Возен парк (ЈСП - двокатни автобуси)

ЧЕТИРИ ФИРМИ ВО ТРКА ЗА НАБАВКА НА 302 АВТОБУСИ

Отворени понудите за даблдекерите

Една домашна, две кинески и една чешка компанија се јавија на меѓународниот конкурс за набавка на 302 нови двокатни автобуси што го објави Министерството за транспорт и врски. Понудите се отвораа вчера зад затворени врати, а Комисијата за спроведување на јавната набавка ќе изврши преглед на комплетноста и валидноста на доставената документација како и евалуација на пристигнатите понуди, по што ќе биде избран најповолниот понудувач, информираат одговорните од Транспорт.

Според условите од конкурсот, најмногу поени, 50 носи понудената цена, 30 бода носат техничките карактеристики и дизајнот, 15 гарнцијата, а 5 бода се оставени на рокот на испорака.

Двокатните автобуси треба да исполнуваат високи еколошки стандарди и да придонесат за зачувување на животната средина, да имаат мотори според последна технологија, а каросеријата да има ретро-стил налик на некогашните "даблдекери" кои се некогаш возеле во македонската метропола. Идејата е да се врати страта традиција и да се овозможат современи услови за превоз во градескиот сообраќај.

Од Министерството за транспорт и врски, велат дека 302-та автобуси нема да бидат купени одеднаш, дека во буџетот за годинава се предвидени финансии за да се набават првите 102, а во текот на 2010 и 2011 година ќе пристигнат и останатите 200 двокатни автобуси.
Единствениот домашен понудувач беше фирмата Санос. Директорот Славе Распашковски излезе задоволен од отворањето на понудите и како што рече очекува тендерот да го добие токму македонската фирма бидејќи имале понудено најдолг гарентен рок, висококвалитетен мотор и цени проближни на кинеските.