Една од стратешките определби на Градот е имплементирање мерки коишто ќе овозможат одржлив, чист и енергетско-ефикасен урбан транспорт, истакна на денешната конференција на тема „Решенија за одржлив транспорт во пристапните и претпристапните земји и западен Балкан“, градоначалникот Коце Трајановски.

Конференцијата е дел од проектот „Ренесанс“, со којшто се осовременува јавниот транспорт преку воведување автобуси на гас, имплементирање систем за автоматска локација на возила и поставување информативни дисплеи што го покажуваат реалното време на пристигнување на автобусите на автобуските постројки, како и Центар за управување со сообраќајот. 

Во моментов, АВЛ системот се применува на две градски линии. Во функција се ставени 10 дисплеи, а во наредниот период се очекува истиот систем да биде применет и на преостанатите градски линии, односно во функција ќе бидат ставени 80 дисплеи.
- По согледувањето на позитивните ефекти кои што ќе ги имаат и Градот и граѓаните со имплементацијата на Центарот за управување на сообраќајот, Градот во моментов бара можности системот, којшто е планиран да функционира на 30 крстосници да биде проширен на 100 - рече Трајановски.
Проектот „Ренесанс“ под наслов „Тестирање на иновативни стратегии за чист урбан транспорт во историски европски градови“ е интегриран проект во 5 европски града, меѓу кои е и Скопје.