Трифка

Клучката ќе се жртвува за спас на ЈСП?!

Капиталните објекти во градот, па и самата клучка, ќе бидат жртвувани со цел да се спаси јавниот превоз, доколку државата финансиски не му помогне на Градот. По завчерашниот негативен одговор од страна на Владата за субвенции во ЈСП, скопскиот градоначалник Трифун Костовски, дури изрази и подготвеност да даде оставка ако тој е причината за ваквата ситуација и ако граѓаните тоа го бараат од него.

-Состојбата во моментот е драматична. Се заканува колапс на буџетот на Град Скопје, а најкритична е состојбата со ЈСП. Заканата од блокада на јавниот превоз е повеќе од реална. Ние сме во голема дилема дали да ги стопираме сите капитални инвестиции, па дури и самата клучка со цел да го помогнеме ЈСП. По намалувањето на цената на возниот билет, направено по барање на Владата, не се покриваат ни направените трошоци за гориво. Но, јас сум последен човек што ќе дозволи граѓаните да немаат јавен сообраќај, додаде Костовски, кој најави дека Градот ќе мора целосно да ја редефинира својата политика и буџетот за следната година.

Според Костовски, иако дури една третина од средствата по основ на данок се собираат во главниот град, градскиот буџет за наредната година ќе биде само 0,8 отсто од буџетот на државата, што според него не е доволно ниту за крпење на улиците.

На новинарско прашање дали менаџментот на ЈСП и неговата работа е причина за негативниот одговор на Владата за помош, Костовски напомена дека од страна на независниот ревизор немаат утврдено девијантни појави кои би дале повод за смена на менаџментот.
Од синдикатот на ЈСП вчера сепак не спомнаа дека е можен штрајк во претпријатието. Оттаму се надеваат дека Владата и Градот сепак ќе изнајдат решение.

Хајките против мене ме прават посилен

Покрената е кривична пријава против инспекторот кој го издал документот за поставување на бараката на ТВ Парламентот во центарот на Скопје и којшто тврди дека тоа е во надлежност на општина Центар, што апсолутно не е точно

Деновиве, скопскиот градоначалник Трифун Костовски е на отстрел на сопственикот на А1 телевизија и неколку негови медиуми. И покрај сите опструкции, тој е цврсто решен да истрае во мисијата што ја почна. Вели дека сето тоа му дава елан за да остане во политичките води уште долго време.

Последниве денови сме сведоци на една агресивна медиумска кампања насочена против Вас. Конкретно, сопственикот на А1 телевизија, Велија Рамковски јавно ги повика граѓаните да бараат Ваша оставка. Кои се, според Вас, причините за тоа?
- Причините не ми се познати, меѓутоа не можам да сфатам, со кои аргументи манипулира лицето од кое потекна оваа иницијатива. Сето она што го искажа преку т.н. Парламент е повеќе од смешно. Претпоставувам дека се работи за нешто друго, дека има некоја друга позадина, други амбиции, но не сакам да навлегувам понатаму. Би сакал само да му порачам да биде совесен и лојален граѓанин и да ги подмири своите обврски кон градот. Се уште постои тужбата против него за неплатени заостанати давачки за комунална такса за користење на неговите складишта. Прашањето, исто така е поврзано и за начинот на којшто функционира А1 телевизија со двата дневни весника, за кои што и врапчињата знаат дека се негови, на коишто им дава 99 отсто попуст во рекламирањето. Сето тоа јасно говори за неговите чесни или нечесни намери. Нема што понатаму да коментирам и во ниеден момент не ја сфатив сериозно неговата порака дека тој е личноста кон која јас треба да обрнам внимание.

Кој дозволи да се постави бараката на т.н. Парламент среде плоштад?
- Бараката на т.н. Парламент е поставена во центарот на Скопје, така што најубавото катче не само што е узурпирано, туку и нагрдено. Говориме за плоштадот, за место кое е исклучиво во ингеренција на градот, а градот нема издадено дозвола, туку во јавноста се покажува некаква потврда за користење без надомест. Во врска со нашето решение за дислокација на објектот, тоа е извршно и секој момент треба да се реализира. Сметам дека, доколку станува збор за сериозна телевизија, сериозен медиум којшто држи до својот рејтинг, секако дека ќе најде начин, погодно место и согласно правилно добиена документација да може да промовира една таква програма.

Покренавте ли кривична постапка против одговорните во Општина Центар, поради тоа што издале одобрение за простор што не е во нивна надлежност?
- Да, покрената е кривична пријава против инспекторот кој го издал документот и кој тврди дека тоа е во надлежност на општина Центар, што апсолутно не е точно. Не дозволуваме да се узурпира централното земјиште и центарот на град Скопје.