Скопски сообраќај (општо)

НОВИ КОЛОВОЗНИ ЛЕНТИ ЗА ПОМАЛ СООБРАЌАЕН МЕТЕЖ

„Илинденска“ и „Гоце Делчев“ ќе се прошируваат во јуни

Летово, како дел од Акциониот план на градоначалникот Костовски, ќе биде проширена и крстосницата кај Тутунскиот комбинат и ќе биде изграден нов надвозник кај Бит-пазар

Градските власти од наредниот месец со полна пареа ќе почнат градежна офанзива во Скопје. Ќе се прошируваат булеварите Илинден и Гоце Делчев, како и раскрсницата кај Тутунскиот комбинат и ќе се гради надвозникот кај Бит-пазар, кој ќе има форма на детелина. За поголема безбедност на пешаците, ќе бидат изградени повеќе натпатници. Од Градот велат дека со овие градежни активности Скопје ќе добие пошироки улици, нови тротоари и жардиниери со зеленило на средината на булеварите. Проширувањето на сообраќајниците се првите активности од Акцискиот план на градоначалникот Трифун Костовски за 2008 и 2009 година.Во тек се постапките за избор на изведувачи, кои се при крај. До крајот на мај ќе бидат избрани изведувачите на клучката детелина на Бит-пазар и на проширувањата на булеварите Гоце Делчев и Илинденска и на крстосницата кај Тутунски. Спроведуваме и тендерска постапка за избор на изведувач за средишните зеленила за седум булевари. И овој јавен повик треба да заврши до крајот на мај. По затворањето на јавните набавки, веднаш ќе почне реализацијата на проектите, според предвидената динамика - објаснуваат од Градот. Паралелно со новите градежни активности, ќе се одвиваат и неколку стари проекти, кои се почнати лани или пред неколку месеци. Тоа се пробивањето на булеварите Србија и Македонска војска, како и изградбата на клучката кај „Континентал“. Кај пробивањата на булеварите има извесни задоцнувања од административен карактер, меѓутоа деновиве очекуваме работите да почнат со полна пареа и многу брзо да заврши изградбата. Проблем се појави на булеварот Македонска војска во Ѓорче Петров со дислокација на еден привремен објект на Јавното претпријатие за стопанисување станбен и деловен простор, од каде што бевме замолени да почекаме некое време - објаснуваат надлежните. Градските власти велат дека и проектот за изградба на натпатници е веќе готов. Избрале два вида, кои ќе бидат поставени над некои улици и булевари, но се' уште не откриваат над кои. Пред да бидат поставени натпатниците, Градот ќе се координира со општините. Унифицирани се два вида натпатници, бидејќи магистралните улици се разликуваат според широчината и средишната структура. На пример, за локацијата кај Бит-пазар е предвиден типот на натпатник за улици со помал профил и без средишно зеленило, а за булеварите како што е „Партизанска“ се предвидени натпатници од друг тип. Тоа е затоа што „Партизански одреди“ има поширок профил и средишно зеленило во кое не можат да се поставуваат носечки столбови за преминот - велат во Градот. Се очекува проширувањето на улиците и изградбата на нови да го намалат сообраќајниот метеж во Скопје.

Јорданка Ивановска

http://www.dnevnik.com.mk/?ItemID=0B42C30FBF4F6449A42279D69C1A4CFD

„Илинденска“ ќе почне да се проширува до крај на месецов

Четирите капитални проекти ќе се реализираат во текот на летото

Проширувањето на улицата „Илинденска“ треба да започне до крај на овој месец. Поради тоа, градоначалникот на Скопје, Трифун Костовски, утре ќе се сретне со сопствениците на имоти преку кои поминува трасата на идниот булевар „Илинден“. На средбата треба да бидат разгледани начините за забрзување на расчистувањето на просторот, со оглед на краткиот период до стартот на градежните активности. Најкритично е кај стариот влез на Зоолошката градина, спроти американската амбасада и на влезот во „Паркови и зеленило“, каде што има дивоградби и делови од приватни имоти.

Во Градот информираат дека другите три капитални проекти што беа најавени дека ќе се реализираат во текот на летото: клучките кај Бит-пазар и кај Тутунски комбинат и проширувањето на булеварот „Гоце Делчев“ од Судска палата до „Скопски саем“, немаат имотноправни проблеми и ќе започнат навреме, во текот на овој месец.

Деновиве во тек е потпишувањето на договорите со избраните градежни фирми, од кои три се домашни и една странска. Се очекува изградбата да започне веднаш и ќе се одвива паралелно на сите четири локации. За таа цел, во Градот е подготвен нов сообраќаен режим за да се обезбеди нормален проток на сообраќајот во центарот на градот. За реализација на капиталните зафати Градот има одвоено 6,2 милиони евра.

„Изградбата на клучката кај Тутунски комбинат и проширувањето на булеварот ’Гоце Делчев’ се во функција на нормално функционирање на клучката ’Континентал’ и се очекува сите да завршат кон крајот на летово. Двата проекта ќе го чинат градот 33 милиони денари“, вели Алјоша Шопар, раководител на Секторот за урбанизам.

Што се однесува до клучката кај Бит-пазар, со која ќе се избегне секое вртење влево и нема да има потреба од семафори, изградбата, која ќе чини 40 милиони денари, треба да финишира во септември. Проширувањето на „Илинденска“ од фонтаната „Лотос“ до раскрсницата кај Воената болница, според плановите на градската власт, ќе трае до крајот на годинава. (С.Н.)