Возен парк (приватни превозници)

Приватниците од јануари идната година ќе возат нови автобуси!?

Трифун Костовски побарал приватните превозници да го обноват возниот парк

Хаваријата што се случи во центарот на Скопје, кога приватен автобус по целата улица „Димитрие Чуповски“ разлеа моторно масло и нафта, е последна опомена за надлежните дека повеќе не смеат да дозволат да возат по градските улици стари возила

Снежана Калабакова

Хаваријата што се случи неодамна во центарот на Скопје, кога од приватен автобус истече моторно масло и нафта по целата улица „Димитрие Чуповски“, е последна опомена за надлежните дека повеќе не смеат да дозволат по градските улици да возат стари возила, бидејќи тие не само што го загрозуваат сообраќајот и животот на патниците туку предизвикуваат и еколошка катастрофа. Од Секторот за сообраќај во Градот велат дека интенцијата на скопскиот градоначалник Трифун Костовски е приватниците комплетно да го обноват возниот парк и до почетокот на идната година да имаат нови автобуси.

Дотраените автобуси на „Слобода превоз“ кои нудат крајно лош и неквалитетен превоз, се стари и по 25 години и многу често се расипуваат, а патниците остануваат на половина пат. Во повеќето од нив скопјани зимава се возеа без парно, со врати и прозорци што не дихтуваат, а во текот на патувањето голтаа чад. Граѓаните се едногласни дека е крајно време надлежните да преземат интервентни мерки и строго да дејствуваат кога е во прашање јавниот превоз. На оваа тема градоначалникот Костовски деновиве разговарал со претставниците од „Слобода превоз“, кои велат дека ќе побараат кредити само ако Градот застане зад нив, за што тие веќе се распрашале кај банките. Во разговорите било истакнато новите автобусите да се појават на скопските улици од 1 јануари идната година. Приватните превозници тврдат дека се многу сериозни во намерата ова да им успее, зашто признаваат, крајно време е да ги снема дотраените возила од улиците. Со градските власти се согласиле дека, конечно, треба да се утврдат нивните обврски, но и права.

„Од градските власти побаравме да добиеме приоритет на жолтата линија и дозвола доделените линии да ги користиме најмалку осум години. Побаравме да се разграничи на кои линии ќе возиме ние, таму да не возат автобусите на ЈСП. Притоа, инсистираме градските власти да го решат и проблемот со дивите превозници. Откако ќе потпишеме спогодба со Градот, ќе имаме обврска најдоцна во јуни да нарачаме автобуси, а испораката од фирмата што ќе ја договориме, треба да биде извршена најдоцна за шест месеци. Оние кои не ќе можат да купат нови автобуси, ќе си одат од претпријатието“, вели Ленин Јовановски, директор на „Слобода превоз“.

Јован Христовски, раководител во Секторот за сообраќај, потврди дека деновиве градоначалникот Костовски се состанал со претставници на приватните превозници и се правеле планови за обновување на возниот парк. Се дефинирале условите под кои треба да се врши јавен превоз на патници, што значи дека не ќе може секој да излезе на улица и да ја извршува оваа дејност. Замената на старите автобуси веројатно ќе оди со одредена динамика во наредниве три години.

Приватниците заинтересирани за нископодниот автобус

Автобуските превозници од „Слобода превоз“ се заинтересирани да го подноват својот возен парк со нископодните автобуси на „Мерцедес“. Оваа одлука тие ја донеле вчера откако викендов нископодниот автобус, по еднонеделно промотивно возење на линијата „15“, се префрли да сообраќа на приватните линии „23“ и „55“.

„Два дена го возевме автобусот и заклучивме дека дефинитивно тој ги исполнува сите критериуми, почнувајќи од техничките до естетските предиспозиции. До крајот на годинава планираме да ја посетиме германската фабрика и со тамошното раководство да преговараме за набавка на неколку автобуси“, рекоа накусо вчера од „Слобода превоз“, кои веќе подолг период најавуваат оти планираат да го подноват возниот парк. (Дс.Т.)

http://utrinski.com.mk/?ItemID=880D0BF7B1D6B74A802C1DF6DC9285F0