Црква на Плоштад Македонија

За шест месеци ќе почне да се гради црквата на скопскиот плоштад

Камбанеријата ќе биде висока 50 метри, а од ресторанот „Дал-мет-фу“ црквата ќе биде оддалечена само девет метри

Билјана Јовановска

Со измените во Детаљниот урбанистички план на Скопје надмината е пречката за градење црква на градскиот плоштад. Со прецизност се' уште не може да се каже кога ќе почне изградбата, но упатените велат дека во наредните месеци треба да се изработи и идејниот, главниот и на крајот изведбениот проект, а кон крајот на годинава може да започнат поконкретни градежни работи.

Храмот што ќе се гради со одлука на владата, ќе биде на улицата меѓу ресторанот „Дал- мет-фу“ и „Сити галери“ (поранешна Стоковна куќа „Типо“). Црквата ќе биде висока 29 метри, камбанеријата ќе се издигне на 50 метри, а целиот објект ќе зафати простор во широчина од 38 метри. Значи, нема да се гради минијатурен објект, туку храм со вообичаени димензии кој од ресторанот „Дал-мет-фу“, на пример, ќе биде оддалечен само девет метри.

Во црковни кругови велат дека, наводно, Македонската православна црква одамна ја имала идејата за возобновување на некогашната градска црква „Цар Константин и царица Елена“, која се наоѓала на влезот на Трговскиот центар, но јавно не ја иницирале поради локацијата. Но, сега е речиси извесно дека ова што ќе се гради не е возобновување на храмот, зашто црквата нема да го носи името на некогашната и ќе има поинакви димензии и изглед.

Замислата беше новата црква да нема ограда, да се приоѓа од сите страни, а централниот влез да биде од плоштадот „Македонија“, односно од нејзината западна страна. Од врвот на МПЦ се најавуваше дека тие најмногу би сакале храмот да има кружна форма, но сигурно е дека ќе инсистираат во проектот да биде испочитувана вековната традиција на градењето православни храмови во овој дел од Балканот.

МПЦ, велат, имала извесни забелешки на решението избрано на конкурсот чии автори се архитектите Владимир Никоски и Искра Анастасова, а Министерство за култура преку кое се турка проектот со нив договорило тие да се погрижат и за изработката на главниот и за изведбениот проект. Не се соопштуваат рокови, но од она што ни го кажа државниот секретар за култура, Елизабета Канческа-Милевска, досегашните искуства упатуваат на тоа дека ќе им бидат неопходни четири месеци. Дури потоа со авторите ќе се склучи и договор, а Министерството ќе распише тендер за градба. Дотогаш, наводно, не се знае, колку ќе чини новата црква на плоштад.