Деловен објект на местото на старата Народна банка

За една година ќе почне да се гради подземната улица покрај кејот

Изведбата е обврска на инвеститорите на новиот објект и ќе ги чини 1,5 милион евра

Деспина Трајковска

Подземната сообраќајница која треба да биде единствен сообраќаен линк со новата деловна зграда што почна да се гради на кејот, со изведба ќе стартува дури за една година. Дотогаш фирмите инвеститори „Дивелоп“ и „Латис“ планираат објектот да се изгради до фаза на карабина. И покрај „тежината“ на зафатот за подземната улица, како што оценуваат некои, инвеститорите сметаат дека ќе завршат со обврската навремено и без проблеми.

„Ќе се гради една обична сервисна улица, а не автопат. Единствено можеби скептични се некои теоретичари и тоа само затоа што станува збор за подземна сообраќајница. Но, не постои простор за сомневање“, уверува Александар Ивановски, управителот на „Дивелоп“.

Тој вели дека се' уште немаат готов проект за подземната улица, но се работи на него. Инвеститорите потенцираат дека имаат сознанија од речиси сите надлежни институции дека со изградбата на улицата нема да се наруши статиката на потпорниот ѕид, ниту, пак, ќе се јават проблеми поради близината на Вардар и подземните води. Проценето е дека подземната врска со објектот ќе чини 1,5 милион евра. Во зградата, пак, инвеститорите ќе вложиле 10 милиони евра, а за комуналии платиле 1.100.000 евра.

И по дваесетина дена работа на терен, травертинските плочи се' уште се вадат. Се привршува со организирање на градилиштето, но патот по кој е дозволено да минува механизацијата, по должината на кејот покрај ѕидот, се' уште не е трасиран. Таква траса, согласно со урбанистичкиот план, всушност, ќе има и подземната сообраќајница. Влезот ќе биде од кај киоскот кај „Холидеј ин“.

„Неколку дена отстапување од динамичкиот план за работа ништо не значи. Имаме разбирање за околните локали, односно летните тераси, па поради тоа се' уште не сакаме да почнеме со оградување“, објаснува Ивановски.

Според проектот, деловната зграда која ќе никне на просторот меѓу некогашен „Метропол“ и коритото на Вардар ќе има шест ката. Во делови фасадата ќе личи на некогашниот објект на Народна банка, кој се наоѓал на истата локација до катастрофалниот земјотрес. Иако инвеститорите ја добија градежната дозвола пред повеќе од половина година, со работа на терен стартуваа неколку месеци подоцна, бидејќи чекаа градските власти да го сменат својот став и конечно да им издадат сообраќајна согласност за проектот. Градот ги обврза инвеститорите откако ќе го изградат објектот, кејот да го вратат во првобитна положба.

http://utrinski.com.mk/?ItemID=A4F77FC484FCAE42819432C33F4C7EA3

Надземен премин како пeшачка врска меѓу кејот и плоштадот

За челичната конструкција изведувачот тврди дека е повеќе од безбедна

Деспина Трајковска

Надземен пешачки премин изведен од челична конструкција, од викендов претставува единствена директна комуникација меѓу пешачката зона на кејот со плоштадот „Македонија“. До ГТЦ, пак, освен преку преминот, може да се пријде и од задната страна на некогашен „Метропол“, преку поминот кај Стопанска банка. Надземниот премин е изведен по налог на инвеститорот на објектот што се гради на аголот на кејот.

Преминот, всушност, е дел од проектот што го одобрил Градот за да не се прекине пешачката комуникација на дел од кејот и плоштадот. Иако е доволно само да се искачат две-три скали од дваесетината, колку што водат до надземниот премин, за да се почувствуваат звуци кои оставаат впечаток на небезбедност, неговите изведувачи уверуваат дека нема потреба за страв. Тврдат дека преминот е повеќе од безбеден и изведен по најнови стандарди и методи. Чкрипењето кога се минува по него било вообичаено. Висината на газиштето, 5,5 метри од земјата, признава изведувачот, можеби е малку голема, но околните услови за изведба биле такви. Под преминот е предвидено да минува механизацијата која ќе биде вклучена во изградбата, а која до градилиштето ќе доаѓа од трасираниот приод на кејот од страната на ѕидот што веќе е заграден.

„Микроосцилациите што се чувствуваат на преминот не треба никого да заплашуваат, тоа е вообичаено. Нема потреба од страв дали преминот е безбеден, неговата носивост изнесува дури 100 тони“, тврди Зоран Димитров, управител на „Каравас“, фирмата која го изведе надземниот премин.

Димитров уверува дека преминот е изведен според стандарди кои и не се потребни за постојниот терен. Сепак, токму заради сомневањата на граѓаните, тој ќе биде и дополнително обезбеден. Во неговите „корени“ ќе се постават бетонски столбови. Тој потенцира дека никој не треба да се сомнева во гаранциите што ги дава „Каравас“, имајќи предвид дека фирмата е ангажирана на многу посериозни проекти, како што е изведбата на северната трибина на Градскиот стадион.

Инаку, според најавите, деновиве ќе започне копањето на теренот за изградба на објектот. Сите досегашни активности, всушност, беа подготвителни работи за изградба и организација на градилиштето. Планирано е објектот за една година да биде готов до фаза на карабина, по што истовремено ќе започне и изградбата на подземната сообраќајница, која треба да претставува единствен сообраќаен линк за зградата. И подземната врска ќе ја градат инвеститорите на објектот, фирмите „Дивелоп“ и „Латис“. Според ГУП, улицата ќе води од кај трафиката кај „Холидеј ин“ до објектот. Инвеститорите допрва ќе го нарачуваат проектот за улицата. Процениле дека подземната врска со објектот ќе чини 1,5 милиони евра.

http://utrinski.com.mk/?ItemID=DEACEFC028957444BA69BC6A0B964A48