Разно

Противпожарната опрема е луксуз во зградите

Хидрантската мрежа е задолжителна, но ретко која зграда ја поседува. Хидрантите се празни, а цревата и вентилите украдени или расипани

БОЈАН ШАШЕВСКИ 


„Хидрантите се празни, противпожарните приклучоци расипани, млазниците ги нема. Многу е тешко да најдеш противпожарно црево во хидрант во станбена зграда. Тоа е луксуз кај нас! Никогаш во овие 40 години додека работам не се направиле посериозни напори за разработување на хидрантската мрежа. А, ние пожарникарите реагираме во згради и на првиот и на 15. кат. Понекогаш немаме потпора, па се снаоѓаме како што знаеме и умееме“, вели командантот на противпожарната бригада, Благоја Менковски.

Тој појаснува дека пожарникарите не можат да казнуваат куќни совети, иако правилното работење на хидрантската мрежа треба да биде морална и законска обврска.

Менковски го потврдува деценискиот проблем со противпожарната опрема по станбените објекти. Иако таа е задолжителна, ретко која зграда ја поседува. Нема ниту интерес за обновување на хидрантите, за цревата, паничните светла, целата мрежа воопшто. Во случај на пожар кај некои згради не можат да се искористат ниту противпожарните скали и премини. Тие во најголем дел се или соѕидани или узурпирани и преадаптирани за индивидуални потреби. 

Ивица Митровски од фирмата „Ваш станбен управител“, која од Регулаторната комисија за домување има лиценца за вршење дејности за управување со станбени објекти, вели дека во 90 отсто од зградите не функционира хидрантскиот противпожарен систем. „Постојано се крадат сите делови. Дури и во новите згради ги снемува веднаш по вселувањето. Нужно е целата опрема постојано да биде заклучена во хидрантските ормани. Затоа, најдобро решение е кај еден од станарите на катот да има оставено хидрантско црево, па во случај на пожар да се дејствува веднаш“, вели Митровски.

Тој потенцира дека е потребно барем два пати годишно да се испробува одводот за противпожарното црево. Фирмата „Ваш станбен управител“ моментално управува со десетина скопски згради, но искуството покажува дека ниту една од нив нема регуларен противпожарен систем. 

„Станарите треба да се свесни за она што може да го направи огнената стихија, затоа треба поголема организираност и иницијативи за одржување на целиот хидрантски систем. А, потребно е само еднаш да се инвестира. Тоа е мала работа, а толку многу значи. Претседателот на Заедницата на станари треба редовно да ја иницира и да ја презентира проблематиката на своите соседи од зградата, но и да се консултира и со управители на згради за посоодветно и трајно решение“, вели Митровски. 

Според Законот за домување, обврска на управителот е да се грижи за редовно одржување на заедничките делови во станбените згради. Поправките го врши управителот според настанатите потреби и по свое наоѓање и за извршените работи е должен во рок од 15 дена да состави писмен извештај и да го достави на собирот на сопственици. Секако, ова важи за зградите со регулиран договор за вршење управувачки услуги. 

Станарите на сопствена иницијатива во секое време можат да ја набават потребната противпожарна опрема. Во Скопје постојат повеќе регистрирани фирми каде што може да се купи цела ППЗ-опрема и уредите за сума од 4.500-6.000 денари. 

„Најевтините црева се од 1.500 до 2.000 денари, во зависност од видот и должината. На пример, има црева од 15 метри кои се купуваат заедно со спојките... Предниот дел (млазниците) се движат од 800 до 1.000 денари. Вентилите, пак, се продаваат од 2.000 до 3.000 денари, со тоа што постојат кинески, италијански, со помало или поголемо количество месинг“, објаснува Митровски од „Ваш станбен управител“.

Од Регулаторна комисија за домување потенцираат дека на влезниот ходник во колективниот објект потребно е да стои упатство и список на сите тековни проблематики околу заедничките станбени работи - ППЗ-уреди, лифтовите, доводот, одводот, уредите за загревање, телекомуникациските уреди и кабли, други придружни антени и слично.