Аеродроми

Само турската ТАВ сака концесија на македонските аеродроми

ТАВ веќе стопанисува со аеродромите во Истанбул, Анкара и Измир, како и со два аеродрома во Грузија и три во Тунис

Сања Наумовска

Турската компанија ТАВ е единствената која достави понуда на тендерот за издавање под концесија на аеродромите „Александар Велики“ во Скопје и „Св. апостол Павле“ во Охрид и за изградба на карго-аеродром во Штип. Понудата без присуство на јавноста, пред претставници на Министерството за транспорт и врски и на понудувачот, беше отворена вчера. Документацијата што ја достави турската компанија ќе ја оценува надлежна комисија за спроведување на тендерската постапка, која се очекува деновиве да соопшти дали понудата е комплатна. По извршената евалуација, комисијата треба да го предложи до Владата најповолниот понудувач, во случајот и единствениот, која ќе ја донесе конечната одлука за давањето на аеродромите под концесија.

Турската компанија веќе стопанисува со аеродромите во Истанбул, Анкара и Измир, како и со два аеродроми во Грузија и три во Тунис, на кои вработува 11.000 лица. Во моментов компанијата гради аеродроми во Катар и во Каиро. „ТАВ аирпортс холдинг“ е основана во 1997 година и денес, на своите аеродроми, опслужува 27 милиони патници, 285.000 летови на над 300 авиокомпании годишно, што го става меѓу водечките авиооператори во светот.

Претседателот и главен извршен директор на ТАВ, Мустафа Сани Шенер, вели дека доставиле многу конкурентна и поволна понуда. „Ако го анализирате проектот, ќе видите дека станува збор за тежок проект, бидејќи инвестицијата е 200 милиони евра, а годишниот број патници на аеродромите е само 680.000. Ако верувате во иднината на земјата, тогаш ќе се борите за тендерот. Ние веруваме и ако биде прифатена понудата, ќе направиме се' аеродромите да бидат најконкурентни во регионот“, изјави Шенер. Тој е убеден дека Македонија има голем потенцијал и верува дека ќе стане членка на ЕУ и на НАТО, со што бројот на патниците на аеродромите ќе се зголемува.

Претседателот на Комисијата за евалуација на тендерската документација, Игор Јанушев, на вчерашното отворање на доставената понуда во Министерството за транспорт и врски, изјави дека и со само една понуда, во оваа фаза од постапката целата процедура е валидна и во согласност со законите. Во втората фаза од постапката за издавање на македонските аеродроми под концесија беа квалификувани вкупно четири компании. Покрај ТАВ, интерес пројавија и „Виена интернационал аирпорт” од Австрија, „Хохтиф“ од Германија и ЕГИС од Франција и Велика Британија. Втората фаза започна на 15 јули, а рокот за доставување понуди траеше 42 дена. Во меѓувреме беше организирана конференција на понудувачи, а четирите квалификувани фирми ги посетија двата аеродрома и локацијата за карго- аеродромот во Штип.

Идниот концесионер, според проектот на Владата, на аеродромот „Александар Велики“ во Скопје ќе треба да изгради нова терминална зграда, да ја продолжи полетно-слетната патека што ќе овозможи полетување и слетување на сите типови авиони, да изгради паркинг за автомобили, пристапен пат заедно со изградба на нова клучка, да изврши инсталирање на системите за земска навигација, да ја догради административната зграда и да инвестира во нов карго-терминал, противпожарна станица и паркинг за авиони.

На аеродромот „Св. апостол Павле“ во Охрид ќе се реконструираат административна зграда и постојниот паркинг и ќе се градат ВИП-објект и пречистителна станица. Концесионерот ќе треба да изгради карго-аеродром во Штип, кој ќе функционира како алтернативен аеродром за потребите на цивилната авијација.

Конзорциумот, составен од „ЕГИС проџект С.А.“, „Коуптинг Сингер енд Фридландер лимитед“, со жалење вчера ја информира јавноста дека и покрај направените интензивни напори за развој и управување со постојните аеродроми и изградба на нов карго-аеродром во Република Македонија, заради краткиот рок по целосното дефинирање на тендерските услови, не беше во можност целосно да подготви сеопфатна, обврзувачка и неусловна понуда во согласност со стандарди за квалитет и одговорно стопанисување на конзорциумот. Затоа, се вели во вчерашното соопштение, со оглед на правилата и условите на овој тендер, конзорциумот донесе одлука да не поднесува понуда на овој тендер.

Препознавајќи ја важноста на овој проект за државата и за нејзините граѓани, конзорциумот уште еднаш ја потенцира својата заинтересираност за успешно управување и развој на македонските аеродроми и ја изразува својата посветеност и понатамошна заинтересираност и во иднина, доколку постои можност, да учествува во нивниот развој и во развојот на други инфраструктурни проекти.