Споменик Карпалак - Прилеп

Вицепремиерот и министер за финансии Зоран Ставрески и градоначалникот на Прилеп Марјан Ристески, во присуство на министерот за транспорт и врски Миле Јанакиески, денеска во центарот на градот го открија големиот споменик „Карпалак”, посветен на десетте загинати прилепски бранители.

За граѓаните на Прилеп, десетте краци на споменикот високи 15-ина метри, а со топката на врвот вкупно 18, која пулсира како срце, целосно впечатлива навечер, е симболот во спомен и незаборав за 10- те прилепски бранители кои загинаа на 8 август 2001 година кај месноста Карпалак. 

Впечатливоста на споменикот ќе биде дополнета со фонтана и уреден кружен простор, затоа што е во центарот на кружниот тек во близина на старата општинска зграда, а наспроти спомен обележјето „Карпалак“.

Вицепремиерот Ставрески на откривањето на споменикот истакна дека ова е потсетување да не се заборават бранителите.

- Прилеп и Македонија денеска им оддадоа почит на десетте бранители кои застанаа на браникот на слободата, на браникот на независноста на Македонија во 2001 година. Благорадност до општината Прилеп што заедно со владата успеа да го подигне овој грандиозен споменик со десет краци кои симболично ги означуваат 10-те млади животи кои згаснаа на тој ден. Ова е и поука за сите нас никогаш да не се повтори и секогаш да го памтиме она што бранителите го направија за оваа Македонија, за она што денес го имаме и за иднината на Република Македонија, рече Ставрески. 

Според градоначалникот Ристески градот Прилеп достојно им се оддолжува на бранителите.

- Ова е мојот најдраг проект, рече Ристески.

Целиот проект – споменикот, партерното и сообраќајно уредување на целиот простор во околината чини 30 милиони денари владини и пари на локалната самоуправа.

Вицепреимерот Ставрески заедно со градоначалникот Ристески и со министерот за транспорт и врски Јанакиески ја пуштија во употреба спортската сала во кругот на средното медицинско училиште Ѓорче Петров, како дел од владиниот проект „Спортски сали во училиштата во Македонија“. Салата е 650 метри квадратни и е една од 7 -те што се градат во прилепските основни и средни училишта.

На прилепчани денеска им беа доделени уште 25 нови решенија за легализација на дивоизградените објекти, со што досега вкупно се доделени 80. http://sitel.com.mk/dnevnik/makedonija/vo-prilep-otkrien-spomenikot-%E2%80%9Ekarpalak%E2%80%9C