Трговски објекти (општо)

Меркур отвора нов центар за металургија и технички производи во Македонија

Имаме разговори за одредени локации, но не можам да ви кажам за кои. Засега само вршиме тестирање, па ќе видиме која ќе ја одбереме. Сакаме да изградиме центар од 15.000 квадрати во кој ќе ја понудиме целата содржина на Меркур - од фрижидери, па до шрафови. Се надевам дека за две-три години ќе добиеме локација и ќе изградиме таков центар во Скопје

Групацијата Меркур, која е една од водечките компании во Словенија и се занимава со трговија со техничка стока и со металуршки производи, деновиве отвори складиште во Скопје. Менаџерите на Меркур лани ја откупија фирмата што предизвика многу озборувања и различни коментари во Словенија. За плановите во Македонија и за актуелните случувања во Групацијата поразговаравме со Бине Кордеж, генерален директор и претседател на Управниот одбор на Меркур.

Македонската влада во изминатите неколку години воведе реформи за подобрување на бизнис климата. Дали сметате дека таа е поволна за вложување?
За мене е важна генералната клима, а тоа значи да нема поголеми тешкотии да добиеш дозвола, или некого да најмиш и да нема големи политички тензии. Сепак, бизнис олеснувањата не се клучниот фактор за да се одлучиш да инвестираш во некоја земја. Меркур инвестира на некој пазар кога ќе почуствуваме дека има работа, купувачи и побарувачка Тогаш ние одиме со инвестиции без разлика дали таму има поголеми или помали бизнис олеснувања. Но, ако осетиме дека се можни поголеми проблеми и ризици, тогаш нормално не би се одлучиле да инвестираме иако се нудат бенифиции. Тоа е мојот практичен поглед што го темелам врз искуството.

Можете ли да направите споредба како е да се работи во Словенија, а како во Македонија?
Кога го споредувам начинот на работа при добивањето на дозволи и работата со други фирми, сметам дека нема некои големи разлики. Добивањето дозволи за работа никаде не е лесно и едноставно. Во Љубљана деновиве добивме дозвола за изградба по 11 години. Сметам дека вадењето дозволи во просек е исто, дали се работи за Македонија, Србија или Словенија. Секогаш има некои проблеми, некои работат одат побргу, некои потешко, а истото важи и за односот и за работењето со фирмите. Секогаш имаме проблеми со наплатата, понекогаш губиме, имаме проблеми со купувачите кои одеднаш исчезнуваат. Од друга страна, пак, ако добро работиш можеш и добро да заработиш. Факт е дека во Словенија пред десет години имаше поголеми проблеми со плаќањето, отколку денеска. Верувам дека работите ќе одат во таа насока и во Македонија.

Зошто не се одлучивте да инвестирате во слободната економска зона Бунарџик?
Имавме контакти со Владата, но таму локациите ги делат само за производство, а ние сме трговци. Имаме производствен капацитет во Србија и нема причина зошто да отвориме во Бунарџик. Кога ја правевме првата инвестиција во Македонија пред четири години беше многу тешко да се работи со овдешните институции, но сега во тој, административен дел, многу е подобрена климата. Ние сме еден од поголемите потенцијали што би можеле да влезат на македонскиот пазар.

На отворањето на складот во рамки на МЗТ рековте дека сте присутни во сите држави од поранешна СФРЈ. Дали планирате да се проширите и надвор од тие рамки?
Размислуваме да се шириме, но инвестициите во нашата гранка се исклучително големи. За да го покриеме подрачјето на поранешна СФРЈ, планираме во наредните пет години да инвестираме 500 милиони евра, но и со тоа не ќе можеме да достигнеме 15 до 20 проценти од пазарниот удел што би го сакале. Наша тактика е прво добро да се позиционираме во една држава, и потоа да одиме понатаму.

Рековте дека ќе инвестирате 500 милиони евра. За кој пазар мислите?
Мислам на Словенија, Србија, Хрватска, но најмногу во Босна, а во Македонија покрај оваа инвестиција која не е многу мала, размислуваме за изградба на голем трговски центри, кој би чинел 20 милиони евра. Имаме разговори за одредени локации, но не можам да ви кажам за кои. Засега само вршиме тестирање, па ќе видиме која ќе ја одбереме. Сакаме да изградиме центар од 15.000 квадратни метри во кој ќе ја понудиме целата содржина на Меркур - од фрижидери, па до шрафови. Се надевам дека за две-три години ќе добиеме локација и ќе изградиме таков центар во Скопје.

