Спoменик нa плoштaд Maкедoнијa

Скопскиот градоначалник Трифун Костовски предлага на плоштад Македонија место на Александар Македонски, да му се подигне споменик на Тоше Проески. Тој вели дека е многу пореално и поприфатливо во центарот на Скопје да се подигне споменик на трагично загинатата поп-sвезда, бидејќи скопјани спонтано го одбрале токму Плоштадот за да ги искажат своите длабоки чувства кон Тоше.
"Тоше го одбележа кругот на Плоштадот. Тука сите се собираа и со недели палеа свеќи кога загина, а нема кој не му запали свеќа токму на ова место и на годишнината од смртта. Сметам дека граѓаните ова место го чувствуваат како место на Тоше, и многу поприродно е на ова место нему да му се подигне споменик, а не на Александар Македонски, кој ако постоеше во денешни времиња, би завршил во Хаг поради убиствата и колежите што ги правел", вели Костовски.
Плоштадот и местото каде што треба да се гради споменикот од 2004 година е сопственост на Градот, и единствено со дозвола од Градот таму може да се поставуваат не само споменици туку и нови плочки. Бидејќи градоначалникот Трифун Костовски досега во неколку наврати јавно кажа дека е против споменик на Александар Македонски, Владата сега си ја побарала назад сопственоста на делот од Плоштадот каде што треба да стои споменикот.
"Немам намера да се откажам од концесијата за Плоштадот кој ни е даден на 99-годишно користење. За тоа ќе треба одлука на Советот на Скопје, но јас не можам воопшто да му предложам на Советот такво нешто бидејќи немам аргументи за враќање на концесијата", вели градоначалникот.
Враќање на концесијата за Плоштадот, како што рече Костовски, телефонски му побарал министерот за транспорт и врски Миле Јанакиески, а официјалната преписка, пак, одела преку претседателката на Советот на Скопје Ирена Мишева која по сугестија од градоначалникот, го одбила барањето.
Министерството за транспорт и врски два дена молчи и не дава одговор на прашањето зошто ја побарало назад концесијата. (Е.А.)

***

Камен-темелник откако ќе се тргне елката


Освен од Министерството за транспорт и врски, Градот имал притисоци и од Општина Центар, која не дозволувала Градот да постави елка на Плоштадот, бидејќи планирале по новогодишните празници да почнат со изградба на фонтаната.
"Кога почнавме да ја ставаме елката, дошле од Општина Центар и кажале дека во кругот на Плоштадот годинава не може да има елка, бидејќи тие од втори јануари ќе почнат со градба на фонтаната. Потоа се согласиле градежните работи да ги почнат од 15 ти јануари", вели Костовски.
Општина Центар тврди дека изјавите на градоначалникот Костовски се невистинити и оти ниту имале ниту имаат намера да ставаат камен-темелник на фонтаната на втори јануари.
"За терминот 15 јануари немаме никакви информации. За тоа дали тогаш ќе се постави камен-темелникот одлучува одборот за подигање на споменикот", велат од Општина Центар.

***

Споменикот излеан во Италија

Споменикот на Александар Македонски пред два месеца беше однесен на леење во Италија. Неофицијално, тој е веќе изработен, а од Италија е порачан и мермерот за постаментот и за фонтаната во која е предвидено да стои споменикот.
Официјално, изработката и поставувањето на овој споменик речиси две години е најстрого чувана тајна. За споменикот на Александар не зборуваат ниту Општина Центар која лани распиша конкурс за него ниту одборот формиран за негово подигање, во кој има и владини членови.
Но и покрај молкот од Општината, како што се зборува во уметничките и во дипломатските кругови, споменикот го направила млада вајарка од Скопје. Висок е 15 метри и излеан е од бронза. Постаментот и фонтаната, во која ќе стои споменикот, ги прави домашна градежна фирма, но со мермер од Карера, Италија.
Од Центар одбија да објаснат зошто споменикот се лее во Италија и зошто фонтаната се поправи со италијански, а не со прилепски мермер.