Урбанистички планови и парцели (општо)

Гратче ќе никне покрај индустриската зона во Гази Баба

Повеќе инвеститори се заинтересирани за изградба на бензински пумпи, изложбено-продажбен салон, голем објект за лесната индустрија и магацини со простор за администрација во источниот дел на градот

ДУП покрива површина од 32,5 хектари: крстосницата на булеварот Војводина и Индустриска

Две нови бензински пумпи, објекти за лесната индустрија, изложбено-продажен салон и магацини со простор за администрација се дел од објектите што се предвидени за изградба во Општина Гази Баба, откако Советот на Општината го усвои новиот Детален урбанистички план наречен „Источна индустриска зона 40, 41 и 42“. Овој ДУП покрива површина од 32,5 хектара, што се простираат од булеварот Војводина, Индустриска и улицата Перо Наков до Металски завод „Тито“ на исток.

Општина Гази Баба има најголема индустриска зона во Скопје и во државата и на нејзина територија се создава една третина од бруто домашниот производ (БДП) на земјата. Квалитетното земјиште, поволната сообраќајна и вкупна комунална инфраструктура, стручната работна сила, присуството на научни, образовни, здравствени и други институции во близина, како и традицијата и понатаму ја прави оваа локација меѓу најатрактивните за развој на лесната индустрија.

Мирослав Марковски, раководител на Секторот за урбанизам, просторно планирање и заштита на животната средина, комунални дејности и уредување на градежно земјиште, во детали ни го објасни развојниот план.

- Најголем интерес од странските инвеститори за изградба на објекти покажа фирма од Израел. Земјиштето на оваа урбанистичка парцела е мешовито, по половина е приватно и државно. Разговаравме со двата сопственика на приватното земјиште. Тие начелно се согласуваат да го отуѓат земјиштето за да може новиот инвеститор да ја дооформи урбанистичката парцела, за што е информирано и Министерството за транспорт и врски. Од оваа локација во иднина очекуваме голем прилив пари од комуналии, односно од надоместокот за уредување на градежно изградено земјиште - потенцира Марковски.

Марковски објасни дека бензинската пумпа на улицата Перо Наков ќе почне да се гради наскоро, а инвеститор ќе биде фирмата „Дет оил“ од Куманово. Засега не се знае дали другата пумпа, на булеварот Војводина, ќе ја гради „Мак оил“, поради неразрешени имотно-правни односи.

Исто така, со овој ДУП, спроти автосалоните на „Мерцедес“ и на „Автокуќа“ е предвидено да се гради голем објект наменет за лесната индустрија, со површина од 90.000 квадратни метри. Површината на земјиштето на кое ќе се гради објектот е 30.000 квадратни метри.Бидејќи „Тинекс“ ја купи Кланицата, тој веќе почна да инвестира со тоа што изгради еден супермаркет, а има најави дека ќе инвестира и во ревитализација на старите објекти на Кланица.

- Инфраструктурата за објектите што треба да се градат на просторот што го опфаќа овој план ќе се изведува откако инвеститорот ќе пројави интерес за градба. Општината не може однапред да вложува, бидејќи нема доволно средства во буџетот. Ќе треба да се пробие улицата Индустриска 1, но тоа е градска улица - вели Марковски. Од Градот велат дека во буџетот за годинава не предвиделе средства за пробивање на таа улица.

Парцелите што се опфатени со овој план, кои се во државна сопственост, ќе бидат дадени на лицитација од Министерството за транспорт и врски, откако претходно тоа ќе преиспита дали се чисти имотно-правните односи. Од новите објекти Општината и Градот очекуваат вкупно 460 милиони денари од комуналии. Таа индустриска зона е најголемата во градот и во земјава. На нејзина територија се наоѓаат големите индустриски капацитети „Алкалоид“, скопската пиварница, Железарницата.

ИНФО-Третина од БДП

Општината Гази Баба има најголема индустриска зона во Скопје и во земјава. На нејзина територија се создава една третина од бруто домашниот производ на земјата. Оваа локација е меѓу најатрактивните за развој на лесната индустрија.

Парцелите што се опфатени со овој план ќе бидат дадени на лицитација од Министерството за транспорт и врски, откако претходно тоа ќе преиспита дали се чисти имотно-правните односи. Од новите објекти Општината и Градот очекуваат вкупно 460 милиони денари од комуналии.

http://dnevnik.com.mk/?ItemID=EE4CBB609CB61D47BAE70CD7DCEF763F

Најчесто се почнува изградба без ревидиран проект од надлежна институција, се брза со изградбата при што се прескокнуваат пропишаните фази, или, пак, не се вршат неопходните геомеханички испитувања на ридот кој се поткопува поради изградба на објект

Поткопување на Водно заради изградба на куќа или зграда стана масовна појава која дури е поткрепена и со детални урбанистички планови. Во Скопје се повеќе објекти, па дури и цели населби, се градат со засекување на самиот рид, а од одрон на земја ги спасуваат потпорните ѕидови. Според експертите, тие сепак не се секогаш најдобро и најсигурно решение, што неодамна го докажа и примерот во населбата Кисела Вода каде се урна потпорен ѕид во изградба. За среќа немаше жртви. Експертите пак сметаат дека овој тренд треба да престане, а урбанистите да почнат да проектираат висококатници и над 50 ката, во рамните делови од градот.

