Скопски сообраќај (општо)

Надлежните ја префрлаат својата вина на непрописното работење на фирмата со која соработуваат но не го кажуваат името на подизведувачот

Продолжуваат турканиците на булеварот "Кузман Јосифовски Питу". Нервозните возачи секој ден мака мачат да стигнат на работа, бидејќи редот на гужвите од автомобилите е навистина голем. Па, наместо на три ленти, сообраќајот на булеварот деновиве се одвива само на две. Новореконструираниот булевар, во рок од четири месеци се оштети три пати, со што им создаде големи проблеми на жителите на главниот град. Со оштетувањето на крајната лента, се создаде поголема гужва, но и граѓаните кои ја користат автобуската постојка кај Комплексот банки сега немата каде да слегуваат.
- Секој ден е иста песна. Се поголеми турканици. Доцнам на работа иако излегувам порано од дома. Морам да поминам од тука. Токму што помисливме дека конечно нема да има гужви, бидејќи е реконструиран булеварот, и сообраќајот ќе биде порастоварен, повторно се нервираме, вели една возачка.

Во моментов овој дел од улицата е повторно раскопан, а во оваа состојба ќе биде и во следните 3-4 дена.

Надлежните од јавното претпријатие Улици и патишта", кои ја вршеа реконструкцијата на овој булевар, непрописното работење и го префрлаат на фирмата-подизведувач. Но, не го кажуваат името на подизведувачот.
- На булеварот "Кузман Јосифовски - Питу" повторно се работи, поради тоа што асфалтот кој го употребија подизведувачите на ЈП "Улици и патишта" не ги задоволуваше бараните критериуми, не беше соодветен за употреба, па токму затоа имаше и набирање на асфалтот. Сега истата фирма-подизведувач ги менува целосно двата слоја на асфалт. Асфалтот кој беше поставен на крајната лента е несоодветен, бидејќи на дело се покажа дека тој за кратко време пропадна и се раскопа на неколку места. Од нашето претпијатие заедно со надзорот, со кој неколку пати бевме на терен, утврдивме дека не бил поставен асфалт со квалитет соодветен за тежината што секојневно ја оптоварува оваа улица. На подизведувачот му дадовме налог да ја поправи штетата, поточно улицата да ја направи според европските стандарди, а за тоа сам ќе си ги сноси трошоците, велат надлежните од јавното претпријатие Улици и патишта".http://vecer.com.mk/?ItemID=EE23610C86DF12458634645E8859BDFF

Градот Скопје ја заврши првата фаза од реконструкцијата на улицата Козле, во општината Карпош, којашто почна на 8 јули. Во оваа фаза од градежните работи обновени се 444 метри од улицата, на потегот од последната станица на автобусот со број 57 до крстосницата со улицата Јуриј Гагарин. Градоначалникот на Град Скопје, Коце Трајановски, денеска /29.09.2011 година/ и официјално ја отвори улицата за сообраќај.

- Градежните работи на оваа сообраќајница ќе се одвиваат во три фази и ќе продолжат во зависност од временските услови. Од улицата Козле вкупно ќе се обноват 1.301 метар, се до крстосницата со улицата Нерешка. Во текот на градежните работи на првиот дел од улицата Козле оштетениот коловоз беше раскопан, беше обновена подлогата, а шахтите и сливниците беа нивелирани. На улицата е нанесен нов асфалтен слој, при што е асфалтирана површина од околу 3.150 квадратни метри. По должината на коловозот се поставени нови рабници во должина од 900 метри. Од двете страни на обновениот дел од улицата Козле се формирани тротоари со променлива ширина од 80 сантиметри до 1,5 метри во зависност од постојните објекти и потпорни ѕидови на сообраќајницата. Тротоарите се покриени со бекатон-плочки на површина од 850 квадратни метри. На првиот дел од улицата Козле поставена е и нова атмосферска канализација (Ф 315 мм и Ф 500 мм) во должина од 380 метри, со сливници и ревизиони шахти, што ќе обезбеди непречено одведување на атмосферските води – рече денеска градоначалникот Трајановски.

На обнова на улицата Козле работат екипите на градежната компанија „Пелагонија – Гостивар“. За реализација на првата фаза од реконструкцијата на улицата Козле Градот Скопје одвои околу 11,5 милиони денари. Целосната реконструкција на оваа улица ќе чини околу 26 милиони денари.

- Обновата на улицата Козле ќе придонесе за зголемување на безбедноста во сообраќајот во овој дел на градот, ќе се зголеми проточноста на возила и ќе се намали времето на патување. Со тоа Градот Скопје активно придонесува за намалување на загадувањето на воздухот во градот – додаде градоначалникот Трајановски.