Пластичарската улица изумира на рати

Сопствениците на продавниците се жалат дека работата од година на година им оди сé послабо

Некогашниот белег на градот, народски познатата пластичарска улица, полека ги губи својата популарност и препознатливост. Метежот низ дуќаните со голем избор на разни производи и врвулицата од автомобили и луѓе сега се многу ретка појава. Дуќанџиите се жалат дека во последните две години значително им е намалена посетеноста, за што како причина ја посочуваат изградбата на трговските центри и на големите маркети, каде што граѓаните одат сé почесто.

- Пред две-три години во дуќанов се работеше турбо од 9 до 17 часот секој ден. По цел ден имавме работа и продажбата одеше добро. Сега од година на година е сé послабо. Ако некогаш луѓето кажуваа дека ќе одат на пластичарската улица, денес ги слушам како велат дека одат во “Веро-центар“. Тие што работат со малопродажба, што не се дистрибутери по маркети или пазари, ги затвораат дуќаните и си одат. Ние опстануваме затоа што работиме на големо и имаме и други продавници низ Скопје - вели Горан Тодоровски, сопственик на продавницата „Тика пласт“.

Пластичарската улица не им е позната само на скопјани. На шопинг тука доаѓаа и жители од другите градови, како Куманово, Битола, Струмица, Охрид, но чести беа и гостите од Косово и од другите соседни земји. Поголем метеж во овој период од годината има само за време на викендите, кога се бараат буриња за чување туршија, зелка или, како што велат продавачите, сезонски производи.

- Посетеноста зависи од периодот во годината и од временските услови. Овој период оди доста слабо затоа што е ладно, а ако падне дожд или снег, речиси нема муштерии. Меѓутоа со потоплите месеци, односно од април и мај до август, продажбата се зголемува, иако последниве години е доста намалена. За време на празниците порано моравме да вработуваме дури и по 16 работници, а денес се случува да сме и помалку од 5 работници - вели Абази Јето, сопственик на „Беса-ком“.

Продавницата Беса-ком веќе 16 години постои на пластичарската улица и, како што велат оттаму, името им е познато на сите што доаѓаат да купуваат кај нив.

- Имаме редовни купувачи, кои нé знаат од порано и постојано доаѓаат кај нас да купуваат. Исто така нé препорачуваат на други луѓе, па често се случува муштерии да дојдат по препорака и од други градови, па дури и од други земји - велат од продавницата.

На тротоарот пред продавниците може да се забележи црвена линија, која означува до каде смеат да се изложуваат производи надвор од дуќанот. Направен е и паркинг од страна на општината за да се избегне метежот со автомобили што порано беа паркирани на самата улица или на тротоар.

За три месеци - над 3.600 инспекциски контроли

Иако сите дуќани на пластичарската улица имаат фискални апарати, сметка најчесто добивате само доколку самите побарате. Од Државниот пазарен инспекторат велат дека вршат редовна контрола во работењето на продавниците и врз основа на утврдените неправилности се преземаат управни и прекршочни мерки.
- Во третиот квартал од 2011 година се извршени 3.296 редовни, 153 контролни и 182 вонредни инспекциски надзори, или вкупно 3.631 надзор. До надлежните прекршочни органи се поднесени 228 барања за поведување прекршочна постапка.Од нерегистрирани трговци се одземени производи во вредност од 229.335 денари - велат надлежните од инспекторатот.