- Ако тлото каде што се прават засеци во ридот се од глина и чакал, несигурноста се зголемува. Ако на тоа се додаде и постојано влажнење на почвата од атмосферски води, тогаш можноста од придвижување на тлото се зголемува. Иако постојат проекти со кои се прават пресметки со цел потпорниот ѕид да го издржи товарот на земјата, сепак градба на вакви локации треба да се избегнува, или ако веќе има потреба да се гради на места каде што земјата е карпеста или лапореста, односно земјиштето е многу поцврсто, вели Михаил Гаревски, директор на Институтот за земјотресно инженерство, кое исто така врши и ревизии на градежни проекти. Иако во случајот во Кисела Вода, како што дознаваме, вината не е во лошиот проект, туку во брзањето на инвеститорот да започне со темелите на објектот пред да се изгради потпорен ѕид, поради што настанало негово поткопување и уривање, сепак, најчесто се почнува изградба без ревидиран проект од надлежна институција, се брза со изградбата, при што се прескокнуваат пропишаните фази, или пак не се вршат неопходните геомеханички испитувања на тлото. Инвеститорите во трка за квадрат повеќе не размислуваат за последици. Се поткопува Водно, објектите се надвиснати над бездни, нема простор за паркирање. Ист е случајот и со објектите околу црквата Света Петка, Тасино чешмиче...

Камбанарија, музеј на МПЦ, зграда на синодот, богословски факултет, деканат, студентски дом за мажи и депанданс за жени, се само дел од објектите што уште минатата година требаше да никнат на местото на сегашната адвокатска уличка. Сево ова е предвидено во деталниот урбанистички план „Пресвета Богородица“, кој беше изгласан од Советот на општина Центар. Но, од амбициозно зацртаните проекти до денеска нема изградено ништо. Минатата година, откако ваквата одлука и официјално беше донесена, реагираа адвокатите и нотарите што со години имаат свои канцеларии токму во таа уличка. Според нив, таквото решение е неосновано поради тоа што тие веќе со години своите клиенти ги опслужуваат на тоа место. - Секаде во светот постојат места каде што на одредена локација има поголема концентрација на правни лица. Кај нас такво место е оваа уличка, по што и го добила името. Сега луѓето за каков било проблем што го имаат и за кој им треба стручна правна помош, најчесто за помош се обраќаат токму кај нас - вели еден од адвокатите кој седум години има своја канцеларија на адвокатската уличка. Како поткрепа на овој став, тие велат дека дополнителена добивка и за нив, но и за нивните клиенти, е близината на комплексот судови, кои секојдневно треба да ги посетуваат поради вршење на професионалните активности. Од Скопската епархија не се согласуваат со таквите образложенија на правниците затоа што, како што велат, земјиштето на кое сега се наоѓаат бараките во кои што се сместени адвокатските канцеларии е во нивна сопственост. - Земјиштето е на МПЦ и таму е предвидено, се разбира во согласност со Општина Центар, да се градат верски објекти и објекти за религиозни цели - изјавија од Скопската епархија. Сепак оттаму не можеа да прецизираат зошто се уште не е почната изградбата на таквите објекти и покрај тоа што помина нешто повеќе од донесувањето на таквата одлука. И надлежните од Општина Центар потврдија дека на тој простор е предвидена изградба на верски објекти и дека таквата одлука е донесена во декември минатата година.

http://www.vreme.com.mk/DesktopDefault.aspx?tabindex=1&tabid=1&EditionID=1559&ArticleID=102807

Тунел во Штип за хаосот во сообраќајот

ШТИП - Изградба на тунел од центарот на Штип до населбите и индустрискиот дел. Овој скап и утопистички проект би бил една од варијантите за штипскиот хаос со возила.

Ова решение можеше да се слушне вчера од изготвувачите на сообраќајниот Детален урбанистички план, кога се дебатираше на тема „Акционен план за безбедноста на сообраќајот“.

Други сообраќајни стручњаци ја оценуваат идејата за тунел како невозможна. Затоа настапија со иницијативи кои значат проширување на одделни фреквентни улици, со изградба на тротоари, паркиралишта за такси-возила и за автобуси од локалниот сообракај...

Никој во Штип не е задоволен од сообраќајните можности. Затоа градот побара да се изготви нов детален урбанистички план за подобрување на сообраќајните решенија.

Во јавната дебата беа констатирани повеќе реални пречки кои се услов за создавање сообраќаен хаос. Затоа беа предложени повеќе решенија. Штип, сместен меѓу пет рида, нема доволно добра сообраќајна инфраструктура за 12.000 возила и за оние што влегуваат во градот. Сообраќајни стручњаци беа едногласни дека градот нема квалитетни улици, паркиралишта, тротоари... Во такви услови сообраќајната култура е на ниско ниво, бидејќи секој учесник во сообраќајот прави обид да се „снајде“ на секаков начин, главно прекршувајќи ги правилата.

Градот има развиена индустрија со околу 13.000 вработени во многу претпријатија надвор од него. По автобусите преполни со работници кои ќе тргнат кон центарот или населбите се создаваат колони од возила. Во такви услови се случуваат незгоди. Меѓу населбите Сењак 1, 2 и 3 и населбата Баби, во кои живее една третина од педесетилјадното население, улиците се без тротоари, а метежот е огромен. (И.Б.)

http://utrinski.com.mk/?ItemID=7F4C197918C04C46B9BAA9DA827F0E90