Постојат планови за проширување на булеварите надвор од центарот, но засега само на хартија. Според експертите, сообраќајниците мора да се завршат за градот да има оформена улична мрежа

Првомајска ќе добие четири ленти, ама само до поранешната фабрика Стакларница

Со реконструкциите на булеварите Илинден, Митрополит Теодосиј Гологанов, Свети Климент Охридски, тие добија уште една или две ленти, ново средишно зеленило или негово намалување. Митрополит Теодосиј Гологанов е проширен во делот од пред Католичка црква, до раскрсницата со улицата Френклин Рузвелт, а граѓаните го очекуваат проширувањето до студентскиот дом „Гоце Делчев“. Слична е и ситуацијата со булеварот Илинден, кој е проширен до раскрсницата со булеварот 8 Септември, а од тука до улицата Никола Парапунов е во план да се проширува. Градот Скопје интензивно работи на проширување на улиците, но само во централното градско подрачје, иако се најавува нивно продолжување, нема конкретни датуми. Како што се оддалечуваат од центарот, булеварите стануваат сé потесни, а во периферните делови најчесто се обични улици или воопшто ги нема, постојат само на хартија.

- Градот Скопје изработува проектни решенија за понатамошно фазно проширување на булеварот Илинден до улицата Никола Парапунов. Проширувањето ќе се изврши во текот на наредната и во 2013 година, а точната динамика и средствата што ќе се инвестираат во овој проект ќе се знаат по изработката на изведбените решенија - велат од градската управа.

Оттаму додаваат дека при планирањето и реализацијата на булеварските решенија, проекциите се прават врз основа на постојаните сообраќајни потреби и досега се проширувало и во центарот и во периферијата.
Сообраќајниот инженер Јован Христовски посочува дека е неопходно да се довршат почнатите булевари.
- Булеварите мора да се завршат за градот да има оформена улична мрежа на сообраќајници што водат кон центарот. Според мене, мора да се размислува за комплетирање на булеварот Даме Груев, кој треба да има четири ленти, со што конечно ќе се оформи Малиот ринг - објаснува Христовски.

Токму за намалување на метежот градот најавува неколку проекти, кои треба да го растоворат централното градско подрачје. Така на пример, сé поизвесна станува изградбата на новата подземна сообраќајница покрај кејот на реката Вардар од мостот „Гоце Делчев“ до булеварот Кузман Јосифовски-Питу, чија изградба треба да почне во 2013 година. Исто така, во пролетните месеци треба да почне проширување на булеварот Првомајска, на потегот од Стара рампа до влезот на поранешната фабрика Стакларница. Следната година се најавува и проширување на последниот дел од булеварот Свети Климент Охридски, но неизвесна е судбината на неговото продолжение, како и тунелот низ Калето. Ова е само доказ дека плановите на градот и понатаму се концентрирани на зголемување на сообраќајниот проток во срцето на градот. Со напуштање на централното градско подрачје, булеварите се стеснуваат и стануваат улици. Доколку се прошири Митрополит Теодосиј Гологанов до студентскиот дом во продолжение, граѓаните повторно ќе мора да возат по улица со една лента. Досега неколкупати е споменато можното проширување на булеварот Трета македонска бригада, но тој не се споменува во буџетот за следната година.

Градската администрација има изработено проект за булеварот Христијан Тодоровски-Карпош, кој поминува низ Чаир, а треба да се продолжи низ Бутел и да се поврзе со обиколницата. Слични планови има и за улицата Босна и Херцеговина, но и таа ја има истата судбина како Трета македонска бригада, не се предвидени во буџетот на градот за 2012 година.

Недовршени булевари

Теодосиј Гологанов - до фабриката „Треска“, потоа е улица
Првомајска - до Усје, оттаму е улица
Трета македонска бригада - улица во целата должина
Босна и Херцеговина - улица во целата должина
Илинденска - до салата „Борис Трајковски“, потоа е улица до Карпош 4, а оттаму до обиколницата постои само на хартија
Христијан Тодоровски-Карпош - од подвозникот кај Бутел е тесно патче