Закон за градење

Министерството за транспорт и врски подготвува нови измени на Законот за градење.

„Постојниот начин на осигурување за одговорност за штета во осигурителна компанија во Република Македонија од страна на учесниците во изградбата на градба е несоодветен“, велат од Министерството за транспорт и врски, наведувајќи ја причината за законските измени.

Од Министерството посочуваат дека измените се прават бидејќи низ праксата постоело и одолжување на постапката за издавање на одобрение за градење.

„Исто така во постапката за издавање одобрение за градење е предвидено пред издавањето на одобрението за градење, инвеститорот и општината на чие подрачје треба да се гради градбата да склучат договор за уредување на градежно земјиште, процедура со која се одолжува постапката за издавање одобрение за градење. Во Законот не се утврдени стручни квалификации за службените лица кои вршат заверка на проектната документација“, додаваат од Министерството за транспорт и врски.

http://www.akademik.mk/izmeni-na-zakonot-za-gradene-poradi-nesoodveten-nachin-na-osiguruvane-na-odgovornost-od-shteta

Пломба за изградбата на 300 згради

Уставниот суд во наредните два месеца ќе ги преиспитува членовите од Законот за просторното и урбанистичкото планирање, со кои се дозволува зголемување на предвидениот со ДУП габарит и катност на објектот

Привремена забрана за градба добија најмалку 300 инвеститори во Скопје, привилегирани да градат објекти поголеми од соседните. Уставниот суд во наредните два месеца ќе ги преиспитува членовите од Законот за просторното и урбанистичкото планирање, со кои се дозволува зголемување на предвидениот со ДУП габарит и катност на објектот.

Локални општински комисии, по барање од граѓани, одобруваа изградба на згради во центарот на градот, со донесување на т.н. локална урбанистичка планска документација (ЛУДП). Оваа процедура е спротивна на носењето на детаљните урбанистички планови, зашто Уставниот суд утврдил дека постојат два паралелни система на донесување на плановите.

- Со државната или локалната урбанистичка документација се врши промена на детаљните урбанистичките планови, а притоа граѓаните и стручната јавност се исклучени од постапката. На тој начин овие одредби од Законот овозможуваат паралелен систем на уредување на просторот - објаснува Југослав Миленковиќ, портпарол во Уставниот суд.

Доколу се поништат членовите 4, 5, алинеите 6 и 7 од овој член, член 17а - ставовите 4 и 5, како и членовите 50 и 50-а од споменатиот закон, објектите ќе мора да се вратат во првобитната состојба, онака како што било предвидено со ДУП. Ако се укинат, се' што е изградено досега останува, но во иднина нема да смее да се гради на тој начин.

Урбанистички стаорец

- Сметам дека е крајно време барем со една одредба да и' се стапне на опашката на урбаната мафија и да се воспостави ред во урбанизмот и градењето. Главата на овој урбанистички стаорец е во Министерство за транспорт и врски - вели Д.Д., жител на општината Центар.

Од Министерството за транспорт и врски информираат дека ќе ги почитуваат одлуките на Уставниот суд. Тие сметаат дека актуелните законски решенија се во насока на максимално искористување на земјиштето.

- Одредбата што е оценувана е веќе изменета и не постои во законот. Со последните измени и дополнувања на Законот за просторното и урбанистичкото планирање, се предвидува општината да спроведе јавна презентација и јавна анкета, на ист начин и во иста постапка како што се спроведува за ДУП-овите. Воведувањето на ЛУПД претставува поволност за граѓаните побрзо и поедноставно да ги остварат своите права. Процедурата за изработка на ЛУПД е јасно дефинирана во Законот и се спроведува од страна на општината. Имено, ЛУПД во рамки на веќе формирана градежна парцела со ДУП може да се донесе само заради усогласување на површината за градење и максималната висина на градбата со стандардите и нормативите за урбанистичко планирање. Притоа, секоја парцела мора да го задоволува потребниот број паркинг-места, да има адекватно сообраќајно решение, а целосната постапка се води во рамките на локалната самоуправа - одговараат од Министерството.

Грчев бара список на објектите


Иницијативата до Уставниот суд во март годинава ја поднесе архитектот и поранешен градоначалник на Центар, Мирослав Грчев. Тој смета дека државната и локалната планска документација се измислени да го суспендираат и да го уништат демократскиот и законски систем на урбанистичкото планирање и контрола на просторниот развој и градење.

- Овие два противуставни акти се креирани и донесени за да обезбедат корупција и профит на сметка на животната средина, на сметка на урбанистичките планови, на уредените градежни простори, како и на сметка на сите соседи и граѓани на Република Македонија, во чија околина, со помош на ЛУПД И ДУПД, поединци добиваат многу повеќе од сите други - смета Грчев.

Тој очекува и ја повикува Владата да се погрижи мерката на Уставниот суд да се спроведе. Според него, државната градежна инспекција треба да ја мобилизира општинската за да направи списоци за сите објекти што на ваков начин добиле градежна дозвола и тие списоци да бидат ставени на увид на јавноста, а инвеститорите на тие објекти да бидат санкционирани.

Само во општината Центар пристигнале 245 иницијативи или барања за одобрување на изработка на ЛУПД. Општината им одобрила на 127 граѓани или инвеститори да го зголемат габаритот или катноста на објектите, иако тоа не се совпаѓа со детаљниот урбанистички план. Од кабинетот на градоначалникот Владимир Тодоровиќ велат дека се одбиени само 19 барања, а останатите се во процедура.

Од Општина Центар велат дека најчести ДУП-ови за кои е побарано ЛУПД се локациите на Старо Водно, Долно Водно - Тасино Чесмиче 1 и 2, Капиштец - Клинички блок, Мал ринг, Капиштец - Геолошки завод, Буњаковец 1 и 2 и Дебар Маало.

Иако интересот на инвеститорите за ЛУПД бил голем, од Општина Карпош велат дека крајно внимателно и рестриктивно се однесувале кон поднесените барања.

- Почнати се околу 40 постапки, кои резултираа со одобрени ЛУПД, и тоа во случаи кога имаше силни аргументи за да се одговори позитивно на поднесените барања, а кои ги има над 300 - изјави Виолета Цветковска, портпарол во Општина Карпош.