Колку вреди Групацијата Меркур?
Меркур денеска вреди половина милијарда евра. Постоиме 113 години, а најголем раст имавме во последните десет кога ја зголемивме продажбата за пет пати. Планираме секоја петта година продажбата да ја удвоиме. До 2013 година сакаме да имаме продажба од 3 милијарди евра и над осум илјади вработени. За да го постигнеме тоа потребен е голем развој. Гледаме се уште голем потенцијал во Словенија, но се повеќе и во други држави како Хрватска, Србија, Босна и Македонија, каде се одлучивме да ја интензивираме продажбата. Во Македонија сме долго присутни, но благодарение на екипата која работи овде, одлучивме дополнително да инвестираме во ова складиште што ќе ни овозможи продажбата да стане уште поголема. Македонија и денеска е важен дел од групацијата Меркур.

Како успевате да ја зголемите продажбата?
Некогаш и јас се прашувам за тоа. Успехот сметам дека е во одбирањето на вистинските луѓе кои работат и живеат за Меркур. Ние сакаме она што заеднички сме го направиле да го поделиме со сите вработени. На пример, годинава е добра за Меркур и обемот на заработувачка го зголемивме за 20 проценти. Поради добрите резултати, во септември им исплативме на сите 5.000 вработени по 500 евра, вклучувајќи ги и оние во Словенија и во Македонија и во Босна. Тоа беше исклучително добра награда, што ќе ги поттикне луѓето да направат повеќе.

Од друга страна, Меркур во гранката металургија се обиде да направи нешто поразлично од сличните фирми во Европа. Ако само нешто копираш од големите западни компании, тешко ќе можеш да ги престигнеш. Меркур работи многу повеќе на квалитетот и на услугите, а со нашите вработени имаме добри релации. Затоа сметам дека резултатите што ги постигнавме се плод на таквиот наш приод. Се надевам дека плановите што ги имаме за Македонија ќе ни успеат.

Словенечки „Меркур“ во Скопје

Словенечки „Меркур“ ја реализира третата своја инвестиција во Македонија вредна над еден милион евра. Станува збор за трговски центар со над 20 илјади артикли со површина од 2.500 метри квадратни, сместен во Скопје.

Официјалното отворање го означија вицепремиерот Ивица Боцевски, генералниот директор и претседател на Управниот одбор на групацијата „Меркур“ од Словенија Бине Кордеж и директорката на Меркур Македонија Весна Мирчевска.

Меркур Македонија е една од 16-те компании во групацијата на словенечки Меркур“, која според Кордеж е една од најмалите, но е меѓу најуспешните во групацијата.

„Во Македонија сме присутни со години и имаме добри резултати и затоа одлучивме да инвестираме“, истакна Кордеж кој додаде дека и покрај светската економска криза која ќе има влијание врз развојот на групацијата сепак и натаму ќе се развиваат.

Досега словенечки „Меркур“ има инвестирано во Македонија шест милиони евра, а планира и нови инвестиции во поголемите градови во Македонија.

„Светската криза има влијание врз развојот на Меркур. Очекуваме помала продажба, но остануваме на зацртаното да одиме со развој“, истакна Кордеж додавајќи дека во последните 10 години групацијата ја зголемила продажбата од 300 милиони на 1,3 милијарди евра.

Официјалното отворање

Триесет проценти од вкупниот промет на групацијата се прави надвор од Словенија, а минатата година во Македонија прометот е 20 милиони евра.

Според вицепремиерот Ивица Боцевски реализацијата на инвестицијата во услови на една од најголемите светски кризи е сигнал дека односите меѓу двете земји се засилуваат.

„Ова е втора инвестиција на „Меркур“ во Македонија за неполни шест месеци“, рече Боцевски кој додаде дека во Македонија словенечката бизнис заедница расте, особено преку словенечките инвестиции и оти тие се добредојдени секогаш и за Владата и за граѓаните.

„Самото приближување на Македонија кон ЕУ се огледува во тоа што расте интересот на странските компании за Република Македонија. Први што доаѓаат кај нас се токму нашите пријатели од Словенија, токму оние кои беа најуспешни од нашата поранешна држава во нивните евроатлантски аспирации“, истакна вицепремиерот Ивица Боцевски.

По повод отворањето на новиот трговски центар, „Меркур“ додели донација од 50.000 денари на Основното училиште „Стив Наумов“ во Автокоманда.

Германци основаа фирма за недвижности