите и за плаќањето е одговорен инвеститорот. Градот Скопје само технички ја спроведе постапката за избор на изведувач - велат во одделението за односи со јавноста.

Оттаму не откриваат колку би можело да чини поместувањето на подземната инфраструктура.Првобитен инвеститор на црквата „Свети Констатин и Елена“ беше Министерството за култура, кое требаше да ја спроведе Одлуката на Владата за изградба на овој верски објект со пари од државниот буџет. Пред еден месец Министерството сите документи за изградба на црквата и' ги префрли на МПЦ, која пак, с уште не се изјаснила што ќе прави понатаму. Во меѓувреме и Градот Скопје и Општина Центар го ослободија инвеститорот на верскиот објект од обврската за плаќање на комуналии за уредување на градежното земјиште.

Инвеститор на фонтаната, пак, е самата Општина Центар, која лани од државата во својот буџет доби 7,2 милиони евра за изградба на повеќе споменици. Од изјавата на градските власти произлегува дека токму Општина Центар треба да плати и за дислокацијата на канализацијата во делот под фонтаната.

Со изградбата на фонтаната и коњаникот Александар ќе пропадне и машинската сала што ја изгради претходниот градоначалник Ристо Пенов под плоштадот, вредна 200 илјади евра. Таа хала беше наменета за фонтаната што сакаше да ја гради Пенов, но проектот го стопира неговиот наследник Трифун Костовски.

Градоначалникот Тодоровиќ завчера рече дека од сите нарачани споменици годинава ќе бидат направени само тие за кои е даден аванс. Останатите ќе чекаат подобри времиња. Од досегашните настапи во јавноста на Тодоровиќ се знае дека девет милиони евра ќе бидат потрошени за изградба на споменикот на Александар, лавовите на Мостот Гоце Делчев, спомениците на Гоце Делчев, Даме Груев, Цар Самуил и Методија Андонов Ченто, кои ќе се постават на плоштадот, и за споменикот на Никола Карев, кој ќе биде поставен пред Собранието. Изработката на спомениците на Свети Кирил и Методиј, Свети Климент и Наум Охридски, цар Јустинијан, гемиџиите, Карпош, основачите на Македонската револуционерна организација, Првото заседание на АСНОМ, бранителите и паднатите херои за Македонија се ставени во мирување.

СТАВ
Поле за верски натпревар

И верската заедница „Света столица на суфиски еленлери на светот во Македонија“ сака свој верски објект на плоштадот Македонија. Суфистите сакаат да си изградат „Вирдали баба теќе“ во зеленилото кај кафулето „Тренд“, оти тоа место им се видело како најпогодно. Бараат Општина Центар и ним да им нацрта маркичка за верски објект среде плоштадот, веројатно за да има баланс на застапеноста на верите откако таму ќе никнат црквата „Свети Констатин и Елена“ и Бурмали џамијата.

Ова барање е повеќе од очекувано. Зачудува што се' уште нема иницијативи на плоштадот да се изградат објекти и на Методистичко-евангелистичката црква, Христијанко-баптистичката црква, на Бектешката заедница, Јеховините сведоци и на Харе Кришна, оти сите би биле легитимни.

Владата со одлуката да гради црква на плоштадот не само што ја подели јавноста на верници и неверници, туку ја отвори и Пандорината кутија од која сега излегуваат желбите на помалите верски заедници. Денеска суфистите, утре некои други, сите сакаат парче од плоштадот Македонија. Лопата таму, лопата ваму - плоштадот се претвори во поле за верски натпревар меѓу заедниците.А нели требаше да стане модерен и европски?

(С.Х.-Ј.И.)