Кон крајот на идната година, а не во март, како што беа првичните најави, ќе стигнат првите двокатни автобуси што ги купува Владата, според последната изјава на вицепремиерот за евроинтеграции Ивица Боцевски. Тој го најави новиот рок одговарајќи на поканата од градоначалникот Трифун Костовски заедно со премиерот Никола Груевски да се повозат во нископодниот автобус од типот „мерцедес“, кој деновиве промотивно ќе сообраќа по улиците, пред сè на линијата со бројот 15.

Во саботата Костовски со својата сопруга, директорот на ЈСП Александар Бошковиќ и повеќе претставници од градската управа и медиуми го промовираа Мерцедесовото градско возило, што беше прва од неколкуте промоции на нископодни автобуси со кои градоначалникот сака да ја разубеди Владата од идејата да купи „даблдекери“ за Скопје.

- Убедени сме дека нископодните еднокатни автобуси се најсоодветни за градскиот превоз. „Мерцедес“ веднаш ни излезе во пресрет и ни позајми едно возило без надомест, во кое граѓаните ќе можат да се возат бесплатно. Нивниот збор треба да биде последен за тоа какви автобуси да купи Владата, бидејќи за таа набавка ќе се трошат народни пари. Мораме да воспоставиме дијалог со централната власт за ова прашање, затоа што ние како град немаме ниту пари да купиме автобуси, ниту можности да се задолжиме. Убеден сум дека Владата ќе се разубеди, бидејќи двокатните автобуси немаат никаква предност во однос на овие - истакна Костовски.

Мерцедесовото возило е зглобно, има 37 места за седење и собира вкупно 140 патници, а има посебни места за хендикепирани лица и за бебешки колички. Хидрауличниот систем што е вграден во него му овозможува да се спушти до висината на тротоарите, а на втората врата има посебна рампа за лицата со посебни потреби. Нема скалила, туку со само еден чекор веднаш се влегува внатре.

- Овој автобус има двапати поголем капацитет од двокатните, а чини 300.000 евра, што е за една четвртина помалку од просечните цени на тие возила. Треба пред сè да се остави стручните лица да решат какви возила ни требаат - смета Александар Бошковиќ, директорот на ЈСП.

По промоцијата автобусот заврте еден круг од базата на претпријатието до центарот и откако Костовски излезе пред зградата на Владата другите се вратија назад. Речиси сите пешаци, патници на станиците, возачи на автомобили и на автобуси љубопитно го следеа неговото движење низ улиците.

Уште истиот ден Боцевски ја поздрави одлуката на Костовски да се повози со градски автобус, но му порача да се качи во возило за што имал одговорност, а не во некое што служи само за сценско дејство.

- Ќе биде добро градоначалникот за време на својот мандат да влезе во еден од скопските автобуси, за да види како скопските градоначалници од сферата и областа на транзицијата зад себе го оставаат јавниот превоз. Јас секој ден со ќерка ми се возам во нив и добро знам што е скопски автобус. За една година од сега, кога ќе се врши испораката на двокатните автобуси, Костовски и неговиот тим ќе бидат дел од историјата и од Музејот на градот Скопје. Се разбира, историјата ќе го даде својот суд за тоа колкав бил успехот на неговата администрација - додаде Боцевски.