НЕ СТИВНУВААТ ОБВИНУВАЊАТА ЗА ОБЈЕКТОТ НА СКОПСКИОТ ПЛОШТАД

Граѓани протестираат за оградата, инвеститорот за улицата

Не гледам ништо спорно во оградувањето на просторот, бидејќи тоа е направено од безбедносни причини и според одредбите од Законот за градбата, тврди инвеститорот

Инвеститорот прашува како од Детаљниот урбанистички план исчезнала сервисната улица Кеј 13 Ноември

Граѓани се закануваат со протести ако не бидат отстранети металните огради од кејот 13 Ноември во Скопје, но општината Центар и градските власти тврдат дека се беспредметни бидејќи документацијата за изградба на објектот Народна банка е легална. Инвеститорот прашува како од Детаљниот урбанистички план исчезнала сервисната улица Кеј 13 Ноември. Општина Центар во јунските измени на ДУП за Мал ринг ја избришала и улицата Кеј 13 Ноември, а во планот ја внесла само подземната сообраќајница, која инвеститорот на објектот треба допрва да ја гради. Таа улица постоеше се' до обновувањето на кејот пред нецели шест години, кога во мандатот на градоначалникот Ристо Пенов беше обновено шеталиштето. Во ДУП-от таа беше означена како сервисна, се' до донесувањето на последната измена на планот за Мал ринг.

Александар Ивановски, директор на фирмата инвеститор „Дивело-груп“, вели дека деновиве јавно ќе излезе со соопштение за шпекулациите во јавноста околу изградбата на објектот Народна банка. Тој потврди оти според одобрението за градба инвеститорот има обврска да направи тунел долг 400 метри, широк 7 и длабок 4,5 метри од почетокот кај хотелот „Холидеј ин“ до нивниот објект. Потоа истата подземна сообраќајница треба да продолжи под плоштадот Македонија, каде што ќе се гради подземен паркинг предвиден со генералниот Урбанистички план.

- Ги имаме сите потребни документи кои се предвидени според законот за градење. Ние сме сериозна италијанско-холандска фирма и пред да се случи купувањето на земјиштето тим адвокати убаво ја разгледаа целата работа, инаку не би се впуштиле во оваа авантура. Нашата фирма го купи имотот во 2007 година. Подземната улица треба да биде готова во 2010 година. Поради тоа што немаше друг начин како да дојдеме до парцелата за градење, бевме принудени да потпишеме дека ќе ја градиме подземната улица - објаснува Ивановски. Тој се повикува на Законот за градба, според кој инвеститорот има обврска да го огради просторот со што ќе гарантира безбедност на граѓаните.

- Ние моравме некако да носиме градежен материјал, машини, кранови, багери и слично. Но, и да го изградевме тунелот, сето тоа ќе беше невозможно да се направи под земја. Според стариот ДУП, на кејот има надземна улица што го носи името Кеј 13 ноември, но сега ја нема. Не гледам, ништо спорно во оградувањето на просторот. Тоа е направено од безбедносни причини и според неколку членови од Законот за градба - тврди Ивановски.

Градските власти велат дека според Деталниот урбанистички план, градбата е надлежност на општина Центар, која при донесувањето на последниот ДУП за Мал ринг во јуни годинава за околу 22 метра го изменила и проширила габаритот на објектот Народна банка.

Марија Тасев
Фото Маја Златевска

http://www.dnevnik.com.mk/?ItemID=AC7C56A05DC60C41ABA87DF5D9B3BF6B

Комбето на А1 останува на кејот

Доцна синоќа било отстрането од пајак службата

Службеното возило на А1 Телевизија кое беше поставено на кејот 13. ноември во знак на протест поради узурпацијата на шеталиштето, доцна синоќа било отстрането од пајак службата, заради непрописно паркирање.

Казната изнесува 200 евра затоа што бил попречен влез на градилиште. Но, на местото каде што е паркирано комбето не стои никаква ознака за градилиште, а градежните работи се одвиваат на стотина метри од поставените паравани.

Денеска возилото повторно е вратено на истото место, но немаше камиони, ниту пак дојде полиција со пајак повторно да го отстрани.

Од МВР демантираат дека дале дозвола за улицата. Полицијата немала ингеренции, ниту смеела да издава дозволи по законот за градба. Од МВР било побарано само мислење, односно согласност за безбедно одвивање на сообраќајот на пешачката зона.

Оваа согласност за локалната власт не е обврзувачка, а градот може да ја даде дури и без мислење на полицијата, стои во демантот на МВР.

Доколку полицијата дала согласност пешачката зона да стане улица по која ќе поминува тешка градежна механизација, А1 бара од МВР согласност службеното возило на телевизијата да остане неправилно паркирано на кејот и да не биде отстрането од пајак службата.

http://www.a1.com.mk/vesti/default.aspx?VestID=100890