Јавна чистота

Ако полицијата постојано е експонирана како репресивна институција, ќе ја изгуби и врската со граѓаните и довербата во неа, предупредува поранешниот министер за внатрешни работи Павле Трајанов

Зголемените надлежности на полицијата во делот на јавната чистота и заштитата од пушењето ќе го намали квалитетот на извршување на нивните основни задачи - чувањето на јавниот ред и мир, безбедноста на граѓаните и борбата против криминалот и корупцијата, предупредуваат експертите. Според новите законски решенија, полицајците имаат право да го казнат секој што го прекршува Законот за јавната чистота. По усвојувањето на овој закон, полицијата ја презеде примарната улога во контролата дали некој ја загадува околината преку фрлање догорчиња од цигари, отпадоци, градежни материјали и други штетни дејствија. Според податоците, за неполни два месеца откога е донесен Законот, полицијата поднесла околу 10.000 пријави за нарушување на јавната чистота. Со Законот за заштитата од пушење се предвидува полицајците од 1 декември заедно со инспекторите да можат во кафеаните да проверуваат дали има реклами на тутунски производи.

ДОВЕРБА

Поранешниот министер за внатрешни работи Павле Трајанов предупредува дека дополнителните обврски на полициските служби сигурно ќе се одразат на извршувањето на основните безбедносни задачи. Тој смета дека полицијата треба што поскоро да биде ослободена од ваквите надлежности и предлага општините да ги зајакнат службите и секоја општина на својата територија да има свои екипи.

- Треба да се јакнат други институции што ќе ги преземат овие обврски. Ако полицијата постојано е експонирана како репресивна институција, ќе се изгуби врската меѓу граѓаните и полицијата. Со такви непопуларни мерки граѓаните ќе ја изгубат довербата што треба да ја имаат во безбедносните органи - вели Трајанов. Во врска со обврските од Законот за пушењето, тој смета дека полицијата во тој дел треба да учествува само ако на инспекторите им е оневозможен пристап во објектите, односно само како помош на инспекторот да ја заврши работата. Портпаролот на МВР Иво Котевски тврди дека иако од 21 септември полицајците поднеле над 10.000 казни, тоа не се почувствувало во ефикасноста на извршувањето на другите обврски.

- Борбата против корупцијата, криминалот и одржување на јавниот ред и мир се одвиваат со ист интензитет. Последниве два месеца дури е забележано и поефикасно работење од страна на полицијата и има помалку инциденти - вели Котевски. Тој се согласува дека јавната чистота треба да биде под надлежност на општините, но бидејќи локалните единици немаат капацитет за тоа, одговорноста ја презела полицијата. Иако по усвојувањето на Законот за јавната чистота, проструија гласови дека полицајците имале норма дневно да напишат најмалку три казни, Котевски тврди дека тоа не е точно иако и тој ги слушнал тие шпекулации.

- Не станува збор за норма, туку за работни задачи. Ако некој цел месец не пријави казна, тогаш логично е да се прашаме дали тој совесно ја врши работата - вели Котевски.

НЕМА РЕАКЦИЈА

И претседателот на Македонскиот полициски синдикат Тихомир Климовски, вели дека до Синдикатот нема стигнато официјална поплака за новите обврски на полицајците. Тој вели дека во други европски држави надлежноста на полицијата околу јавната чистота е позната работа, но дека таму тие обврски ги врши таканаречената градска полиција.

- Во недостиг од таков субјект кај нас, овие надлежности ги презема основниот полициски сектор. Досега во Синдикатот нема стигнато поплаки за зголемувањето на обврските на полицајците - додаде тој.Според Климовски, полициските старешини треба да оценат дали поради дополнителните обврски трпи квалитетот на извршувањето на основните задачи и ако е така да реагираат кај надлежните.

Критики за новите законски решенија од собраниската говорница упати и поранешниот премиер Владо Бучковски. Тој оцени дека наместо граѓанско општество, се создава „џандарско општество“. Додава дека иако истражуваат, не можат да најдат таква држава во Европа во која на полицијата и' се зголемуваат надлежностите во толкав обем.

- Сето ова може само да биде причина за зголемување на бројот на полицајците, што ќе значи нови партиски вработувања. Македонија и сега има поголем број полицајци во однос на жителите. Ако се продолжи вака, кога ќе се прават реформи на полицијата, ќе имаме многу работа - додава Бучковски.