Трамвај Скопје ( Лесна железница / LRT )

Антикорупционерите го кочат трамвајот на Костовски

Градоначалникот смета дека ова е владина сопка на неговиот најкапитален проект

Деспина Трајковска

Сето ова би било смешно да не е жално. Вака накусо вчера градоначалникот Трифун Костовски ги коментираше чекорите што ги презеде Антикорпуциската комисија пред десет дена во врска со случајот “Трамвај“. Со образложение дека незаконски го распишува тендерот за изведувач на шинскиот систем оти државата е во изборен процес, антикорупционерите побараа Костовски да ја стопира јавната набавка. Тој, пак, убеден дека не го прекршил Законот за спречување на корупција, не го исполни барањето. На антикорупционерите завчера им ја испрати целата документација во врска со проектот, одговарајќи им на новото барање Градот да даде отчет за сите досегашни преземени активности. „Тоа е вообичаена постапка што ја преземаме за секој случај. Факт е дека сме во изборен процес и дека вакви капитални јавни набавки не смеат да се спроведуваат“, накусо објасни вчера Мирјана Димовска, претседател на Државната комисија за спречување на корупцијата. Таа не сакаше да одговори на прозивките од Костовски дека Комисијата со овој случај купува време за нечии политички интереси, дека случајот „Трамвај“ е исполитизиран, ниту пак дека Антикорупциската комисија е продолжена рака на извршната власт и активен субјект на изборните активности. „Не сакам да ги коментирам обвинувањата. Ние не сме исполтизирана институција, само го штитиме законот и парите на граѓаните“, дополни Димовска која најави дека конечната одлука на ДКСК ќе зависи од тоа кога од Градот ќе ја добијат бараната документација, која требаше да биде испратена вчера. Ако се остварат најавите, веќе во вторник антикорупционерите ќе пресечат во врска со случајот и евентуално ќе бидат познати санкциите кои ќе ги трпи Градот Скопје, односно градоначалникот Костовски кој , и покрај укажувањата, не го стопира тендерот.

Тој, согласно со сите рокови, треба да заврши на 24 март по што ќе се одбере најповолниот понудувач и евентуално ќе се разгледуваат доставените жалби. По сите пресметки на градските власти, кои вчера во јавноста ја презентираа документацијата и генезата на настаните во врска со проектот, договорот со најповолниот понудувач би се потпишал во почетокот на април, а градоначалникот во периодот меѓу двата изборни круга би го поставил камен-темелникот.

„Овие прогнози ќе се остварат единствено доколку некој повторно не ни стави сопка како оваа бесцелна и безидејна постапка од антикорупционерите“, прокоментира вчера Костовски, кој во сегашнава ситуација препознава владина сопка на неговиот најкапитален проект. Инаку, на тендерот се бара фирма која ќе го изведе трамвајското депо и првите три километри од шинскиот систем, а се бара и понуда за набавка на пет трамвајски возила.