Скопски сообраќај (општо)

Градот Скопје ќе инвестира во проширување на улицата Маџари

Градската власт распиша повик за прибирање на понуди за изведба на првата фаза од проектот за проширување на улицата Маџари во скопската општина Гази Баба. Градежните активности најпрво ќе се одвиваат на потегот од крстосницата со улицата Јужноморавски бригади до улицата Палмира Тољати во должина од 666 метри. Улицата Маџари со спроведувањето на проектот ќе добие четири коловозни ленти, при што ќе се реконструира постоечкиот асфалт и ќе се постави атмосферска канализација. Според податоците од веб – страницата на Бирото за јавни набавки, инфраструктурниот проект ќе се реализира во рок од 20 месеци.



За реконструкција и проширување на улицата Маџари е проценето дека ќе се потрошат 63.701.860 денари или околу еден милион евра, без вклучен ДДВ. Понудите ќе се прибираат до 16 април, кога ќе се знае и кој е изведувачот на изведбените работи на терен. Основните проекти за сообраќајна инфраструктура и за атмосферска канализација ги изработи „Давос Инвест“ од Скопје, додека нивната ревизија ја изврши Градежниот факултет. Целосното проширување на улицата Маџари до надвозникот кај автопатот кон Велес ќе се реализира во две фази.

http://www.build.mk/?p=43801

Originally posted by жителите на населбата Трнодол „...со што целосно ќе биде уништен овој дел од градот“.

Градот? Први април помина ало.

Некоја уличка кој ја нарекле Јужна обиколнија и која почнува од Припор негде и завршува кај Реплек (Нерези).

Јужната обиколница е планирана со вкупно четири ленти, а инече Јужен булевар најверојатно има поголеми шанси да се реализира попрво отколку јужна обиколница. Искрено и не знам како би бил ефектот од обиколницата...

Наводно за патов се испратени документи во странство и се чека некој да финансира-кредитира.

Originally posted by Џоле Зошто некој од странство би финансирал пат што води до Драчево? Ниту е автопат, ниту е од меѓународно значење. Ако под странство мислиш на некоја странска банка, тогаш можеби и има некаква логика. Инаку, не гледам зошто некоја странска (европска?) институција би трошела пари за локален пат што поврзува една приградска населба со Скопје.

Точно е тоа, ЕУ донира само автопати до одреден %, и тоа само за оние кој се транзитни за Европа, веројатно вос лучајов се работи за кредит од Европска банка, ако воопшто е точна информацијата.

Мислев за странски финансиски институции како ЕБОР кои ќе кредитираат! Нормално дека град Скопје нема да ја гради со свои средства затоа што ги нема.
Од проектантската куќа документите се предадени во Градот и истоте се препратени на разгледување. А дали е точна информацијата ќе чуете за некој месец на вести кога ќе кажат од кои средства ќе се изработи проектот, т.е.кој ќе го кредитира.

Originally posted by my Macedonia Почна да се прошири булеварот цветан димов. Скопјани ајде на терен 😁😁 Иначе пластичарка ќе се прошири во март 2016 и ќе се инвестираат 3 мил. евра.

Од каде ти е информацијата?

ГРАДОТ ПОДГОТВУВА ПЛАН ЗА НОВ БУЛЕВАР ВО БУТЕЛ

Новата сообраќајница „Кристијан Тодоровски-Карпош“ ќе има траса од околу 1,5 километар и ќе го растовари сообраќајниот метеж на „Бутелска“ и „Александар Урдаревски“

Жителите на општина Бутел ќе се спасат од сообраќаниот метеж на улиците „Бутелска“ и „Радишанска“, бидејќи Градот веќе ја подготвува планската документација за изградба на улицата „Кристијан Тодоровски-Карпош“ во делот на општината Бутел до обиколницата. Станува збор за булеварско решение и штом ќе се комплетира планската документација, градските власти ќе пристапат кон изградба на новата пробивна сообраќајница.

Всушност, сегашната траса на „Кристијан Тодоровски-Карпош“ ќе продолжи на вкрстувањето со булеварот „Босна и Херцеговина“ кај социјалните згради во продолжение кај надвозникот, низ општината Бутел до северниот дел на обиколницата, кај улицата „Рокомија“. Бутелчани одамна ја очекуваат реализацијата на овој проект, а геодетите велат дека започнале со премер на земјиштето уште пред Нова година. Неофицијално се зборува дека работите се забавени поради проблемот што надлежните го имаат со приватните сопственици на земјиштето близу надвозникот. Земјата била сопственост на Институтот за лозарство, а потоа со денационализација им била вратена на неколку сопственици, кои сега чекаат обесштетување.

Реализацијата на проектот ќе значи многу, особено за жителите од северниот дел на општината кои наместо по „Бутелска“ и „Радишанска“, каде што има целодневен сообраќаен метеж, до градот ќе можат да стигнуваат по многу покус пат. Сообраќајното растоварување ќе значи и помалку издувни гасови и за пешаците и за жителите од овој дел на Бутел. Проектната документација за новиот булевар ќе ја изработи „Геомал дизајн“, а сето тоа ќе чини милион денари.

„Трасата на новата булеварска сообраќајница што ќе се поврзе со северниот дел на скопската сообраќајница ќе биде во должина од околу километар и половина, во зависност од тоа каде точно ќе минува, што ќе се знае по изготвувањето на проектната документација. Крајната цел е растоварување на сообраќајниот метеж на ’Бутелска‘ и на ’Александар Урдаревски‘, со што ќе се добие нов сообраќаен излез и влез на општината Бутел. Во втората фаза од реализација на проектот, ќе се прошири и сегашната улица ’Кристијан Тодоровски-Карпош‘, од паркот ’Чаир‘ до социјалните згради, но за тоа најпрвин Општина Чаир треба да ги реши имотно-правните односи за дел од земјиштето кое е во приватна сопственост“, објаснија од канцеларијата за информирање во Градот.

Од Општина Бутел велат дека проектот се одолжил поради недостаток на средства. „Со изградбата на пробивната сообраќајница ’Кристијан Тодоровски-Карпош‘, населбата Бутел 2 ќе се поврзе со големиот вијадукт на обиколницата, а кон неа ќе се приклучат и населените места Љуботенски Пат, селото и населбата Радишани. Тоа ќе значи огромно сообраќајно растоварување на улиците ’Радишанска‘ и ’Бутелска‘ и скратување на патот и на времето за овие жители да стигнат до центарот на градот. Општина Бутел имаше доставено барање до Градот улицата ’Натанаил Кучевишки‘ да биде приклучена кон трасата на новиот булевар“, вели Снежана Клинчарова, портпарол во Општина Бутел.

http://www.utrinski.mk/?ItemID=0D6F068FF6BDF840B43B29D52A36767F

А да ги довршеа прво почнативе „капитални“ проекти (Гологанов, Партизанска во ЃП) па сетне да почнуваат нови?